Read lugbara Kalafe 36 Bible Online

Kalafe 36 - lugbara bible

Kalafe 36

¹’Ba ’wara suruti yi ma a’bipini ma drilia ori’ba Manase mvi Makiri ma mvi Gileadi ma anzipini ovupi anzi Yusufuni ma ori’baru ’diyi nga esi ogogo, nga ’yo Musa pi ma drilia, ’ba opiru yi ma a’bipi anzi Israelini ma eselia ’diyi ma suruti ma drilia ’diyi pie;

²yi ’yo ra, Yehova azi ndra e’yo opi mani ria, angu awazu awurusoru odrisi ’bezasi anzi Israelini dri; vini Yehova azi e’yo opi mani ria ama adripi Zelofehadi ma awuruso fezu ezoanzi erini dri.

³Te yi ka mu agupia, anzi suru azini Israeli anzipini ma eselia ’diyi vu, ’dini awuruso yini nga ovu nzezaru awuruso ama a’bipini ina eseliasi, eri nga suru yini ngazu ovuzu yi ma okururi ma awuruso ere; ’dini yi nga awuruso yiniri nze suru amani ma awuruso ma eseliasi ra.

⁴Te eli yubileru guka awuni Israeli anzipiniri ka nga eca ra, awuruso yini nga di ovu fezaru suru yini ovuzu yi ma okururi ma awuruso erezu; ’dini awuruso yini nga ovu nzezaru suru ama a’bipiniri ma awuruso ma eseliasi.

⁵Musa nga di e’yo azi anzi Israelini ma tia ekile e’yo Yehovani ’yolerile kini, Suru Yusufu anzipiniri ’yo ’yeke.

⁶E’yo Yehovani azile ezoanzi Zelofehadini ma e’yosiri ’di, yi eco mu agupi yini leleria; te ma mu lu agupi ori’ba suru yi ma atapini ’diyia a’dule.

⁷’Dini anzi Israelini ma awuruso aluni ngani fu suru ’diasi cazu suru ’daria ku; te anzi Israelini alu alu ma bi suru i a’bipini ma awuruso ci.

⁸Te ezoanzi dria alu alu awuruso nyapi suru Israeli anzipini ma azi ma eselia ’diyi ma mu okuru agupi ori’ba suru yi ma atapini ma eseliari dri, ’dini anzi Israelini alu alu ma nya ani yi ma a’bipi ma awuruso ’dani beni.

⁹’Dini awuruso aluni ngani fu suru ’diasi cazu suru ’daria ku, a’disiku suru Israeli anzipini alu alu ma bi awuruso yiniri ci.

¹⁰Ezoanzi Zelofehadini nga di ’ye trotro Yehovani azile Musa dririle;

¹¹te Zelofehadi ezopi Mala pi, Tiriza pie, Hogila pie, Milika pie, Noa pie, mu yini okuru anzi yi atapi ma adripini dri.

¹²Yi mu okuru anzi suru Manase Yusufu mvini ma ori’baru ’diyi dri, azini awuruso yini awi ku ’dani suru yi ma atapini ma ori’ba ma eselia.

¹³’Diyi azita piyi e’yo liza be Yehovani azile anzi Israelini dri geri Musa vurisi, angu dala Moabuni ma alia, Yoridani ma tia Yerikoa ’diyi.