Read lugbara Kalafe 24 Bible Online

Kalafe 24 - lugbara bible

Kalafe 24

¹Balamu ka ndre Yehova le asi ndriza fe Israeli dri ra, eri muni ekile ndra okorile andri ndrizasi ku, te eri ’ba i mile angu roko driari vuleru.

²Balamu nga i mile enga uru, nga Israeli ndre yini riria suru yini vusi suru yini vusi; Orindi Munguni nga di eca eri ma dria.

³Eri nga e’yo olu e’yo o’bezasi, kini, Balamu Beori mvi ’yo ra, agu milenini i zizuri kini,

⁴’ba e’yo Munguni ’yoleri eripi, afa ndreza Mungu Okpoe’ini ndrepiri ’yo ra, erini i ecoria va, de milenini i ziria mgboru ’dani, kini:

⁵Yakobo la, hema mini yi onyiru tu ’doni ya! Israeli la, bere mini yi onyiru tu ’doni ya

⁶Yi aja yi ekile e’buti ’diyile walaru, ekile amvu yi tia ’diyile, ekile pati arikariru Yehovani isile ’diyile, ekile mario yi tia ’diyile.

⁷Yini nga ra yile mvu erini ’diyi ma aliasi, ori eriniri nga ovu yi kakau ma alia, opi eriniri nga ovu uru aga Agagini ra, opi nyaza erini nga ovu inzizaru uru.

⁸Mungu ofu eri Misiriasini; eri ovu okpo be ekile odru ma okpole, eri nga suru eri ma ari’baru ’diyi oki ra, eri nga yi ma fala onyo nyingiriki, eri nga yi ogbi lekeke lekeke ’ye ini ’diyisi.

⁹Eri avu va, la i va kamile, ekile kamiandrile, a’dini nga eri enga uruni ya? ’Ba dria asi ndriza fepi mi driri ovu asi ndriza be, ’ba dria mi tripiri ovu trizaru.

¹⁰Balaki nga di ovu adrasi Balamu be, eri nga i dri sa sa; Balaki nga ’yo Baramu ma tia, Ma omve mi ari’ba mani otrizu, te mi ndre, mi fe yi dri asi ndriza teketeke pale na ’di.

¹¹Te curu’do mi ma apa mi paria vile; ma ega te ma nga mi idri inzita isuzu amboru tu, te mi ndre, Yehova oga mi inzita isuko si.

¹²Balamu nga di ’yo Balaki ma tia, Ma ’yoni vini ndra ojio mini, mini ti pele ma vu ’diyi ma tia, kini,

¹³Balaki ka te tro i ma jo gapi dahabu pisi mele be treri fe’i ti, ma econi agazaru e’yo Yehovani ’yoleri drisi ku, mani ani e’yo onyiru kani e’yo onzi ’yezu ma drisi, te e’yo Yehovani ’yoleri ma nga ’yo’i’diniri ku ya?

¹⁴Curu’do ma di mvi ’ba mani vu mvi mvi; te di, ma nga e’yo suru ’dorini ngale ’yele suru mini vu ewu vilerisiri olu mi tia ra.

¹⁵Eri nga e’yo olu e’yo o’bezasi kini, Balamu Beori mvi ’yo ra, agu milenini i zizuri kini,

¹⁶’ba e’yo Munguni ’yoleri eripi, Mungu Uru Turi ma nita nipi, afa ndreza Okpoe’ini ndrepiri ’yo ra, erini i ecoria va, de milenini i ziria mgboru ’dani, kini:

¹⁷Ma eri ndre ra, te curu’do ku; ma eri lu ra, te ogogo ku: ’bi’bioni nga efu Yakobo ma aliasi, kali opiniri nga enga Israeli ma alia, ngapi Moabu ma kalati copi co, ngapi anzi iyikiyi zopi ’diyi onyopi vari’i.

¹⁸Edomuni nga ovu afa yini pule yi ma afaruri, Seiri ndra eri ma ari’baru ’diyi nga vini ovu afa yini pale yi ma afaruri, de Israelini e’yo ’yeria asi agupisiria.

¹⁹’Ba efupi Yakobo ma aliari nga opi nyani, nga ’ba joloko acepi akua ’diyi dri ja ra!

²⁰Eri nga di lu ’ba Amalekini vu, nga e’yo olu e’yo o’bezasi kini, Amalekini ndra suru ’diyi ma okoruri’i, te asiza erini vileri nga ca dri jazaru.

²¹Eri nga lu ’ba Kenini vu, nga olu e’yo o’bezasi kini, Pari mini ovuzuri ovu okporu, mi ’ba jorovu mini oni eselia ’bo;

²²te ti, yi nga Kainini eza ra, cazu kpere Asurini ngazu mi jizu ati’boruria.

²³Eri nga e’yo olu e’yo o’bezasi kini, Eyawaye! a’dini nga ovu idriru Munguni ngaria e’yo ’diri ’yeria ya?

²⁴Te oguru yi nga emu yikuti Kitimuariasi, yi nga Asurini inza, azini yi nga Eberini inza; eri nga vini dri ja indio

²⁵Balamu nga di nga ra, nga dri ko mvizu i vile angua; Balaki nga vini alu mvi i ma gerisi indi.