Read lugbara Kalafe 3 Bible Online

Kalafe 3 - lugbara bible

Kalafe 3

¹A’bianzi Aroni pini Musa be, o’du Yehovani e’yo ’yozu Musa be oni Sinai ma driarisi ’diyi yi ’di.

²Aroni anzipi ma ru yi ’di: Nadabu mva okori pi, Abihu pi, Eleazari pi’i Itamari pie.

³’Diyi Aroni anzipi ma ru, yi kuhani ’bani odu osule yi, ma dria erini ’bale ndu alatararu azi kuhaniruri ngazu ’diyi.

⁴Te Nadabu pi Abihu be odra Yehova ma drilia, o’du yini aci ndu Yehovani azile kuri ofezu edetaru Yehova ma drilia, angu roko dria Sinaiarisi; anzi yini yo. Eleazari pi Itamari be nga di azi kuhaniruri nga yi ati Aroni ma milia ani.

⁵Yehova nga di ’yo Musa ma tia, kini,

⁶Mi eji suru Levini ogogo, ma ’ba yi kuhani Aroni ma drilia, yi ma nga azi eri dri ani beni.

⁷Yi ma mba azi erini ma ta, yi ma mba azi ’ba ongulumuru ’diyi dri driari ma ta indi, hema ti ecizaniri ma i drilia, yini bere ma azi ngaria.

⁸Yi ma mba afazu hema ti eciza-niria ’diyi ma ta dria azi ngazu anzi Israelini dri, yini bere ma azi ngaria.

⁹Mi ma fe ’ba Levini Aroni pi dri anzipi be; fe yi pi eri dri anzi Israelini ma e’yosi.

¹⁰Mi ma ope Aroni pi ndu anzipi be, yi ma mbai e’yo yini ovuzu kuhaniruri ma ta; ma fu ’ba toko esipi ogogori kai ra.

¹¹Yehova nga di ’yo Musa ma, tia, kini,

¹²Te ma’i, mi ndre, ma ope ’ba Levini anzi Israelini ma eselia, aliriaanzi otile oko opojo ma ti zipi anzi Israelini ma eselia ’diyi ma paria; ’ba Levini nga ovu mani,

¹³A’disiku aliriaanzi otile oko ’diyi dria mani; o’du mani aliriaanzi angu Misirinia ’diyi ofuzu driarisi, ma ope ndra aliriaanzi otile oko Israeli ma alia ’diyi dria ndu maniru, ’ba pi ma anzi anyapa be dria; yi nga ovu mani: ma Yehova’i.

¹⁴Yehova nga ’yo Musa tia roko dria Sinaia, kini,

¹⁵Mi ma la anzi Levini ma kalafe, yi ma a’bipi ma suruti vusi, ori’ba yini vusi; mi ma la ’ba agupiru ’diyi ma kalafe dria e’dozu odekua capi mba be alurisi muzu drile.

¹⁶Musa nga di yi ma kalafe la e’yo ’yoza Yehovani vusi, ekile erini azile eri ma tiarile.

¹⁷Levi anzipi ma ru yi ’di: Gerisoni pi, Kohati pi, Merari pie.

¹⁸Gerisoni anzipi ori’ba yini vusi, yi ma ru ’di: Libini pi, Simei be.

¹⁹Kohati anzipi ori’ba yini vusi: Amuramu pi, Izihari pi, Hebironi pi, Uzieli pie.

²⁰Merari anzipi ori’ba yini vusi: Ma’i pi Musi be. ’Diyi ori’ba Levini yi ma a’bipi ma suruti vusi.

²¹’Ba Libini piyi ma ori’ba ’ba Simeini ’diyi be efu Gerisoni ma alia; Gerisoni ma ori’ba yi ’di.

²²’Ba yi ma eselia yini yi ma kalafe lale, ’ba agupiru ’diyi dria ma kalafe vusi, e’dozu odekua capi mba be alurisi muzu drile ’diyi, ada ’ba yi ma eselia yini yi ma kalafe lale ’diyi, yi alifu aziri drini turu towi.

²³Gerisoni ma ori’ba nga yi ma hema aso bere ma ngu kua etuni ’derialeru.

²⁴Opi ’ba Gerisonini ma a’bipi ma suruti driliari nga ovu Eliasafu Laeli mvi.

²⁵Gerisoni anzipi ma azi hema ti ecizaniri ma alia nga ovu bere pi ma agei tezu, Hema pie, enyi eri a’buzuri pie, bongo ’ile hema ti ecizaniri ma tiliari pie,

²⁶bongo o’ile irii ma ageia ’diyi pie, bongo ’ile irii ovupi bere ma ageia azini pari edeta edezuri ma ageia kururi ma tiliari pie, bakani eri vile azi ngazu ’diyi pie dria.

²⁷Ori’ba Amuramuni piyi efu Kohati ma alia, ori’ba Iziharini pie, ori’ba Hebironini pie, ori’ba Uzielini pie; ’diyi ori’ba Kohatini.

