Read lugbara Kalafe 35 Bible Online

Kalafe 35 - lugbara bible

Kalafe 35

¹Yehova nga ’yo Musa ma tia angu dala Moabuni ma alia, Yoridani tia Yerikoa, kini,

²Mi azi e’yo anzi Israelini dri yi ma fe aku azini ’ba Levini ’diyi dri engazu angu yini nyale awurusoruri ma eselia; emi ma fe vini angu azini aku ’diyi ma ageia kuru ’ba Levini dri indi.

³Aku nde ’diyi ma ovu yi dri pari yini ovuzu ’diyiru; angu aku ma ageia ’diyi ma ovu ti yini pi dri afa yini ovuzu yi be ’diyi pie, anyapa yini pie dria.

⁴Emi ma o’bi angu nde aku ageia emini ngale fele ’ba Levini driri e’dozu aku nde ma abi kalirusi o’bizu amveleru kpere wuale alifu alu ageiniasi kuru.

⁵Aku nde ma kala amveleruria emi ma o’bi kalati etuni efuzurialerurini wuale alifu iri, kalati urulerurini wuale alifu iri, kalati etuni ’derialerurini wuale alifu iri, kalati andralerurini wuale alifu iri, aku nderi de agadua biri; angu ’diri nga ovu yi dri aku nde ma angu ageiniariru.

⁶Aku emini ngale fele ’ba Levini dri ’diyi nga ovu aku azia ’bani apazu yi ma alia emini ngale fele ’ba ’ba ’dipiri dri apazu yi ma alia ’diyi; emi ma fe vini aku azini kali su drini iri indi.

⁷Aku emini ngale fele ’ba Levini dri ’diyi ma kalafe dria nga ovu kali su drini aro; emi nga yi fe angu yi ma ageia ’diyi be.

⁸Aku nde emini ngale fele engazu anzi Israelini ma awuruso ma alia ’diyi ma e’yo eri ’di, ’ba kakau ’diyi vu emi nga aku a’i kakau, te ’ba were ’diyi vu emi nga aku a’i were, suru dria ma fe aku yini ma azi ’ba Levini dri awuruso yini nyale yi ma afarurini ovulerile.

⁹Yehova nga ’yo Musa ma tia kini,

¹⁰Mi olu e’yo anzi Israelini ma tia, mi ’yo yi tia kini, Emi ka Yoridanini zo fizuangu Kananinia ’bo,

¹¹emi nga di aku azini ope ovuzu emi dri aku ’bani apazu yi ma alia ’diyiru, ’ba ’ba ’dipi aka kuri ma apa yi ma alia beni.

¹²Aku nde ’diyi ma ovu emi dri pari ’bani apazu yi pazu ’ba lepi arioti ofepiri ma e’yosi ’diyiru, ’ba ’ba ’dipiri ma dra ku beni, de nga eri soni pa ’ba ongulumuru ma milia eri ma e’yo lizu ku.

¹³Aku emini ngale fele ’diyi nga ovu emi dri aku azia ’bani apazu y’i ma alia ’diyiru.

¹⁴Emi ma fe aku na Yoridani ma tia ’aa’dasi, te emi ma fe vini aku na angu Kananini ma alia; yi nga ovu aku ’bani apazu yi ma alia ’diyiru.

¹⁵Aku azia ’diyi ma ovu pari ’bani apazu yi ma alia ’diyiru anzi Israelini piyi dri, ani’bo azini ’ba emuza yi ma eseliari be, ’dini ’ba dria ’ba ’dipi aka ku ’diyi ma apa yi ma alia.

¹⁶Te eri ka ’ba ’di afa ayarusi erini drazu ani, ka’dini ’ba nde eri ’ba ’ba ’dipiri; ma fu ’ba ’ba ’dipiri ecekokoru.

¹⁷Te eri ka ’ba di oni i ma dria ’bani nile ’ba yi dra ani rarisi, ka dra ra, ka’dini ’ba nde eri ’ba ’ba ’dipiri;ma fu ’ba ’ba ’dipiri ecekokoru.

