Read lugbara Kalafe 4 Bible Online

Kalafe 4 - lugbara bible

Kalafe 4

¹Yehova nga ’yo Musa pi ma tia Aroni be, kini,

²Mi la ami Kohatini ma kalafe Levi anziyi ma eselia, ori’ba yini vusi, yi a’bipi ma suruti vusi,

³e’dozu ’ba capi eli be kali na ’diyisi muzu drile kpere cazu ’ba eli be kali towi ’diyi vu, ’ba dria fipi azi ngazu, hema ti ecizaniri ma azi ’yepi ’diyi.

⁴Kohati anzipi ma azi hema ti ecizaniri ma alia, afa alatararu tu ’diyisiri eri ’di:

⁵’ba ovupi pari hema asozuria ’diyini ’yeria dri koria ra, Aroni pi nga fi anzipi be, nga bongo ’ile jo ale alizuri ayu ra, nga ani sanduku e’yo eti nzezaniri a’bu erisi.

⁶Eri nga di eri ma rua a’bu yianya ma enyisi, nga bongo cala blururi aja eri ma dria, nga pati erini ’diyi osu ra,

⁷Yi nga bongo blururi aja mesa mikate ecetarurini ma dria, nga saanini piyi o’ba drinia kabile pie, okele pie, kopo yi bezu ’diyi pie dria; mikate o’du vusiri nga ovu drinia ’dani.

⁸Yi nga bongo ekaruri aja yi ma dria, nga vini yi a’bu afe eri a’buzu edele yianya ma enyisirisi, nga patini osu yi paria.

⁹Yi nga bongo blururi ’du, nga tala pati diza fepiri a’bu ra, talani pie, akpaani pie, ajikoani pie, afazu erini oduni yini ani azi ngazu erisi ’diyi pie dria:

¹⁰yi nga yi ’ba afazuni be dria afa yi a’buzu edele yianya ma enyisiri ma alia, nga eri ’ba oro eri ’duzuri ma alia.

¹¹Te yi nga bongo blururi aja pari edeta edezu meleruri ma dria, nga eri a’bu afa eri a’buzu edele yianya ma enyisirisi, nga patini osu yi ma paria;

¹²yi nga afazu azi ngazu, yini azi ngazu pari alataruri ma alia ’diyi o’du dria, nga yi o’ba bongo blururi ma alia, nga yi a’bu afa yi a’buzu edele yianya ma enyisirisi, nga yi o’ba oro yi ’duzuri ma dria.

¹³Yi nga ofuta omvu pari edeta edezuriasi, nga bongo okalakokalaru aja drinia;

¹⁴yi nga afazuni o’ba eri ma dria dria, yini ani azi ngazu eri ma ageia ’diyi, imvu ajikoru acioluni ’diyi pi, aya si be za sozu ’diyi pie, pauni pie, okeleni ’diyi pie, adani afazu pari edeta edezuria ’diyi dria; yi nga afa eri a’buzu edele yianya enyisiri aja eri ma dria, nga patini osu yi ma paria.

¹⁵Aroni pi anzipi be ka de pari alarararuri a’buzu dria ’bo, afazu pari alatararoria ’diyi be dria, ’ba pari hema asozuria ’diyini dri koria aciria, ’di ma vutia Kohati anzipi nga di emu yi ’duzu; te yi ma elo pari alatararuri ku, yi kazu odrazu ku. Afa hema ti ecizani ’diyi yi teri Kohati anzipini.

¹⁶Azi Eleazari kuhani Aroni mviniri nga ovu odu talani pi ma agei tezu, obiese arikariruri pie, edeta edele anyafurasi etuzuri pie odu osule osuri pie, bere dria pi ma agei tezu, afa dria alenia ’diyi pie, pari alatararuri pie, afazuni pie.

¹⁷Yehova nga di ’yo Musa pi ma tia Aroni be, kini,

¹⁸Emi ma li suru Kohati anzipi ma ori’baru ’ba Levini ma eseliasi kuzu amve ku.

¹⁹Te emi ma ’ye yi vu ’dini, yi ma ovu ani idriru, ma dra ku beni, yini esiria afa alatararu tu ’diyi vu raria: Aroni pi anzipi be ma fini, ma ope yi alu alu azi yini vu, teri awazu yi dri.

²⁰Te yi ma fi afa alatararu ’diyi ndrezu yi’i ku, kani etu werearu ti, yi kazu odrazu ku.

²¹Yehova nga di ’yo Musa ma tia kini,

²²Mi la Gerisoni anziyi ma kalafe indi, yi ma a’bipi ma suruti vusi, ori’ba yini ’vusi;

²³mi ma la yi e’dozu ’ba capi eli be kali na ’diyisi cazu ’ba eli be kali towi ’diyi vu, ’ba dria fipi azia, hema ti ecizaniri ma azi ngapi ’diyi.

²⁴Gerisoni ma ori’ba ma azi, kani azi ngazu kani teri jizuri ’di:

²⁵yi nga bongo o’ile bereni ’diyi pi ji ra, hema ti ecizaniri pie, afa eri a’buzuri pie, yianya ma enyi eri a’bupi driniasi uruleru ’diyi pie, bongo o’ile hema ti ecizaniri ma tilia ’diyi pie,

²⁶bongo o’ile irii ma ageia ’diyi pie, bongo ’ile irii ovupi bere pi ma ageia kuru pari edeta edezuri beri ma tiliari pie, bakani pie, afazuni yini ani azi ngazu ’diyi pie dria; afa dria ’bani ’yele yisi ’diyi, yi ma nga azi ndeni.

