Read lugbara Kalafe 20 Bible Online

Kalafe 20 - lugbara bible

Kalafe 20

¹Anzi Israelini, ada ’ba ongulumuru ’diyi dria, nga eca roko Ziniaria mba alurisi, ’ba nde yi nga ri Kadesia; Miriamu nga dra ’daa, nga vini eri sa ’daa indio

²Te yi mvuza ’ba ongulumuru dri yo; yi nga di yi oku Musa pi ma dri aruzu Aroni be.

³’Ba ongulumuru nga di agata ga Musa be, nga ’yo kini, Ama ka ndra odra o’du ama adripini odrazu Yehova ma miliarisi ’yeke fo!

⁴Emi eji ’ba ongulumuru Yehovani roko dria ’doa, amani ani odrazu ’doa anyapa amani pie a’disi ya?

⁵Emi ofu ama Misiriasi ama ejizu pari onzikanyaru ’doria a’di e’yosi ya? ’Dori ovuni pari afa orirurini ovuzu alenia, elio pie, zabibu pie, patiefi pomegranate pieri ku; azini vini yi mvuza ’doa yo.

⁶Musa pi nga di fu Aroni be ’ba ongulumuru ma milia kpere hema ti ecizaniri ma tilia, yi nga yi eco o’bukuru va, te diza Yehovaninga i e’da yi vu.

⁷Yehova nga ’yo Musa tia kini,

⁸Mi ma ’du kali, mi’i mi adri Aroni be, emi ma oku ’ba ongulumuru, emi ma ’yo yi ma milia oni kataru ma tia ma fe i ma yini egbizu; mi nga di fe yi ma era yi dri oni kataruri ma aliasi, emini ngazu ani yi mvuza fezu ’ba ongulumuru pi dri anyapa yini be.

⁹Musa nga di kali e’du Yehova ma driliarisi, ekile erini azile eri ma tiarile.

¹⁰Musa pi Aroni be nga ’ba ongulumuru oku tualu oni kataruri ma drilia, eri nga di ’yo yi tia, Emi eri e’yo, emi ’ba mbupi amve ’diyi la; ama ma fe yini erazu emi dri oni kataru ’dorima aliasi ya?

¹¹Musa nga i dri eju, nga oni co i ma kalisi pale iri; yi nga di egbi tule, ’ba ongulumuru nga dimvu, anyapa yini be ani.

¹²Yehova nga ’yo Musa pi ma tia Aroni be, Emini ma a’ile emini ani ma ’bazu alatararu anzi Israelini ma milia kurisi, e’yo ’disi emi ngani ’ba ongulumuru ’diyi eji angu mani fele yi dri ’bori ma alia ku.

¹³’Di yi Meriba’i, a’disiku anzi Israelinini agata gale Yehova be erini i ma ngulupi ’bazu alatararu yi ma eseliarisi.

¹⁴Musa nga ojio ma ti pe engazu Kadesia muzu opi Edomuari vu, kini, Mi adri Israeli ’yo ’dini, Mi ni ocoko ecapi ama ruaari dria ra:

¹⁵e’yo ama a’bipini ndra sizu Misiriari pi, e’yo amani ovuzu Misiria ewu izururi pie; te ’ba Misiria ’diyi ’ye ndra ama onzi ama a’bipi be;

¹⁶te amani ndra wuria Yehova vu, eri eri o’duko amani ra, nga malaika ma ti pe ama ofuzu Misiriasi ra, te mi ndre, ama curu’do Kadesi aku angu mini ma kalatini asizuriaria;

¹⁷mi ku ama aga angu mini ma alesi, ma zi mi tia. Ama ngani aga amvu ma alesi ku, kani amvu zabibuni ma eselesi ku indi, ama ngani yi a’di gale ga ’diyi mvu ku; ama nga aci gboko epiniria, ama ngani ama oja kalaa, kani dri ndialeru kani dri ejialeru ku, de nga ama deni agazu angu mini ma kalatiasi ku.

¹⁸Te Edomu ’yo eri tia, Mi ma aga angu mani ma aliasi ku, ma kazu efuzu sei be mi fuzu ku.

¹⁹Anzi Israelini nga ’yo eri tia, Ama nga aci gbokosi; ama ka yi mini mvu, ma’i, kani anyapa mani, ka’dini ma nga yi nderi ma aje ofe ra; te kiri mi fe ma ma aga pasi, ama ngani e’yo azini ’ye ku fo!

²⁰Te eri ’yo eri tia, Mi ngani aga angu maniasi ku. Edomu nga di efu ’ba be kakau, azini dri okporu be, a’di ’dizu eri be.

²¹’Dini Edomu ga pari fezu Israeli dri agazu angu erini ma eseliasi si; e’yo ’disi Israeli nga yi ona erisi.

²²Yi nga di dri ko Kadesiasi acizu drile; anzi Israelini, ada ’ba ongulumuru dria nga eca oni Horia.

²³Yehova nga ’yo Musa pi ma tia Aroni be oni Hori angu Edomuni ma kalatiaria, kini,

²⁴Aroni nga mu ’ba ini odrapi ’bo ’diyi vu, a’disiku eri ngani fi angu mani fele anzi Israelini dri ’boria ku, emini e’yo mani gale yi Meribaaria sirisi.

²⁵Mi ’du Aroni pi mvi Eleazari be, mi ji yi oni Hori ma dria.

²⁶Mi otru bongo Aroni ma ruaarisi ra, mi osu ani mvi Eleazarini; Aronini nga dra ’dale, nga mu ’ba ini odrapi ’bo ’diyi vu.

²⁷Musa nga ’ye ekile Yehovani azilerile; yi nga tu oni Hori ma dria ’ba ongulumuru ma milia dria.

²⁸Musa nga di bongo otru Aroni ma ruaarisi, nga ani mvi Eleazarini osu ra; Aroni nga di dra oni ma dri mbiliaria. Te Musa pi nga esi oni ma driarisi va Eleazari be.

²⁹’Ba ongulumuru dria ka ndre Aroni dra ’bo, yi nga Aronini owu o’du kali na, ada suru Israelini dria owu erini.