Read lugbara Kalafe 25 Bible Online

Kalafe 25 - lugbara bible

Kalafe 25

¹Te Israelini ovuria Sitimua, ’ba yi e’do ali o’bazu Moabu ezopi be.

²A’disiku yi omve ’ba ma emu edeta yinia, yini edele adrou yini dri ’diyi; ’ba yi nga ani nyaka nya, nga avu va adrou yini inzizu.

³Israeli nga ani yi eci Baali-peori be; adra Yehovani nga di ani Israeli ma ruaa.

⁴Yehova nga ’yo Musa ma tia, Mi o’du ’ba opiru ’ba drilia ’diyi dria, mi o’i yi uru Yehova dri etu milia, adra okporu Yehovani ma oja i ani Israeli vurisi ra.

⁵Musa nga ’yo ’ba e’yo lipi Israelini ’diyi ma tia, Emi alu alu ma ofu ’ba emini yi ecipi Baali-peori be ’diyi.

⁶Te mi ndre, ’ba azini alu anzi Israelini ma eseliari nga emu oku Midiani ezoruri ejizu i adripiyi vu, Musa ma milia azini anzi Israelini ongulumuru ’diyi ma milia dria, yini de awu wuria mindresi hema ti ’ecizaniri ma tilia.

⁷Te kuhani Aroni mvi Eleazari ma mvi Finehasi ka e’yo ’diri ndre ra, eri enga ’ba ongulumuru ma eseliasi, aju ’duzu i ma dria,

⁸nga agu Israelini ’dari ma vuti bi fizu kpere jo aliza ma alia, nga yi so iri tro agupi Israeliruri pi oku nderi be ajusi, gazu kpere oku ma alia lekeke. ’Dini azo muaru nga lani i de anzi Israelini ma eseliasi ra.

⁹Te ’ba odrapi muasi ’diyi ma kalafe ca alifu kali iri drini suo

¹⁰Yehova nga ’yo Musa ma tia kini,

¹¹Kuhani Aroni mvi Eleazari ma mvi Finehasi oja adra mani anzi Israelini ma ruaarisi ra, erini ovule a’yaru a’ya manisi yi ma eseliarisi, mani ani anzi Israelini ma dri jazu a’ya manisi ku beni.

¹²E’yo ’dirisi mi ma ’yo kini, Mi ndre, ma aziza ani asi anzuruniri fe eri dri ra;

¹³aziza nderi nga ovu eri dri ori eri ma vutia ’diyi be, aziza yini ngazu ovuzu kuhaniru ’dani ’daniri’i, erini ovule a’yaru Mungu ini ma e’yosi, erini vini anzi Israelini ma e’yo onzi edelerisi.

¹⁴Agu Israelini ovupi fuzaru, fule oku Midiani ezoruri beri ma ru Zimiri, Salu mvi’i, eri opiru ori’ba i ma a’bipini ma drilia ’ba Simeonini i ma eselia.

¹⁵Oku Midiani ezoru erini fuleri ma ru Kozibi Zuri zi’i; Zuri nde ovu opiru a’bipi azini ma ori’ba ma drilia Midiani ma eselia.

¹⁶Yehova nga ’yo Musa ma tia kini,

¹⁷Emi ma ecandi ’ba Midianini, emi ma ofu yi ra;

¹⁸a’disiku yini emi ecandile lokiri yinisi, yini ani emi icizu lokirisi e’yo Peorinisirisi, azini yi amvipi Kozibi opi Midiani ma driliari ma zi fule mua e’yo Peorinisiri ngarerisiri ma e’yosi.