Read lugbara Kalafe 5 Bible Online

Kalafe 5 - lugbara bible

Kalafe 5

¹Yehova nga di ’eyo ’yo Musa tia, kini,

²Mi azi e’yo ami Israelini ma tia, kini, yi ma ofu ’ba ofu be ’diyi pi pari ’bani hema asozuriasi amve, ’ba afani razu eri ma ruaasi viru ’diyi pie, ’ba ovupi alatara kokoru ’ba ma avu ma e’yosi ’diyi pie dria.

³Emi ma ofu ’ba dria kani agupiru kani okuru, emi ma ofu yi pari ’bani hema asozuriasi amve, yi ma eza pari yini hema asozu mani ovuzu aleniari ku beni.

⁴Anzi Israelini nga di ’ye ’dini, nga yi ofu pari hema asozuriasi amve ra; ekile Yehovani ’yole Musa ma tiarile, anzi Israelini ’ye ’dinile trotro.

⁵Yehova nga ’yo Musa tia, kini,

⁶Mi ma ’yo anzi Israelini ma tia, kini, ’Ba agupiru kani okuru ka e’yo onzi ’bani adrile ’yele ’diyi ma azi ’ye ezata ezazu Yehova vu, ’ba nde nga ovu e’yo be i ma dria;

⁷ka’dini yi ma e’da e’yo onzi yini ’yeleri ra, eri ma ofe afa nde e’yonini ovuzu eri ma driari kililiru, ma ’ba afa nderi ma esele towi ma azi aluri drinia, ma fe eri ’ba nde erini ’yele onzi vunia e’yonini ovuzu eri ma driari dri.

⁸Te ’ba nde ma ori’ba, erini ani e’yo eri ma driari ma arioti ofezu vuniari ka adri yo, e’yo onzi nde ma arioti ofeza ’bani ofele Yehova driri ma ovu kuhanini, ma fe eri eri dri kabiloago e’yo onzi edezu, yini ani eri ma e’yo onzi edezuri be tualu.

⁹Edeta dria ’dule uru afa alatararu anzi Israelini ’diyini ma eselia, yini fele kuhani dri ’diyi, nga ovu erini.

¹⁰Afa dria ’ba driani o’bale ndu alatararu ’diyi nga ovu vini erini; afa ’bani fele kuhani driri ka ngoni ti, nga ovu erini,

¹¹Yehova nga ’yo Musa tia, kini,

¹²Mi olu e’yo anzi Israelini ma tia, mi ’yo yi ma tia kini, ’Ba azini ma oku ka i oja e’yo ’yezu kalaasi, ka eza agupi ini vu,

¹³’ba azini ka la erisi, te agupi ndreni e’yoni i milesi ku, yi ka e’yo nderi oci ci, oku nde eza ra, te ’ba e’yo eti nzepi eri ma ruaari yo, isuni vini eri yini e’yo nde ’yeriaria ku;

¹⁴e’yoni ka fi agupi ma asia onzi, erini ovuzu ani onzi oku ini vu, de eri eza e’yo ada, kani e’yo ka fi eri ma asia onzi, erini ovuzu ani onzi oku ini vu, de eri ezani e’yo ku;

¹⁵agu nde ma eji di oku ini; kuhani vu, ma eji afa feza erini eri ma e’yo edezuri indi, ’du abaka ma aliari ma esele mudri ma azi alu; te eri ma osu odu drinia ku, ma o’ba obiese vele veri drinia ku indi, erini ovule edeta edele anyafurasi e’yo asia onziri edezurisi, eri edeta edele anyafurasi e’yo egazuriru, fezu yini yi ma e’yo onzi egazu.

¹⁶Kuhani ma fe eri ma esi ogogo, ma ’ba eri Yehova ma drilia.

¹⁷Kuhanini nga yi alatararuri be imvu sile odrisiri ma alia; kuhanini nga di irifura ovupi hema ma alia vari ma azi omvu, nga eri yi yi nde ma alia.

¹⁸Kuhanini nga oku nde ’ba Yehova ma drilia, nga oku nde ma dri’bi ayu ra, nga edeta edele anyafurasi e’yo egazuriru ovupi edeta edele anyafurasi e’yo asia onziri edezuri ’ba eri ma dri agelea, de kuhani ovu yi drazaru ’ba dri wazuri be i ma dria.

¹⁹Kuhanini nga fe erini oyo sozu, nga ’yo oku nde ma tia, ’Ba azini ka la misi ku mi ka mi oja e’yo alatara kokoruri, ’yezu kalaasi, de mini ovuria mi agupi ma palaaria ku, ka’dini yi drazaru ’ba dri wazu ’diri ma ’ye mi onzi ku.

²⁰Te mi ka mi oja e’yo ’yezu kalaasi de mini ovuria mi agupi ma palaaria ra, mi ka eza ra, ’ba azini ovupi agupi mini kuri ka la misi ra,

²¹(kuhanini nga di fe oku ma wa i dri oyo ’ba dri wazurisi, kuhanini nga ’yo oku ma tia kini), Yehova ma ’ba mi ovuzu tritaru, azini oyoru ’ba mini ma eselia, Yehova ka nga fe mi o’duni ondrizu azini mi aleni mbazuria;

²²yi ’ba dri wazu ’diri ma fi mi alia, ma fe mi aleni pizu azini mi o’duni ondrizu ra, Te oku nde nga ’yo, Amena, Amena.

²³Kuhanini nga e’yo dri wazu ’diyi osi buku ma alia ci, nga di yi oji yinini razu yi drazaru ’diri ma alia;

²⁴eri ma fe oku nde ma mvu yi drazaru ’ba dri wazu nderi ra, yi ’ba dri wazu nderi nga fi eri ma alia, nga i oja drazaru.

²⁵Kuhanini nga edeta edele anyafurasi e’yo asia onziri edezuri a’i oku nderi ma dria, nga edeta anyafurasi nderi oya Yehova ma drilia, nga eri ji ’ba pari edeta edezuri ma dria;

²⁶kuhanini nga edeta edele anyafurasiri ndi driega alu tre ovuzu esele erini e’yo egazuriru, nga eri eve pari edeta edezuri ma dria, nga di oku nde imvu yi ndesi ndo.

²⁷Te eri ka eri imvu yi ndesi ’bo, eri di nga eca ’dini, eri lea ndra eza ra, ka ndra e’yo onzi ’ye i agupi vu ra, yi ’ba dri wazurini firia eri ma alia, eri nga ofu drazaru, eri ma aleni nga mba ra, eri ma o’duni nga ondri ra, oku nde nga ovu tritaru i o’dipi ma eselia ra.

²⁸Te oku nde ka ndra eza ku, ka ovu alaru, eri nga ovu e’yo kokoru, eri nga anzi ti ra.

²⁹’Di azita e’yo ’ba asia onzirini, oku ovupi i agupi ma palaari ka i oja e’yo ’yezu kalaasi, ka i eza ra,

³⁰kani e’yo ka fi agupi ma asia onzi erini ovuzu ani onzi oku ini vu; yi nga di oku nde ’ba Yehova ma drilia, kuhanini nga di azita ’diri ’ye eri ma ruaa dria.

³¹Agu nde ma e’yo onzi nga ovu adizaru, te oku nde nga e’yo onzi ini ’du i’i.