¹⁸Te eri ka eri agba pati i ma dria ’bani nile ’ba yi dra ani rarisi, ka dra ra, ka’dini ’ba nde eri ’ba ’ba ’dipiri; ma fu ’ba ’ba ’dipiri ecekokoru.

¹⁹’Ba arioti ofepiri ma ngulupi ma fu ’ba ’ba ’dipirini; erini ngaria dri furia eri beria, eri ma fu eri ra.

²⁰Te eri ka eri mba ra eri sozu ngutasi, kani eri ’dizu afa azinisi, ka dra ra,

²¹kani ka eri di drisi ngutasi, ka dra ani ra, ka’dini ma fu ’ba eri dipiri ecekokoru; eri ’ba ’ba ’dipiri; ’ba arioti ofepiri ma fu ’ba ’ba ’dipirini erini ngaria dri furia eri be raria.

²²Te eri ka eri so mbele, te ngutasi ku, kani ka eri ’di afa azinisi de mbani eri mba ku,

²³kani ka eri ’be oni ’bani ecozu drazu ani rarisi, de ndreni eri ku erini oni nde ’beria eri ma dria, erini drazu ani, de eri ovuni eri ma ari’bani ku, de leni vini te eri ’yezu onzi ku;

²⁴ka’dini ’ba ongulumuru nga e’yo li ’ba ’ba ’dipi pi ma eselia ’ba arioti ofepiri be, ekile e’yo liza ’diyini ovulerile;

²⁵’ba ongulumuru nga ’ba ’ba ’dipiri pa ’ba arioti ofepiri ma driasi, ’ba ongulumuru nga di eri omvi aku ’bani apazu yi ma alia erini apazu alenia ’bori vu, eri nga ovu aku nde ma alia ’daa de nga kuhani amboru yini odu alatararu osule driniari drani ku.

²⁶Te ’ba ’ba ’dipiri ka nga fu etu azinisi aku erini apazu aleniari ma kalatiasi amve,

²⁷azini ’ba arioti ofepiri ka nga eri isu aku erini apazu aleniari ma kalatia amve, ’ba arioti ofepiri ka nga ’ba ’ba ’dipiri fu ra, ka’dini arini ngani emvi eri ma dria ku.

²⁸A’disiku le eri ma ovu ’dani aku erini apazu aleniari ma alia, de nga kuhani amboruri drani ku; te kuhani amboruni drazu ’bori ma vutia, ’ba ’ba ’dipiri eco mvizaru i vile angu erini nyale awurusoruria ra.

²⁹E’yo ’diyi nga ovu emi dri azita e’yo lizaniru a’bianzi emini vusi a’bianzi emini vusi pari emmi ovuzuri ma alia dria.

³⁰’Ba ka ovu ’ba ngonini yani ti, ka ’ba ’di ra, emi ma fu ’ba ’ba ’dipiri e’yo efupi ’ba e’yo eti nzepi ’diyi ma tilearisi; te emi ma fu ’ba aluni e’yo eti ’ba aluni nzelerisi ku.

³¹Azini vini emi ma a’i afa onzezuri ’ba ’ba ’dipiri ma idri onzezu ku, e’yoni ka eri nde fudri erini drazu ra; ma fu eri ecekokoru.

³²Emi ma a’i vini afa onzezuri ’ba apapi aku ’bani apazu aleniari ma aliari dri ku, erini ani mvizu ovuzu i vile angua de nga kuhani drani ku.

³³’Dini emi ngani angu emini ovuzu aleniari eza ku; a’disiku arini adrile angu ezalenirisi, te econi angu ma e’yo onzi ’bani ari adazuri edezaru ku, pe kiri ’ba ari nde adapiniri ma ansi.

³⁴Mi ma eza angu emini rizu alenia, mani ovuzu alenia indiri ku; a’disiku ma’i Yehova,ma ovu anzi Israelini ma eselia.