Read lugbara Mika 7 Bible Online

Mika 7 - lugbara bible

Mika 7

¹Candi ma dri! A’disiku ma ovu ekile o’du yini patiefi kapi ayisiri tizu ’borile, ekile ewu ’bani zabibuefi vile ’diyi otizu ’borile: afa azini olinguluru ’bani nyaleni yo, elio kapi okori ma asini leleri di vini yo indi.

²’Ba Mungu inzipiri ja dri nyakua ’bo, ’ba kililiru ’ba ma eselia aluni yo; yi dria ola yi ari teria, yi alu alu emba se yi adripi mbazu.

³O’ba yi ma dri e’yo onzi ma dria, eri ’yezu asi driasi; opi pi afa feza ti razuri a’i ’ba e’yo lipiri be, ’ba amboruri e’yo lokiriru i asiari olu; ’dini e’yo yini eci yi tualu.

⁴’Ba onyiru tu yi eselia ’diyi si yi ocile, ’ba yini kililiru tu ’diyi yi onzi aga kali oci be ’diyi ra. O’du ’ba mini angu tepi ’diyini, o’du yini mi andrizuri eca ’bo; curu’do yi dri asi otizani tu.

⁵Emi ma a’i ’ba mi jo ejeleari: ma e’yo ku; emi ma ’ba emi asi emi agyi ma dria ku; mi ma mba mi ti ma ta, oku lapi mi asi tiari ma ni e’yoni ku beni.

⁶A’disiku mvani nga atini onzo, zamvani nga i enga andri ma ruaa, ziani nga i enga idri ma ruaa te agu ma ari’ba yi nga ovu ’ba eri ngulupi ma joa jiyi.

⁷Te ma’iruni, ma nga mani Yehova vu a’dule, ma nga Mungu pata manirini te; Mungu maniri nga ma eri ra, Yehovani diza pi eji pata beni

⁸Emi ma ovu nyonasi ma vu ku, ari’ba mani la! Ma ka te tro e’de va ra ti, ma nga enga uru dika; ma ka tro ri ini muderu alia ti, ma ni ra Yehovani nga ovu mani angu izu ma drilia dizaru.

⁹Ma nga di mani asi veza Yehovaniri ma e’yo ta’i a’disiku mani ezale eri vu ’borisi, de nga eri koni e’yo mani ma aza ku, de nga lini e’yo liza ma dri ku. Eri nga ma ofu angu dizarua amve; te ma nga di ani e’yo kililiru eriniri ndre’i.

¹⁰O’du ’dasi ari’bo maniri nga di e’yo nde ndre, drinzani nga eri fu ani, ari’bo nde e’yo ’yopi ma tia kini, Yehova Mungu miniri di ngoa ya-ri. Ma nga eri ndre ma milesi; yi nga di eri otu pasi va ekile orita gbokoarile.

¹¹’Di o’du abi mini sizuri! O’du nde ’da ma alia angu mini ma lokiri nga i adi re re.

¹²O’du nde ’dasi ’ba nde yi nga emu mi vu, engazu Asuria pia aku ambo ambo Misiria ’diyi be, engazu angu Misiriarisi kpere cazu Yi Ara ma tia, engazu miri aziria kpere aziniri vu, azini engazu oni aziria cazu kpere aziniri vu indi.

¹³Te kiri ti, anguni nga eca ani andruru ’ba ovupi angu nde ma alia ’diyi ma e’yosi, efi ’yaza ’yeta yini ’yele ’diyinirisi, Yiki aleru Yehovani Israeli vuri,

¹⁴Mi oce ’ba mini ’diyi lote minirisi, kabilo o’biru ’ba mi yilaru ’diyi, yi’i ovupi a’dukulesi oce ma alia Karimelia agadua ’diyi; mi fe yi ma nya angu Basani pia Gileadi be, ekile ndra o’du driowu ’diyi ma aliarile.

¹⁵Ekile o’du ndra mini efuzu angu Misiriasi ngarerile, ’dini ma nga afa osutaru ’dinile ’diyi ece eri dri ra.

¹⁶Suru dria yi nga ndre ra, drinzani nga yi bi okpo yini ma e’yosi dria beni; yi nga di yi ma dri o’ba tia tia ani; yi ma bileni nga di ase ci.

¹⁷Yi nga irifura mbe andresi ekile urile, ekile afa agapi agatisi ’diyile; yi nga di efu rua yaza be pari yini yi ozizu ’diyiasi ra, yi nga di yi omba urisi emuzu Yehova Mungu amaniri vu, yi nga ovu urisi misi indi.

¹⁸A’dini Mungu milenini ya? e’yo onzi kupi ra, ecopi agapi ezata ’ba yilaru erini ma joloko ’diyini ma driasiri. Eri mbani adra ini ma ta ’dani ’dani ku a’disiku erini ovule ayikosi yiki ma aliarisi.

¹⁹Eri nga i oja dika ovuzu yiki aleru be ama vu ra, eri nga e’yo onzi amani otu pa agelesi va. Te mi nga vini azi onzi yini ’diyi o’be miri aliru ma alia ra.

²⁰Mi nga e’yo adaruri ’ye Yakobo dri be, azini mi nga yiki ’ba Iburahimu vu ra, yiki nde andra mini oyo sole ama a’bipi ma tia engazu o’du driowu ’diyi ma aliari’i.