Read lugbara Kalafe 28 Bible Online

Kalafe 28 - lugbara bible

Kalafe 28

¹Yehova nga e’yo ’yo Musa tia kini,

²Mi azi e’yo anzi Israelini ma tia, mi ’yo yi tia, Emi ma ’ba emi asi afa feza mani, nyaka mani, edele edetaru acisi ovuzu ma dri afa aji be atikatiruriru ’diyi fezu ma dri ewu yini vusi ewu yini vusi.

³Mi ma ’yo yi tia, Edeta edele acisi emini ngale fele Yehova driri ’di: Kabiloanzi agoru capi eli be alu alu nyibile kokoru ’diyi, iri iri etu vusi etu vusi, ovuzu edeta veza i depi kuriru.

⁴Mi ma fe kabilomva aluri edetaru o’bitisi, aziniri mi ma fe edetatu ondresi;

⁵azini anyafura inikiniru abaka aliari ma esele mudri ’diyi ma azi alu, osale odu odile odi otekua ma aliari ma esele awale su ’diyi ma azi aluri beri, edeta edele anyafurasiriru.

⁶Eri edeta veza i depi ku, azile oni Sinaiaria, ovuzu afa aji be atikatiru edeta edele acisi Yehova dririruri.

⁷Edeta erini afa mvuzasiri ma ovu otekua ma aliari ma esele awale su ’diyi ma azi alu kabilomva alurisi; mi ma osu edeta mvuzaru afa mvuza okarusi Yehova dri pari alatararuri ma alia.

⁸Mi ma fe kabilomva aziniri edetaru ondresi; mi ma ede eri ekile mini edeta edele anyafurasi fele o’bitisirile, azini ekile edeta erini afa mvuzasirile, edeta edele acisi, afa aji be arikariru Yehova dririru. Edeta edele sabato vusi azini mba vusi’diyi

⁹Sabatosi mi ma fe kabiloago capi eli be alu alu nyibile kokoru ’diyi iri edetaru, anyafura abaka ma alia inikiniruri ma esele mudri ’diyi ma azi iri osale odusiri pie, edeta erini afa mvuzasiri be:

¹⁰di edeta veza sabato vusiri’i, ovupi fezaru edeta veza i depi kuri pi be, tualu edeta erini afa mvuzasiri be.

¹¹Mba o’diru emini ’diyi vusi emi ma ede edeta vezaru Yehova dri: monio aluduru iri, kabiloago alu, kabiloanzi agoru capi eli be alu alu nyibile kokoru ’diyi aziri;

¹²ma fe vini anyafura inikiniru abaka aliari ma esele mudri ’diyi ma azi na osale odusiri edeta anyafurasiriru, monio aluduru alu alu vusi; azini anyafura inikiniruri ma esele mudri ’diyi ma azi iri osale odusiri edeta anyafurasiriru, kabiloago alu nderisi;

¹³azini anyafura inikiniru ma esele mudri ’diyi ma azi alu osale odusiri edeta anyafurasiriru, kabilomva alu alu vusi; edeta veza aji be arikariru ovupi edeta edele acisi Yehova dririru.

¹⁴Edeta yini afa mvuzasiri ma ovu patiefi ma su otekua ma aliari ma ali monio aluduru alurisi, patiefi ma su otekua ma aliari ma esele awale na ma azi alu kabiloago alurisi, azini patiefi ma su otekua ma aliari ma esele su ’diyi ma azi alu kabilomva alurisi: ’di edeta vezaru mba vusi mba vusi, mba dria eli alu ma alia ’diyi vusiri’i.

¹⁵Yi ma fe vini ndriago alu edeta e’yo onzi edezuriru Yehova dri; ma fe eri edetaru edeta veza i depi kuri pi be tuala edeta erini afa mvuzasiri be. Edeta fele omu o’duni pele pe ’diyisi ’diyi

¹⁶Mba okori ma mba o’du mudri drini surisi, eri agaza ’ba drilesi Yehovaniri’i.

¹⁷Omu ma ovu mba nde ma o’du mudri drini towirisi indi; yi ma nya mikate akufi kokoru o’du aziri.

¹⁸O’du okorisi okuza alatararuri ma ovu indi: emi ma ’ye azi okporuri aluni ku,

¹⁹te emi ma fe edeta edele acisi, edeta vezaruri Yehova dri: monio aluduru ’diyi iri, ndriago alu, kabiloanzi agoru aziri capi eli be alu alu ’diyi; yi ma ovu emi dri nyibileko kokoru;

²⁰emi ma fe vini edeta edele anyafurasi yini ’diyi indi, anyafura inikiniru osale odusiri’i; emi ma fe abaka ma esele mudri ’diyi ma azi na monio aluduru alu alu vusi, esele mudri ma azi iri kabiloago alurisi;

²¹emi ma fe vini esele mudri ’diyi ma azi alu, kabiloanzi aziri ’diyi ma alu alu vusi;

²²emi ma fe vini ndriago alu edeta e’yo onzi edezuriru, e’yo onzi emini edezu.

²³Emi ma fe afa ’diyi edetaru, edeta vezaru edele o’bitisi ovupi edeta veza i depi kuriruri be tualu.

²⁴Emi ma fe afa ’diyi edetaru etuzu o’du aziri dria ’dinile, edeta edele acisi ’diyi ma nyaka ovupi aji be arikariruri Yehova dri; emi ma fe eri edetaru edeta erini vezaru i depi kuri pi be tualu edeta erini afa mvuzasiri be.

²⁵O’du aziririsi emi ma ’ba okuza alatararuri; emi ma nga azi okporuri aluni ku.

²⁶Emi ma ’ba okuza alatararu indi o’du anyadri kapi okori fezurisi, o’du nde emini edeta edele anya o’dirusiri fezu Yehova dri, omu emini sabatoniri ma aliarisi; emi ma nga azi okporuri aluni ku,

²⁷te emi ma fe edeta vezaru afa aji be arikariruriru Yehova dri: monio aluduru ’diyi iri, kabiloago alu, kabiloanzi agoru capi eli be alu alu ’diyi aziri;

²⁸edeta yini anyafurasi ’diyi be, anyafura inikiniru osale odusi, abaka ma aliari ma esele mudri ’diyi ma azi na, monio aluduru alu alu vusi, esele mudri ma azi iri kabiloago alurisi,

²⁹esele mudri ma azi alu kabiloanzi aziri ’diyi ma alu alu vusi;

³⁰emi ma fe vini ndriago alu e’yo onzi emini edezu.

³¹Edeta veza i depi kuri pi be tualu edeta erini anyafurasiri be, emi ma fe afa nde ’diyi edetaru edeta yini afa mvuzasi ’diyi be; te yi ma ovu emi dri nyibile kokoru.