Read lugbara Kalafe 18 Bible Online

Kalafe 18 - lugbara bible

Kalafe 18

¹Yehova nga ’yo Aroni ma tia kini, Mi’i mi anzipi pie, mi a’bipi ma suruti pie tualu, ma ’du e’yo onzi pari alatararurini; mi’i mi anzipi be ma ’du vini e’yo emini ovuzu kuhaniruri ma e’yo onzi indio

²Mi ma fe mi adripi, suru Levini, suru mi a’bini ’diyi ma esi ogogo mi be, yi ma eci yi ti mi be tualu ani, ma nga azi mi dri beni, te mi’i mi anzipi be tualu ma ovu hema e’yo eti nzezaniri ma drilia.

³Yi nga azi nga mi dri, azi hemani dria ngazu; te yi ma esi afazu pari alatararuria ’diyi vu, kani pari edeta edezuri vu ogogo ku, yi kazu odrazu ku, yi’i azini emi’i.

⁴Yi ma eci yi mi be hema ti ecizaniri ma azi ngazu, azi hemaniri ma alia dria; te ani’bo ma esi mi vu ogogo ku.

⁵’Dini emi nga di pari alatararuri pi ma azi nga pari edeta edezuri be, adra kazu ovuzu anzi Israelini ma dria dika ku.

⁶Te mi ndre, ma o’du adripi emini ’ba Levini ’diyi anzi Israelini ma eseliasi, yi mi dri afa fezale fezaru Yehova dri, hema ti ecizaniri ma azi ngazu.

⁷Te mi’i, mi anzipi be tualu, mi mba e’yo emini ovuzu kuhaniruri ma ta e’yo dria pari edeta edezuria ’diyisi, azini afa ovupi bongo hema ma ale alizuri ma alialeru ’diyisi, emi nga azi nde nga emi’i; ma fe di e’yo kuhaniruri emi dri azi fele afa fezaleriru ’do, te ’ba ma fu ani’bo esipi ogogori kai ra.

⁸Yehova nga di ’yo Aroni ma tia, kini, Te ma’i, mi ndre, ma fe edeta ’dule uru ’diyi ma azi ngaza mi dri, ada afa alatararu Israeli anzipini diyi dria ra; ma fe yi mi dri mi anzipi be, esele ’dani ’dani ’bani fele emi dririru, odu osule emi driari ma e’yosi.

⁹Afa alatararu tu ’diyi ma eselia, esele e’dule aci ma aliasi eminiruri ’di; afa feza yini fele edetaru ’diyi pi dria, ada afa dria yini fele edeta edele anyafurasiriru ’diyi, edeta yini dria e’yo onzi edezu ’diyi pie, edeta yini dria e’yo ’ba ndepiri edezu ’diyi pie, yini fele ma dri ’diyi, nga ovu alatararu tu mi dri mi anzipi be.

¹⁰Mi ma nya eri ekile mini afa alatararu tu ’diyi nyalerile; ’ba agupiru ’diyi dria ma nya erini; eri ma ovu alatararu tu mi dri.

¹¹Afa ’dici eri mini indi: afa feza yini ma eselia edeta ’dule ururi, ada edeta anzi Israelinini fele oyale oyariru ’diyi dria; ma fe yi mi dri, mi anzipi pie, mi ezopi pie mi be tualu, esele ’dani ’dani ’bani fele eminiruri’i; ’ba dria mi vile joa ovupi alaru ’diyi nga yi nyani.

¹²Odu ma esele onyiru turi pi dria, zabibuefi ma su onyiru turi pie dria, anya pie, yi ma anyadri oko yini fele Yehova driri pie, ma fe yi mi dri ’bo.

¹³Afa dria ovupi angu yinia ’diyi ma efi kapi oko, yini ejile Yehova vu ’diyi nga ovu mini; ’ba dria mi vile joa ovupi alaru ’diyi nga yi nyani.

¹⁴Afa dria Israeli ma eselia ’bani ’bale ndu alatararu ’diyi nga ovu mini.

¹⁵Afa dria rua ari be opojo ma ti zipi, yini fele Yehova dri ’diyi, nga ovu mini, kani ’bani kani anyapani ti; te mi ma ece ku ’ba ma anzi otile oko ’diyi onzezu afa onzezasi,ma onze vini anyapa alatara kokoru ’diyi ma anzi otile oko ’diyi indio

¹⁶Te yi ka ca mba alu ’bo, mi ma onze yi ra, aje mini ngale lile yi onzezuri ma ovu sekeli towi, sekeli pari alatararuri vileri vusi, (afa nde eri trotro silingi geraru kali iri).

