Read lugbara Kalafe 30 Bible Online

Kalafe 30 - lugbara bible

Kalafe 30

¹Musa nga di ’yo ’ba opiru Israeli anziyi ma suru ma drilia ’diyi ma tia, kini, E’yo Yehovani azileri ’di.

²’Ba ka e’yo azi oyo sozasi Yehova dri, kani ka oyo so i orindi ombezu e’yo ombezasi, eri ma eza e’yo erini ’yoleri ku; te eri ma ’ye ekile e’yo dria efupi eri ma tiliarile.

³Azini vini zamva ka e’yo azi oyo sozasi Yehova dri, ka i ombe e’yo ombezasi erini de ovuria zamvaru ’dani i ati vile akua,

⁴eri ati ka e’yo erini azile oyo sozasiri pi eri e’yo ombeza erini i orindi ombezuri be, te ati ka adri erini ciri; ka’dini oyo erini dria nga pa so okporu ’dani, azini vini e’yo ombeza dria erini i orindi ombezuri nga pa so ra indi.

⁵Te eri ma ati ka ga si, o’du erini eri ma oyo erizurisi, oyo erini aluni ngani pa so ku, azini vini e’yo ombeza erini i orindi ombezuri ma aluni ngani pa so ku indi; Yehovani nga e’yo onzi erini ku ra, eri ma ’atini eri gale sirisi.

⁶Te eri ka mu agupia, de e’yo erini azile oyo sozasiri ovu eri ma dria ci, kani e’yo efupi eri ma tilia egata kokoru erini ani i orindi ombezuri ka ovu eri ma dria ci,

⁷agupi ka eri ra, ka adri erini ciri o’du erini e’yo nde erizurisi; ka’dini oyo erini nga pa so ra, azini vini e’yo ombeza erini ani i orindi ombezuri nga pa so ra indio

⁸Te agupi erini ka ga si, o’du erini e’yo nde erizurisi, ka’dini eri nga oyo ovupi eri ma driari pi ’ba toko, e’yo efupi eri ma tilia egata kokoru erini ani i orindi ombezuri be; Yehovani nga eri ma e’yo onzi ku ra.

⁹Te oyo awuzini, kani oku drole ’borini, ada e’yo dria erini ani i orindi ombezu ’diyi yi nga pa so eri ma dria ra.

¹⁰Te eri ka ndra e’yo azi oyo sozasi i agupi vile akua, kani eri ka ndra i orindi ombe e’yo ombeza oyonirisi,

¹¹te agupi erini ka ndra eri ra, te eri adri erini ciri, ogani ndra eri ku; ka’dini e’yo erini azile oyo sozasiri nga pa so dria ra, azini e’yo ombeza erini ani i orindi ombezuri nga pa so dria ra indi.

¹²Te agupi ka e’yo nde ga si, ka ’ba toko o’du erini e’yo nde erizurisi, ka’dini e’yo efupi eri ma tilea oyo sozasi, kani e’yo ombeza erini i orindi ombezurisiri ngani pa so ku; agupi erini ’ba yi tokoru ’bo, Yehovani nga e’yo onzi erini ku ra.

¹³E’yo dria azile oyo sozasi ’diyi pi, oyo okporu ’bani ani yi ma orindi ecandizu ’diyi be, agupi eco yi ’ba pa sozuni, agupi eco vini yi ’bazaru tokoni indio

¹⁴Te agupi erini ka adri erini ciri etuzu, ka’dini eri e’yo erini azile oyo sozasi ’diyi pi fe pa sozu, e’yo ombeza ovupi eri ma dria ’diyi pie dria; eri fe yini pa sozu ra ,erini ovule erini ciri o’du erini ’yo nde erizurisirisi.

¹⁵Te eri ka e’yo nde ’diyi ga si ’bazu toko, erini e’yo nde erizu ’bori ma vutia, ka’dini eri nga oku erini ma e’yo onzi ’du i dria.

¹⁶’Diyi e’yo azitaru Yehovani azile Musa dri e’yo agupi pi ma eselia oku ini beri ma dria, azini e’yo ata pi ma eselia i zi ovupi nga zamvaru i ati vile akuari beri ma dria ’diyi.