Read lugbara Kalafe 10 Bible Online

Kalafe 10 - lugbara bible

Kalafe 10

¹Yehova nga ’yo Musa tia, kini,

²Mi ede mi dri guka iri dahabusi, mi ede yi dahabu dile dirisi, mi nga ani guka ’diyisi ’ba ongulumuru omve, mi nga guka ’diyi vu ’ba pari hema asozu ’diyia ’diyi ma acita ma e’yosi indio

³Yi ka guka ’diyi vu ra, ’ba ongulumuru dria nga yi oku mi vu hema ti ecizaniri ma jotilia.

⁴Yi ka guka vu alu a’dule, ’ba opiru ’ba Israelini alifu alifu ma dri cepi ’diyi nga yi oku mi vuni.

⁵Emi ka guka vu alicerele, ’ba ovupi pari hema asozu etuni efurialeru ’diyia ’diyi nga dri ko acizuni.

⁶Emi ka guka vu alicerele pale iririsi, ’ba ovupi pari hema asozu woko uruleruria ’diyia ’diyi nga dri ko acizuni, Emi ma vu guka alicerele acita yini ma e’yosi.

⁷Te emi ka le ’ba ongulumuru okuzu tualu, emi ma vu guka ra, te emi vu alicerele ku.

⁸Aroni anzipi kuhaniru ’diyi nga guka vuni. Guka ’diyi ma ovu e’yo azitaru emi dri ’dani ’dani a’bianzi emini vusiri’i.

⁹Emi ka fu mu a’di ’dizu angu emini ma alia ari’ba emi inzapi ’diyi be, emi ma vu di guka alicerele, Yehova Mungu emini nga e’yo emini ega, emi nga ovu pazaru ari’ba emini ma dria ani.

¹⁰Emi ma vu vini guka emini ayiko ’bazurisi, omu e’yoni azile azi ’diyisi, azini o’du mbani egaria ’diyisi, edeta emini vezaru ’diyi pi ma dria, edeta emini asi anzuruni ’diyi be; yi nga ovu emi dri e’yo egale egariru Mungu emini ma drilia: ma Yehova Mungu eminiri’i.

¹¹Eri nga eca ’dini, eli iriri, mba iriri ma o’du kali iririsi, iriti nga nga bere e’yo eti nzezaniri ma driarisi uru.

¹²Anzi Israelini nga di dri ko acizu aci yini vusi, efuzu roko Sinaiariasi; iriti nde nga ri roko Paraniaria.

¹³Yi nga aci yini e’do ekile Yehovani azile geri Musa vurisirile.

¹⁴Pari okori ma alia, pari Yuda anzipini hema asozuri ma bendera ce drini, ’ba yini ongulumuru ’diyi vusi; ’ba ’ba erini ongulumuru ’diyi ma driliari eri Nasoni Abinadabu mvi’i.

¹⁵’Ba ongulumuru Isakari anzipini ma driliari Netaneli Zuari mvi’i.

¹⁶’Ba ongulumuru suru Zebuluni anzipini ma driliari eri Eliabu Heloni mvi’i.

¹⁷Yi nga bereni anzu ra, Gerisoni anzipi azini Merari anzipi, ’ba bere ’dupi ’diyi, nga di dri ko acizuni.

¹⁸Pari Rubeni anzipini hema asozuri ma bendera nga dri ko acizu drile ’ba yini ongulumuru ’diyi vusi; ’ba yini ongulumuru ’diyi ma driliari eri Elizuri Sedeuri mvi’i.

¹⁹’Ba ongulumuru suru Simeoni anzipini ma driliari eri Selumieli Zurisadai mvi’i.

²⁰’Ba ongulumuru suru Gadi anzipini ma driliari eri Eliasafu Deueli mvi’i.

²¹’Ba Kohatini nga di dri ko acizu, nga pari alatararuri ’du, de ’ba ’dayi ji mu bere asosi ’daa de nga yi ecani ku.

²²Pari Efiraimu anzipini hema asozuri ma bendera ce drini, ’ba yini ongulumuru ’diyi vusi; ’ba yini ongulumuru ’diyi ma driliari eri Elisama Amihudi mvi,

²³’Ba ongulumuru suru Manase anzipini ma driliari eri Gamalieli Pedazuri mvi’i.

²⁴’Ba ongulumuru suru Benyamini anzipini ma driliari eri Abidani Gideoni mvi’i.

²⁵Pari Dani anzipini hema asozu ovupi pari hema asozu ’diyi ma vutia vile asizuri ma bendera, nga dri ko acizu ’ba ongulumuru yini vusi; ’ba yini ongulumuru ’diyi ma driliari eri Ahiezeri Amisadai mvi’i,

²⁶’Ba ongulumuru suru Aseri anzipini ma driliari eri Pagieli Okirani mvi’i,

²⁷’Ba ongulumuru suru Nafutali anzipini ma driliari eri Ahira Enani mvi’i.

²⁸Anzi Israelini ma aci ndra ’dini, ’ba yini ongulumuru ’diyi vusi yini dri koria.

²⁹Musa nga ’yo Hobabu Reueli ’ba Midianini, Musa ma anyi ma mvi ma tia, Ama di aci pari ndra Yehovani e’yoni ’yole kini, Ma nga eri fe emi dri raria; mi emu ama be, ama nga mi ’ye onyiru; Yehovani e’yo onyiru ’yole Israeli ma e’yosi ’borisi,

³⁰Eri nga ’yo eri tia, Ma ngani mu ku, te ma nga mvi ama vile angua, ’ba ama vile ’diyi vu.

³¹Eri ’yo eri tia, Ma zi mi tia, mi ma ku ama ku fo! A’disiku mini nile ama nga hema aso roko dria rarisi, mi nga ovu ama dri mileru,

³²Te eri nga ovu ’dini, mi ka nga mu ama be, ada eri nga ovu ’dini, ka tro nga ovu e’yo onyiru ngonini ti Yehovani ngale ’yele ama vuri, ama nga ’ye mi vu trotro,

³³Yi nga di dri ko engazu oni Yehovaniria, acizu o’du pale na; sanduku aziza Yehovanirini ce dri yi drilea acizu o’du pale na, pari ava lizuri ndazu yi dri.

³⁴Iriti Yehovani ovu yi ma dria etusi, yini dri koria pari yini hema asozuriasi.

³⁵Eri nga di ovu ’dini, sandukuni dri koria acizu drileria, Musa nga ’yo, Mi nga uru, Yehova la! Mi fe ari’ba mini ma ere yi ra; mi fe ’ba mi ngupi onzi ’diyi ma apa mi driliasi fo!

³⁶Te sandukuni riria ava liria, eri kini, Yehova la, mi mvi ’ba alifu mudri ’ba Israelini alifu alifu ’diyi vu.