¹⁷Te mi ma onze kojamva okori pi ku, kabilomva okori pie, ndrimva okori pie; yi alatararu, mi ma oya ari yini pari edeta edezuri ma dria, ma eve yi ma oso edeta edele acisi afa aji be arikariru Yehova dririru.

¹⁸Te yi ma zani nga ovu mini, ekile agati oyale oyari pile o’du dri ndiriari be, yi nga ovu mini.

¹⁹Ma fe edeta alatararu anzi Israelini fele Yehova dri ’dule uru ’diyi mi dri, mi anzipi pie, mi ezopi pie mi be tualu esele ’dani ’dani fele eminiriru; eri e’yo aziza a’ini azile mi dri ori mi vutiari be ’dani ’daniri Yehova ma milia.

²⁰Yehova nga ’yo vini Aroni ma tia, kini, Mi ma ovu awuruso be angu yini ma alia ku, mi ma ovu vini esele mini be yi ma eselia ku. Ma’i ma esele miniru awuruso miru be, anzi Israelini ma eselia.

²¹Te mi ndre, ma fe afa dria ma esele mudri ma azi alu Israeli ma eselia anzi Levini dri ovuzu yi ma afaru ’bo, azi yini ngaleri ma oyaru, ada azi nde eri azi hema ti ecizaniri ma aliari’i.

²²Te engazu curu’do anzi Israelini ma esi hema ti ecizaniri vu ogogo ku, e’yo onzi kazu ovuzu yi ma dria ku, yi kazu odrazu ani ku.

²³Te ’ba Levini nga hema ti ecizaniri ma azi ngani, e’yo onzi yini nga ovu yi ma dria; eri ma ovu azitaru ’dani ’dani a’bianzi emini vusi dria; te yi ma ovu awuruso be anzi Israelini ma eselia ku.

²⁴A’disiku afa ma esele mudri ma azi alu anzi Israelinini fele edeta ’dule ururiru Yehova driri, ma fe ’ba Levini dri yi ma awurusoru ’bo; e’yo ’disi ma ’yo yi tia, kini, Yi ma ovu awuruso be anzi Israelini ma eselia ku.

²⁵Yehova nga di ’yo Musa ma tia, kini,

²⁶Mi ma olu vini ’ba Levini ma tia, ma ’yo yi tia, kini, Emi ka afa ma esele mudri ma azi aluni a’i anzi Israelini dri mani fele emi dri engazu yi vu, ovuzu emi ma awurusoruri, ka’dini emi ma fe afa nde ma azi edeta ’dule ururiru Yehova dri, eri afa esele mudri ma azi aluri ma esele mudri ma azi aluri’i.

²⁷Yi nga edeta emini ’dule ururi ma e’yo la emi dri ekile anya akuma driarile, azini ekile patiefi ma su gapi pari ’bani zabibuefi su nzizuriarile.

²⁸’Dini emi ma ede vini afa dria ma esele mudri ma azi alu emini a’ile anzi Israelini driri ma azi edeta ’dule ururiru Yehova dri; azini engazu afa ’diyi ma alia emi ma fe edeta ’dule uru Yehova driri kuhani Aroni dri.

²⁹Afa feza emini a’ile ’diyi ma eselia dria emi ma fe edeta ’dule uru Yehova dri ’diyi dria ra, emi ma fe esele yini onyiru turi’i, ada esele yini alatararuri’i.

³⁰E’yo ’disi mi ma ’yo yi tia, Emi ka eseleni onyiru turi ’du uru, yi nga di eri la ’ba Levini dri ekile anya gapi tre akuma driarile, azini ekile patiefi ma su gapi tre pari zabibu su nzizuriarile.

³¹Emi eco eri nyazaru pari dri dria, emi’i ’ba emi vile joa ’diyi be, eri ova emini azi emini ngale hema ti ecizamami.

³²Emi ngani ovu e’yo onzi be emi dria, emini eri nyalerisi ku, emini esele erini onyiru turi ’dule uru oko rakarisi. Te emi ma eza afa alatararu anzi Israelini ’diyini ku, emi kazu odrazu ku.