Read lugbara Kalafe 27 Bible Online

Kalafe 27 - lugbara bible

Kalafe 27

¹Manase mvi Makiri ma mvi Gileadi ma mvi Heferi ma mvi Zelofehadi ma ezopi nga esi ogogo, yi ori’ba Yusufu mvi Manaseni ’diyi. Eri ma ezopi ma ru yi ’di: Mala pi, Noa pi, Hogila pi, Milika pi, Tiriza pie.

²Yi nga di pa oso Musa pi ma drilia kuhani Eleazari pie, ’ba ’wara pie, ’ba ongulumuru ’diyi pie dria, hema ti ecizaniri ma tilia, kini,

³Ama ati dra ndra angu roko driaria, te eri ovuni ’ba ongulumuru ndra yi okupi tualu a’di ’dizu Yehova ma ruaa, ’ba Korani okule ’diyi pie ’diyi ma azi ku, te eri dra e’yo onzi inisi; te agianzi erini yo.

⁴Yi nga ama ati ma ru nze ori’ba erini ma eseliasi erini ovule agimva kokorurisi ’dini a’disi ya? Mi fe angu ama dri awurusoru ama ati ma adripi ma eselia fo!

⁵Musa nga e’yo yini ji Yehova ma milia.

⁶Yehova nga di ’yo Musa ma ria kini,

⁷Zelofehadi ma ezopi ’yo ’yeke; mi ma fe angu yi dri ovuzu yi ma awurusoru yi ati ma adripi ma eselia ada, mi ma fe yi ati ma awuruso ma mvi ovu yiniru.

⁸Azini mi ma ’yo anzi Israelini ma ria kini, ’Ba azini ka dra agimva kokoru, mi ma fe awuruso erini ma mvi ovu eri ma ziniru.

⁹Te eri ma zamva ka ovu yo ka, mi nga di awuruso erini fe eri ma adripi dri.

¹⁰Eri ma adripi ka ovu yo, mi nga di eri ma awuruso fe ati ma adripi dri.

¹¹Te eri ma ati ma adripi ka ovu yo, mi nga di eri ma awuruso fe ’ba azini ori’ba erini ma eselia ovupi eri vu ogogo turi dri, eri nga awuruso nde nyani. E’yo nderi ma ovu anzi Israelini dri e’yo liza azitaruri, ekile Yehovani e’yo azile Musa ma tiarile,

¹²Yehova nga ’yo Musa ma tia, Mi tu oni Abarimuni ’diri ma dria, mi olu angu mani fele anzi Israelini dri ’bori.

¹³Mi ka nga eri olu ’bo, mi nga mu ’ba mini odrapi ’bo ’diyi vu, ekile mi adri Aronini mulerile;

¹⁴a’disiku emini e’yo mani gale roko Ziniaria sirisi, ewu ’ba ongulumuruni agata gazuria, emini lele ma ’bazu alatararu yia ’daa yima milia kurisi. (’Diri yi Meriba Kadesi roko Ziniariari’i.)

¹⁵Musa nga ’yo Yehova ma tia kini,

¹⁶Yehova Mungu ’ba rua ari be ’diyi ma orindini driari ma pe ’ba azini ovuzu ’ba ongulumure ma drilia fo!

¹⁷Eri ma fu ani yi drilia amve, erima efi yi ma drilia, eri ma ce yi dri fuzu amve, ma ce yi dri emvizu indi; ’ba ongulumuru Yehovani ma ovu kabilo ’ba yi ocepiri kokoru ’diyile ku beni.

¹⁸Yehova nga ’yo Musa ma ria kini, Mi ’du mini Yosua Nuni mvi, eri ’ba Orindini ovuzu eri ma aliari’i, mi ti mi dri drinia;

¹⁹mi ma ’ba eri kuhani Eleazari pi ma drilia ’ba ongulumuru dria ’diyi be, mi ma azi e’yo eri tia yi ma milia.

²⁰Mi ma fe okpo mini inzitaruri ma azi eri dri, anzi Israelini dria ma inzi ani eri beni.

²¹Eri ma so pa kuhani Eleazari ma drilia, te kuhani nde ma zi e’yo erini e’yo liza Urimunisi Yehova ma drilia; yi ma fu amve e’yo erini azilerisi, ma efi dika e’yo erini azilerisi indi, eri’i anzi Israelini be tualu, ada ’ba ongulumuru dria.

²²Musa ’ye Yehovani azile eri ma tiarile; eri ’du di Yosuani, ’bazu kuhani Eleazari pi ma drilia ’ba ongulumuru ’diyi be dria,

²³eri nga i dri ti eri ma dria, nga e’yo azi tinia ekile Yehovani ’yole geri Musa vurisirile.