²⁸’Ba agupiru dria e’dozu odekua capi mba be alurisi muzu drile ’diyi ma kalafe vusi, yi alifu aro drini turu azia, azi pari alatararuari ma ta mbazu.

²⁹Kohati anzipi ma ori’ba nga hema yini aso bere ma kala uruleruria.

³⁰Opi ori’ba Kohatini ma eselia i a’bipi ma suruti driliari nga ovu Elizafani Uzieli mvi’i.

³¹Azi yini nga ovu sanduku pi ma agei tezu, mesa pie, tala pati pie, pari edeta edezu ’diyi pie, afazu yini azi ngazu pari alatararuria ’diyi pie, bongo o’ile ’diyi pie, azi erini be dria.

³²Eleazari kuhani Aroni mvi nga ovu opiru opianzi Levini ’diyi ma drilia, eri nga ’ba pari alatararuri ma azi ngapi ’diyi ma azi ndreni.

³³Ori’ba Malini piyi efu Merari ma alia ori’ba Musini be; ’diyi ori’ba Merarini.

³⁴’Ba yi ma eselia yini yi ma kalafe lale ’ba dria agupiru ’diyi ma kalafe vusi, e’dozu odekua capi mba be alurisi muzu drile ’diyi, yi alifu azia drini turu iri.

³⁵Opi ori’ba Merarini ma eselia i a’bipi ma suruti ma driliari eri Zurieli Abihaili mvi’i; yi nga yi ma hema aso bere ma kala andraleruria.

³⁶Azi pele Merari anzipi driri nga ovu bau bereni ’diyi pi ma agei tezu, bau rwe rwe ’diyi pie, pati erini edrele uru ’diyi pie, ’bileni pie, afazuni pie dria, aziniri be dria;

³⁷azini vini pati agoferu irii ageiniarini ’diyi pie, ’bileni pie, aloni pie, bakani pie.

³⁸’Ba hema asopi bere ma drilia etuni efurialeru hema ti ecizaniri ma drilia woko etuni efuzurialeruria ’diyi nga ovu Musa pi Aroni pie anzipi be, pari alatararuri ma azi ngazu, anzi Israelini ma azi ngazu indi; ma fu ’ba toko esipi ogogori kai ra.

³⁹’Ba Levini dria yini yi ma kalafe lale, Musa pini lale Aroni be azita Yehovanisi, ori’ba yini vusi, ’ba agupiru dria e’dozu odekua capi mba be alurisi muzu drile ’diyi, yi alifu kali iri drini iri.

⁴⁰Yehova nga ’yo Musa tia, Mi ma la aliriaanzi agupiru anzi Israelini ma eselia, e’dozu odekua capi mba be alurisi muzu drile ’diyi ma kalafe, mi la vini yi ru yini vusi.

⁴¹Te mi ma ope ’ba Levini maniru (ma Yehova’i) aliriaanzi dria anzi Israelini ma eselia ’diyi ma paria; azini mi ma ope ’ba Levini ma anyapa, anyapa dria otile oko anzi Israelini ma anyapa ma eselia ’diyi ma paria.

⁴²Musa nga di aliriaanzi dria anzi Israelini ma eselia ’diyi ma kalafe la ekile Yehovani azile eri tiarile ra.

⁴³Aliriaanzi agupiru dria ru yini ma kalafe vusi e’dozu odekua capi mba be alurisi muzu drile, yini yi ma kalafe lale ’diyi, yi alifu kali iri drini turu iri drini kali aziri drini na.

⁴⁴Yehova nga ’yo Musa tia kini,

⁴⁵Mi ma ope ’ba Levini aliriaanzi dria anzi Israelini ma eselia ’diyi ma paria, mi ope vini anyapa yini ’ba ’diyi ma anyapa paria; te ’ba Levini nga ovu mani ma Yehova’i,

⁴⁶Te aliriaanzi anzi Israelini ma eselia turu iri drini kali aziri drini na acepi, kalafe ’ba Levini ’diyini agapi drile tu ’diyi ma onzezasi,

⁴⁷mi ma a’i sekeli towi towi yi ma dri vusi, mi ma a’i sekeli nde sekeli pari alatararu vileri vusi, (te gera kali iri ’diyi sekeli alu).

⁴⁸Te mi ma fe sekeli nde ’ba acepi ’diyi onzezu ’diyi Aroni pi dri anzipi be.

⁴⁹Musa nga di sekeli ’ba onzezu ’diyi a’i ’ba lile kule amve ’ba Levinini onze1e ku ’diyi dri.

⁵⁰Eri a’i sekeli nde ’diyi aliriaanzi anzi Israelini ma eselia ’diyi dri, sekeli alifu alu drini turu na, drini kali azia drini towi sekeli pari alatararu vileri vusi;

⁵¹Musa nga di sekeli ’ba onzezu ’diyi fe Aroni pi dri anzipi be ekile e’yo ’yoza Yehovanirile, ekile Yehovani azile Musa ma tiarile.