²⁷Gerisoni ma anzipi ma nga azi yini dria Aroni pini azile anzipi berile, teri dria yini jile ’diyi pi ma alia azi ngaza yini be dria. Emi ma ope yi dri azi yini teri ojizuri dria, e’yoni azizu yi dri ci.

²⁸’Di azi Gerisoni anzipi ma ori’bani ngale hema ti ecizaniri ma aliari’i; kuhani Aroni mvi Itamari ma ce azi yini ma drini.

²⁹Te e’yo Merari anzipinisi mi ma la yi ma kalafe ori’ba yini vusi, yi ma a’bipi ma suruti vusi;

³⁰e’dozu ’ba capi eli be kali na ’diyisi muzu drile, cazu kpere ’ba eli be kali towi ’diyi vu, mi ma la ’ba dria alu alu fipi azia hema ti ecizaniri ma azi ’yepi ’diyi.

³¹Azi azile yi dri teri ojizu, azi yini dria hema ti ecizaniri ma aliari ’di: bau bereni ’diyi pi ojizu, pati erini rwe rwe ’diyi pie, pati edrele uru ’diyi pie, ’bileni pie,

³²pati agoferu irii ageiniarini ’diyi pie, ’bileni pie, aloni pie, bakani pie, afazu yini dria pie, azi yini be dria; azi yini teri ojizuri ma alia mi ma ece afazu yini ngale ojile ’diyidriarusi,rusi.

³³’Diazi Merari anzipi ma ori’bani hema ti ecizaniri ma alia, azi yini dria vusi, te kuhani Aroni ma mvi Itamari ma ce yi drini.

³⁴Musa pi Aroni pie opi ’ba ongulumuru drilia ’diyi pie nga di Kohati anzipi ma kalafe la ori’ba yini vusi yi ma a’bipi ma suruti vusi ra,

³⁵e’dozu ’ba capi eli be kali na ’diyisi muzu drile cazu kpere ’ba eli be kali towi ’diyi vu, ’ba dria fipi azia hema ti ecizaniri ma azi ’yepi ’diyi;

³⁶’ba yi ma eselia yini lale ori’ba yini vusi ’di yi ma kalafe eci yi alifu iri drini turu aziri drini kali towi.

³⁷’Diyi ori’ba Kohatini yini yi ma kalafe lale ’diyi, yi ’ba dria azi hema ti ecizanirini ngapi, Musa pini lale Aroni be, ekile Yehovani azile geri Musa vurisirile ’diyi.

³⁸Gerisoni anzipi yini yi ma kalafe lale ori’ba yini vusi, yi ma a’bipi ma suruti vusi,

³⁹e’dozu ’ba capi eli be kali na ’diyisi, muzu drile kpere ’ba eli be kali towi ’diyi vu, adani ’ba dria fipi azia hema ti ecizaniri ma azi ’yepi ’diyi yi ’di.

⁴⁰Ada ’ba yi ma eselia yini kalafe lale ori’ba yini vusi yi ma a’bipi ma suruti vusi ’diyi yi alifu iri drini turu azia drini kali na.

⁴¹’Diyi ori’ba Gerisoni ma anzipini yini yi ma kalafe lale, adani ’ba dria azi hema ti ecizanirini ngapi Musa pini lale Aroni be ekile Yehovani azilerile ’diyi.

⁴²Ori’ba Merari anzipini ’bani yi ma kalafe lale ori’ba yini vusi, yi ma a’bipi ma suruti vusi,

⁴³e’dozu ’ba capi eli be kali na ’diyisi muzu drile cazu ’ba eli be kali towi ’diyi vu, adani ’ba dria fipi azia hema ti ecizaniri ma azi ’yepi ’diyi yi ’di.

⁴⁴Ada ’ba yi ma eselia yini kalafe lale ori’ba yini vusi ’diyi ma kalafe eci yi alifu na drini turu iri.

⁴⁵’Diyi ’ba yini yi ma kalafe lale ori’ba Merari anzipini ma eselia, Musa pini lale Aroni be ekile Yehovani azile geri Musa vurisirile ’diyi.

⁴⁶’Ba Levini dria yini yi ma kalafe lale ori’ba yini vusi, yi ma a’bipi ma suruti vusi, Musa pini lale Aroni pie, opi Israeli ma drilia ’diyi pie,

⁴⁷e’dozu ’ba capi eli be kali na ’diyisi, muzu drile cazu ’ba eli be kali towi ’diyi vu, adani ’ba dria fipi azi ngazu azini teri ojizu hema ti ecizaniria ’diyi yi ’di;

⁴⁸’ba yini lale ’diyi ma kalafe eci yi alifu aro drini turu towi drini kali aro.

⁴⁹La yi ma kalafe ekile azita Yehovani azile geri Musa vurisirile, ’ba dria alu alu azi erinini ovulerile, teri erini vusi; eri la yi ma kalafe ’dinile, ekile Yehovani azile Musa ma tiarile.