Read lugbara Kalafe 6 Bible Online

Kalafe 6 - lugbara bible

Kalafe 6

¹Yehova nga ’yo Musa tia, kini,

²Mi olu anzi Israelini ma tia, mi ’yo yi tia, ’Ba agupiru kani okuru ka nga oyo pila, adani oyo ’ba Nazirirurini so ra, i esele cozu ndu Yehovaniru,

³eri ma co i esele ndu vino pi gazu afa mvuza okporuri be; eri ma mvu patiefi su drazaru edele vinosiri aluni ku, patiefi su drazaru edele afa mvuza okporurisi be ku, ma mvu vini zabibu efi su ku, ma nya zabibu efi ibiru kani ’wizaru ’diyi ku indio

⁴O’du erini i esele cozu ndu ’diyisi dria ma nya afa aluni zabibu patini ’yaleri ku, kani efini oriruri, kani o’bokoni amveri ti.

⁵O’du oyo erini i esele cozu ndurini ’diyisi dria, idri ma elo drini ku; kpere o’du nde erini i esele cozu ndu Yehovaniru ’diyini yi dezu ’borisi dria, eri nga ovu alatararu; eri ma ku dri’bi i driarini duzu izuru.

⁶O’du erini i esele cozu ndu Yehova vu ’diyisi dria ma esi ’ba avu vu ogogo ku.

⁷Eri ma eza i ovuzu alatara kokoru i atisi, kani i andrisi, kani i adrisi, kani i amvisi ku, yini odrazu rari ti, e’yo i esele cozu ndu Yehovanirurini ovule eri ma driarisi.

⁸O’du erini i esele cozu ndu ’diyisi dria eri alatararu Yehova vu.

⁹’Ba azini ka dra mbeleru eri ma ageia ogogo ’daa, erini ani i ma dri erini i esele cozu nduri ezazu alatara kokoru, ka’dini eri ma fa i dri o’du i ’bazu alatararurisi; eri ma fa i dri o’du aziririsi.

¹⁰Te o’du arorisi eri ma eji a’balau angarakaru ’diyi iri, kani a’balau o’buru ma anzi iri kuhani dri hema ti ecizaniri ma tilea.

¹¹Kuhanini nga di aluri ede edeta e’yo onzi edezuriru, aziniri edeta vezaruriru e’yo onzi erini edezu, erini ezale ’ba drapiri ma e’yosirisi, nga eri ma dri ’ba alatararu dika o’du nde ’darisi.

¹²Eri ma co i esele ndu Yehova vu o’du erini i esele cozu ’diyisi, eri ma eji vini kabiloago eli be aluri edetaru e’yo eri ndepiri edezu; te o’du oko ’dayi ngani la ku, e’yo erini i esele cozu ndurini i ezalerisi.

¹³Azita ’ba Nazirini o’du erini i esele cozu ndu ’diyini yi dezu ’boriari ’di: ma eji eri hema ti ecizaniri ma tilea,

¹⁴eri ma fe afa feza erini edetaru Yehova dri, kabiloago alu eli be alu nyibele kokoruri, edeta vezaruriru, kabilo aroniru alu eli be alu nyibele kokoruri, edeta e’yo onzi edezuriru, kabiloago alu nyibele kokoruri edeta asi anzuruniriru,

¹⁵ma eji vini mikate akufi kokoru acalaka ma aliari pi, mikate edele anyafura inikinirurisi olizaru osale odusi ’diyi pie, mikate akufi kokoru pekepekeru odu trile drinia ci ’diyi pie, edeta anyafurasi ’diyi pie, edeta yini afa mvuzasi ’diyi pie dria.

¹⁶Kuhani ma ofe yi edetaru Yehova ma drilia, ma ede edeta erini e’yo onzi edezuri pi edeta erini vezaruri be,

¹⁷eri ma ede kabiloago edeta asi anzuruniriru Yehova dri, mikate akufi kokoru acalaka ma aliari be; kuhani ma ede vini edeta erini anyafurasiri pi, edeta erini afa mvuzasiri be.

¹⁸’Ba Nazirini ma fa i ma dri erini i esele cozu nduri hema ti ecizaniri ma tilea, ma omvu dri’bi fale dri erini i esele cozu nduriari yizu aci edeta asi anzuruniri ma etiari ma alia.

¹⁹Kuhani ma ’du kabiloago ma wu alu a’dile yisiri pi, mikate akufi kokoru olizaru alu acalaka ma aliari pie, mikate akufi kokoru alu pekepekeruri pie, ma ’ba yi ’ba Nazirini ma dri agelea, erini i dri erini i esele cozu nduri fazu ’borisi.

²⁰Kuhani ma oya yi edeta oyale oyariru Yehova ma drilia; afa ’diri eri alatararu kuhani ma afaru, agati oyale oyari pi be tualu o’du ’dule ururi be; e’yo ’diyi ma vutia ’ba Nazirini eco patiefi su mvuzaru ra.

²¹’Di azita ’ba Nazirini oyo sopi ma e’yosiri, azini azita afa feza erini fele edetaru Yehova dri erini i esela cozu nduri ma e’yosiri’i; eri ma fe afa erini ecole isule ’diyi drinia; eri ma ’ye azita erini i esele cozu nduri vusi ekile oyo erini solerile.

²²Yehova nga ’yo Musa tia kini,

²³Mi ’yo Aroni pi ma ria anzipi be, kini, Emi ma fe asi ndriza anzi Israelini dri ’dinile: emi ma ’yo yi ria kini,

²⁴Yehova ma fe asi ndriza mi dri, ma mba mi ta fo

²⁵Yehova ma fe i andretini dizu mi dria, ma ’ye mi vu ’yeta anzutirisi:

²⁶Yehova ma enga i mile mi dria, ma fe mi dri asi anzuru.

²⁷’Dini yi nga ru mani ’ba anzi Israelini ma dria, ma nga di asi anzuru fe yi dri ra.