Read lugbara Kalafe 22 Bible Online

Kalafe 22 - lugbara bible

Kalafe 22

¹Anzi Israelini nga dri ko acizu, nga hema aso angu senderu Moabua Yoridani ma tia ’aa ’dasi Yerikoaria.

²Te Balaki Ziporimvi ndre e’yo dria Israelini ’yele ’ba Amorini vuri ra.

³Moabu ’ye ani ’ba ndesi urisi tu, yini ovule kakaurisi; Moabu ma asi oti tu anzi Israelini ma e’yosi.

⁴Moabu nga di ’yo ’ba ’wara Midianini ’diyi ma tia, kini, ’Ba ongulumuru ’diyi nga curu’do afa dria ovupi ama ageia ’diyi onya, tini iribi nyamukoari nyalerile ada ada. Isu de Balaki Zipori mvi ovu opiru Moabu ma drilia ewu ’dasi.

⁵Eri nga di ojio ma ti pe Balamu Beori mvi vu, Petori ovupi yi raza ma tiaria, kpere ’ba erini ’diyi ma anzi ma angua, eri omvezu kini, Mi ndre, suru azini efu Misiriasi, te mi ndre, yi a’bu angu wudrikuru ma mile ci, yi ri otizaru ma be, ma drilialeru.

⁶E’yo ’disi mi ma emu, ma zi mi tia, ’ba ’diyi otrizu ma dri, yini ma ndele okposi rarisi; kani ma nga yi aga ra yani, ama ma ofu yi ani yi odrozu ma vile anguasi ra beni; a’disiku ma ni ra, ’ba mini asi ndriza fezu driniari eri adri ovu asi ndriza be, te ’ba mini trileri eri adri ovu trizaru.

⁷’Ba ’wara Moabuni ’diyi pi ’ba ’wara Midianini ’diyi be mu ra, de andeso andri ndrizuri yi ma dria ci; yi nga ca Balamu vu, nga e’yo Balakini ’yoleri olu eri tia ra.

⁸Eri nga ’yo yi tia, Emi ma la ’dia ini ’dosi, ma nga e’yo omvi emi tia, ekile Yehovani ngale ’yole ma tiarile ndo; ’ba opiru Moabu ma drilia ’diyi nga di te Balamu be ani.

⁹Mungu nga eca Balamu vu, nga ’yo ra, ’Ba ovupi mi vile joa ’diyi yi a’dipi ya?

¹⁰Balamu nga ’yo Mungu tia, Balaki Zipori mvi opi Moabu ma driliari pe ’ba ma ti ma vu, kini,

¹¹Mi ndre, suru efupi Misiriari a’bu angu wudrikuru ma mile ci; te di mi emu, mi otri yi ma dri, kani ma ngaecoa’di ’dizu yi be yi odrozu yani.

¹²Te Mungu ’yo Balamu ma tia, Mi ma mu yi be ku, mi ma otri ’ba ’diyi ku, a’disiku yi isu asi ndriza ’bo.

¹³O’bitisi Balamu nga enga, nga ’yo ’ba opiru Moabu ma drilia ’diyi ma tia, Emi ma mvi emi vile angua. Yehova ga si, a’ini mani muzu emi be ku.

¹⁴’Ba opiru Moabu ma drilia ’diyi nga enga ra, nga mu Balaki vu, nga ’yo kini, Balamu ga emuko ama be si.

¹⁵Balaki nga di ’ba opiru ma ti pe dika, ’ba oko ’diyi agapi o’bisi azini inzitasi ra ’diyi.

¹⁶Yi nga ca Balamu vu, nga ’yo eri tia, Balaki Zipori mvi kini, Ma zi mi tia, e’yo azini aluni ma oga mi emuko ma vu si ku fo!

¹⁷Te ma nga mi idri drile inzita isuzu amboru tu, azini ma nga e’yo dria mini ’yole ma tiari ’ye; ka’dini mi emu di, m zi mi tia, mi otri ’ba ’diyi ma dri fo!

¹⁸Te Balamu nga e’yo omvi, nga ’yo ati’ba Balakini ma tia, kini, Balaki ka te tro i ma jo gapi dahabu pisi mele be treri fe ma dri’i ti, ma econi agazaru Yehova Mungu maniri ma e’yo drisi ku, e’yo nde omvizu were, kani erezu ku.

¹⁹E’yo ’disi ma zi emi tia, emi indi ma la ’dia ini ’dosi, ma ma ni vini e’yo azini Yehovani ngale ’yole ma beri beni.

²⁰Mungu nga eca Balamu vu inisi, nga ’yo eri tia, ’Ba nde ka emu mi omveni, mi enga muzu yi be, te ti, mi ma ’ye kiri e’yo mani ’yole mi tiari’i.

