Read lugbara Kalafe 13 Bible Online

Kalafe 13 - lugbara bible

Kalafe 13

¹Yehova nga ’yo Musa tia kini,

²Mi pe ’ba ti muzu angu Kanani mani fele anzi Israelini driri ma orile gazu; suru yi ma a’bipini vusi dria emi pe ’ba ma ti alu alu, ’ba nde alu alu ma ovu ’ba opiru yi ma eselia.

³Musa pe di yi ma ti, engazu roko Paraniariasi, Yehovani e’yoni azilerile, yi dria yi ’ba anzi Israelini ma drilia ’diyi.

⁴Yi ma ru ’di: Suru Rubenini ma eselia, Samua Zakuri mvi’i;

⁵suru Simeonini ma eselia, Safati Hori mvi’i;

⁶suru Yudani ma eselia, Kalebu Yefune mvi’i;

⁷suru Isakarini ma eselia, Igali Yusufu mvi’i;

⁸suru Efiraimuni ma eselia, Hosea Nuni mvi’i;

⁹suru Benyaminini ma eselia, Paliti Rafu mvi’i;

¹⁰suru Zebulunini ma eselia, Gadieli Sodi mvi’i;

¹¹suru Yusufuni, efini suru Manaseni ma eselia, Gadi Susi mvi’i;

¹²suru Danini ma eselia, Amieli Gemali mvi’i;

¹³suru Aserini ma eselia, Seturi Mikaeli mvi’i;

¹⁴suru Nafutalini ma eselia, Nabi Vofisi mvi’i;

¹⁵suru Gadini ma eselia, Geueli Maki mvi’i.

¹⁶’Diyi ru ’ba Musani ti pele angu ma orile gazu ’diyini. Te Musa nga Hosea Nuni mvi ma ru ’cia Yosua’i.

¹⁷Musa nga di yi ma ti pe angu Kananini ma orile gazu, eri ’yo yi ria, Emi tu ’disi geri uruleruria, emi tu angu oni driaria,

¹⁸emi ndre angu ovu ngoniru, ’ba ovupi alenia I’diyi be, kani yi okporu, kani yi Okpo kokoru, kani yi were, kani yi kakau yani,

¹⁹azini angu yini ovuzu aleniari eri ngonile ya, kani eri onyiru kani onzi ya, azini aku yini ovuzu yi ma alia ’diyi ovu ngonile, ’ba nde adri ovu hema ma alia, kani laku kali okporu be ’diyi ma alia ya,

²⁰te angu ovu ngonile, eri osoru kani a’wiru, pati alenia indi kani yo ya. Te emi ma ovu asi agupinisi, emi cii efi kapi angu nderi ma alia ’diyi ma azi indio Te eri ewu zabibu efini e’dozu nizu iniruri’i.

²¹Ka’dini yi tu ra, ga angu ma lorile engazu roko Ziniaria kpere Rehobua, kpere pari ’bani fizu Hamatiaria.

²²Yi tu geri uruleruria ca Hebironia; isu de Anaki anzipi, Ahimani pi, Sesai pie, Talimai pie, yi ’dale indio (Te yi si ’Hebironi eli aziri de nga sini Zoani Misiriari ku.)

²³Yi ca e’bu Esikoliaria, nga arakala zabibu efi kapi ngulungulu ’diyi beri ga va, ’ba iri ’i eri pati ruaa yi ma eselia ejizu; yi nga pati pomegranate ma efi eji indi, elio efi be.

²⁴’Da pari nde ma ru E’bu Esikoliari’i, efi kapi ngulungulu anzi Israelini gale ’dale ’diyi ma e’yosi.

²⁵Yi ka angu ma orile ga ’bo, yi ’nga emvi o’du kali su ma vutia ndo.

²⁶Yi emu eca Musa pi vu Aroni pie, ’ba Israelini ongulumuru ’diyi pie dria roko Paraniaria Kadesia, yi nga e’yoni omvi yi tia, ’ba ongulumuru be dria, nga vini efi kapi angu ndea ’diyi ece yi dri.

²⁷Yi ’yo eri tia kini, Ama ca angu ndra mini ama ti pezuria ’bo, ada eri angu lesu pini razu alenia anyuoso beri’i; efi kapi aleniari ’do.

²⁸Te ti, ’ba ovupi angu nde ma alia ’diyi yi okporu, aku yini yi abi kaliru be amboru tu; azini vini ama ndre Anaki anzipi ’dale indio

²⁹’Ba Amalekini ’diyi ovu angu uruleruria; ’ba Hitini piyi, ’ba Yebusini pie, ’ba Amorini pie, ovu angu oni driaria; ’ba Kananini ovu miri tialero, azini Yoridani ma tialeru indio

³⁰Te Kalebu fe ’bani adrizu ciri Musa ma drilia, eri ’yo ra, Ama ma tu coti angu nde pazu amaniru, amani ecole eri ndele ewa kokorurisi.

³¹Te ’ba tupi eri be ’diyi nga ’yo kini, Ama econi tuzaru a’di ’dizu ’ba ’diyi be ku, yini ama agale okposi rarisi,

³²Yi nga vini angu yini orileni galeri ma e’yo eku onzi Israelini anzipi ma tia, kini, Angu nde amani agale alenia orileni gazuri eri angu ’ba alenia ’diyi ma dri japiri’i; azini ’ba dria amani ndrele ’dayi yi ’ba izutiliru ’diyi.

³³Ama ndre ’ba Nefilini Anaki anzipi ovupi ’ba Nefilini ma oriru ’diyi ’dale; ama ovu ani ama ngulupi ma milia ekile kulule, ama ovu vini ’dinile yi ma milia indi.