Read lugbara Kalafe 12 Bible Online

Kalafe 12 - lugbara bible

Kalafe 12

¹Miriamu pi Aroni be nga e’yo ’yo Musa ma ruaa, oku Kusi zaru erini bile i ma okururi ma e’yosi, te eri bi oku Kusiouru ’bo;

²yi ’yo ra, Yehova ’yo kiri Musa be a’dule ya? ’yoni e’yo ama be indi ku ya? Yehova nga e’yo ’diri eri ra.

³Isu de agu Musaru ’diri eri ’ba e’yereni tu, aga ’ba ovupi angu wudrikurua ’diyi dria ra.

⁴Yehova nga e’yo ’yo rugbu Musa pi ma ria, Aroni pie, Miriamu pie, kini, Emi na ma fu mu hema ti ecizaniria. Yi na tro nga di efura.

⁵Yehova nga esi va iriti pa sopi piriruri ma alia, nga pa so hema ma tilia, nga Aroni pi omve Miriamu be; yi iritro nga efu ra.

⁶Eri ’yo ra, Emi eri nga e’yo mani ’yoleri: Nabi ka ovu indi emi eseiia, ma’i Yehova, ma nga fe eri ma ni ma afa ndrezasi, ma nga e’yo ’yo eri be orobisi, ma’i.

⁷Te ati’bo mani Musa ovuni ’dini ku; eri ovu asi adaru be jo mani ma alia dria.

⁸Ma nga e’yo ’yo eri be tilesi tilesi mgboru, e’yo eti vale ku ’diyisi ku, eri nga Yehova ma wura ndre ra; emi ovuni di urisi e’yo onzi ’diyi ma nyadri, ’yozu ati’bo mani Musa ma ruaa ku a’disi ya?

⁹Adra Yehovani nga di tu yi ma ruaa, eri mu ra.

¹⁰Iriti nga di hema ma driliarisi, te mi ndre, ofu nya Miriamuni forotoru sile ’bo. Aroni nga eri rua lu, te mi ndre, ofu nya eri ra.

¹¹Aroni nga ’yo Musa ma tia, Opi mani la! ma matu ’ba mi vu, mi ’ba e’yo onzi ’diri ama dria amani e’yo ’yele ondua kokorurisi, azini amani e’yo ezale rarisi ku fo!

¹²Ma matu ’ba mi vu, eri ma ovu ekile mva drapi ’bo, za ruaniarini i trule mazaru erini efuria andri ma opoloarile ku.

¹³Musa nga di wu Yehova vu, kini, Mungu la! ma zi mi tia, mi ati eri ma rua fo!

¹⁴Yehova nga ’yo Musa tia, Eri ma ati ka ndra cucu wu eri milia, eri ngani ndra ovu drini zasi o’du aziri ku ya? ’Ba ma oga eri pari ’bani hema asozuri ma tia amve o’du aziri, vutinia yi nga eri ofi ndo,

¹⁵Yi oga di Miriamuni pari ’bani hema asozuri ma tia amve o’du pale aziri ra; ’ba ongulumuru acini ku de nga ofini Miriamuni dika ku.

¹⁶Vutinia ’ba nga dri ko Hazerotia acizu drile, yi nga hema aso roko Paraniaria.