Read lugbara Mika 6 Bible Online

Mika 6 - lugbara bible

Mika 6

¹Emi ma eri di e’yo Yehovani ’yoleri fo: Emi ma enga, ma nze e’yo emini oni ambo ambo drilia, emi ma fe oni were ’diyi ma eri emi o’duko.

²Emi eri, emi oni ambo ambo ’diyi la! agata Yehovani galeri, azini emi eti nyakuni pa sopi ’dani ’diyi, emi eri e’yo fo! Yehovanini ovule agata be ’ba erini vurisi, te eri nga e’yo eti nze Israeli be ra.

³’Ba mani la! ma ’ye emi ngoni ya? Ma fe emi dri ande a’di afasi ya? Emi to ma fo!

⁴Te ma ofu emi angu Misirini ma aliarisi ra, ma onze emi jo ati’baniarisi ra; azini ma pe Musa pi ma ti emi drilia Aroni pie Miriamu be.

⁵’Ba mani la! emi ma ega di e’yo Balaki opi Moabuarini ndra ndale emi ruaa ’dari, e’yo Balamu Beori mvini ndra omvile eri tiari be; emi ega engazu Sitimua kpere Giligalia, ’dini emi ma ni ’yeta kililiru Yehovani ’diyi ani. E’yo Yehovani leleri

⁶Ma ma etru ma Yehova vu a’di afa be ya mani avuzu Mungu uru turi ma drilia ya? Ma nga emu eri ma drilia edetai vezaru be, azini koanzi ovupi eli be alu alu ’diyi be ya?

⁷Yehovani nga ovu ayikosi kabiloago alifu ’diyisi, kani yi raza oduru alifu mudri ’diyi be ya? Ma nga ma mvi okori fe ezata mani ma e’yosi, kani rua mani ma ori fe e’yo onzi ma orindinisi ya?

⁸Agu la! eri ece mini e’yo onyiruri ’bo; te Yehovani lele mi vuri ngoni ya, pe lu ’yezu kilili, asi ndriza lezu, azini acizu afu kokoru Mungu mini be?

⁹Yehova ma o’dukoni wu aku amboru vuazini agu onduaruri nga mi ru ru ra: Mi ma eri kali pi ’ba eri pepi aziari be!

¹⁰Lonyi e’yo onziniri nga kiri ’ba onzi vile joa, afa o’biza werea capi ku mani ngule onzi ’diyi be ya?

¹¹Ma nga ’ba ovupi afa nziza o’bizu lokiriruri be azini ratili ’ba icizu ’diyi be i ma juruaari la alaru ra ya?

¹²A’disiku ’ba afa e’iru aku ndea ’diyi ga tre eganasi; azini ’ba angu e’ipi ’diyi li inzo ’bo, andre yi ma tilea ovu vini lokiri be.

¹³E’yo ’disi ma co mi bile onzikanyarusi; ma ’ba mi toko ezata mini ’diyisi.

¹⁴Mi nga nya ra, te mi ngani tra ani ku; abiri miniri nga ovu mi alia ’dani; mi nga afa ’ba kalaa, te mi ngani eri ma ta mba ku; azini afa mini tani mbaleri ma nga eri fe sei dri.

¹⁵Mi nga ori ri, te mi ngani lo ku; emi nga mizeitu patiefi otu oduni nzizu, te mi ngani mi efi odunisi ku; mi nga zabibu efi otu, te emi ngani suniri mvu ku.

¹⁶A’disiku emi mba azita Omirini pi ma ta, azi dria ori’ba Ahabunirini be; azini emi aci e’yo amaza yini ma alia indi; ani ma ’ba emi andruru beni, ma ’ba angu e’ipi ’diyi oli liza osutasiriru indi; fe emi nga o’data yini ’ba mani o’dazuri ’du.