²¹Te Balamu nga enga o’bitisi,i nga enyi ’bani rizu driniari ’ba akanya ini ma dria, nga mu ’ba opiru Moabu ma drilia ’diyi be.

²²Te Mungu ovu ani adrasi erini mulerisi;malaika Yehovani nga pa so eri dri geria ci, eri ma dri aruzu. Isu de eri tu akanya dria, azini ati’ba erini iri ’diyi aci eri be.

²³Akanya nga ani malaika Yehovani ndre erini pa soria geria, sei erini enzele okporoasiri be dria; akanya nga ani i oja kalaa geri kuzu fizu amvua; Balamu nga di akanya co, tini ojazu vile fizu geria dika,

²⁴Vutinia malaika Yehovani nga pa so geri izinaru amvu zabibuni pi ma eseliaria, de kali indi kala azia ci, kala azia ci.

²⁵Te akanya ka malaika Yehovani ndre ra, eri nga di i ji ekpa abi kaliru ma ruaa, nga fe Balamu ma pani i truzu abi kaliru ma ruaa; eri nga ani eri co dika.

²⁶Malaika Yehovani nga mu drile, nga pa so geri iziaru pari aguni ecozu i ojazu dri ndirialeru kani dri ejirialeru kuria.

²⁷Akanya nga malaika Yehovani ndre ra, nga i la Balamu be pi va; aoko nga di Balamauni nya ani, eri nga di akanya co i ma lotesi.

²⁸Yehova nga fe akanyani e’yo ’yozu, eri nga ’yo ani Balamu ma tia, Ma ’ye mini a’dini ka, mini ani ma cozu pale na ’doniri ya?

²⁹Balamu nga di ’yo akanya tia, Mini ma edele ederisi, sei ka te ovu ma dria ci, te’do ma fu mi ’bo.

³⁰Akanya nga ’yo Balamu ma tia, Ma ovuni akanya mini, mini otuzu drinia ewu mini ovuzu idriruri ma alia cazu kpere andruri’i ku ya? Ma ndra adri mi ’ye, ’dinile drio ra ya? Eri nga e’yo omvi, Mi adrini ndra ’ye ’dini ku.

³¹Yehova nga di Balamu ma mile zi ra, eri nga ani malaika Yehovani ndre pa soria geria, sei erini nzele okporoasiri be dria, eri nga di i dri elu, i ecozu o’bukuru va.

³²Malaika Yehovani ’yo eri tia, Mi co akanya mini pale na ’dini a’disi ya? Mi ndre, ma efu mi dri aruzu, geri minini ovule onzikanyaru ma miliarisi.

³³Te akanya ndre ma ra, nga ani i oja kalaa ma drilia pale na ’di; ka te i oja kalaa ku, te’do ma fu mi ’bo eri kuzu idriru’i.

³⁴Balamu nga ’yo malaika ma tia, Ma eza ra; a’disiku mani nile mi so pa geria ma ogazu kurisi. E’yo ’disi, e’yo ’diri ka mi dri ayiko fe ku, ma nga ani dri atri vile.

³⁵Te malaika Yehovani nga ’yo Balamu ma tia, Muzaruni mi mu ’ba ’diyi be yi; te mi ma ’yo e’yo mani ngale ’yole mi tiari kiri’i. ’Dini Balamu nga mu ’ba opiru Balakini ’diyi be.

³⁶Balaki ka eri Balamu eca ’bo, eri fu dri fuzu eri be aku Moabuni ovupi Arinoni ma kalatiaria, adani kpere angu nde ma kalatini asizuria.

³⁷Balaki nga ’yo Balamuma tia, Ma peni ’ba ti mi omvezu asi driasi ku ya? Mi emuni ndra ma vu ku a’disi ya? Ma econi mi idrizu inzita isuzu adadaru ku ya?

³⁸Balamu nga ’yo Balaki ma tia, Mi ndre, ma ca mi vu ’bo ’do, te ma curu’do okpo be e’yo azini ’yozu ma’i ra ya? Ma nga e’yo Munguni ’bale ma tilianiri ’yo’i.

³⁹Balamu pi mu Balaki be, yi nga ca Kiriati-huzotia.

⁴⁰Balaki nga ti pi ede edetaru kabilo pie, tini pezu Balamu pi vu ’ba opiru ovupi eri be ’diyi pie.

⁴¹Te eri nga eca ’dini, o’bitisi Balaki nga Balamuni ’du ji otuzu pari uruleru Baalini ’diyi ma dria, ’daarisi eri nga suru ndre kpere yi ma kalatini asizuria.