Read lugbara Nahumi 3 Bible Online

Nahumi 3 - lugbara bible

Nahumi 3

¹Drileonzi aku amboru ari beri dri! Inzo pi ga alenia tre afa oriza be; afa yini rile’diyi, afa opaza yini asini ku.

²Nini awu pi gari ma pa awu be, ididi akanyani nzuria, garini omburia

³Asikari tupi nzupi akanya dria ’diyi, sei ’i diza mbele, aju di Lele, ’ba ofule ’diyi kakau, avu yini odrozaru amboru tu, avu nde ’diyi lakokoru- ’ba yi pa osi avu nde ’diyi ma ruaa!

⁴Oku mile aci beri be ma awu kakau ’diyi ma e’yosi, eri oku ndrizaru, eri oleouni, eri suru je mile aci inisi, eri ori’ba je ole inisi.

⁵Mi ndre, ma ari’bo mini, Yehova Opi asikari ongulumuruniri ’yoni, ma nga afa suza mini tru ra mi milia; ma nga rua pilili mini ece suru ndu ndu ma milia, ma nga drinza mini ece opi nyaza ndu ndu dri.

⁶Ma nga ondi ’bani ngule onziri ’be mi dria mi ’bazu toko drinzaru, i ma nga vini mi ’ba uru ’ba driani luzu.

⁷Eri nga eca ’dini, ’ba dria mi nepiri nga apa misi apa apa, ’yozu, Nineve ovu ezazaru andruru ’doni ya! A’dini nga eri ma lulu gani ya? Ma nga ’ba mi asi ori pi ’diyi isu mini ngoa ya?

⁸Mi onyiru aga No-amoni ovupi yi ara ma eselia, yini acele kururi ra ya? Kali okporu eriniri miri’i, azini a bi eriniri vini mirini,

⁹Etiopia pi Misiri be yi ovu ndra okpo eriniri asikokoru; Puti pi Lubimu be yi ’ba eri aza kopi ’diyi.

¹⁰Te ti, ji eri re ovuzu ati’boru; yi ogba anzi nyiri erini ’diyi kai kai geri ariti vusi dria; yi ’be odrisi ’ba erini inzizaru ’diyi ma e’yosi, ’ba ’wara erini ’diyi dria ovu o’izaru anzirikusi.

¹¹Azini mi alu indi nga ati afa mvuzasi, mi nga mi zi; azini mi nga pari okporu mi ta mbazu aleniari ndru ari’ba mini ma e’yosi.

¹²Aku miri abi be okporu ’diyi dria nga ovu elio pati ozina be ’diyile- ’ba yi ka pati nde oya oya ozina nde nga o’de ’ba nyapiri ma tilea.

¹³Mi ndre, ’ba mini ovupi mi alia ’diyi yi okuni. Kalitile angu minirini yi ovu zizaru mgboru ari’ba mini ’diyi dri; aci ve katala jotile mini opizu ’diyi ra.

¹⁴Mi ma oko yi eri ta mbazu, ’bani ngale mi acele ombasi kururisi, mi ’ba aku amboru abi be izuru ’diyi okporu; mi fi odri alia, mi tu, mi ’ba pari biriki evezuri okporu!

¹⁵’Dale acini nga mi ve kieikici, seini nga mi li va. Eri nga mi nya ekile o’doale. Mi ma ezu kakau ekile o’doale, mi ma ezu kakau ekile ombile!

¹⁶Mi fe ’ba afa mini ozipi ’diyi ezu kakau aga ’bi ’bio ’bua ’diyi ra. O’doa eza afa ’bani ra, apa ra.

¹⁷’Ba opiru mini ’diyi ovu ekile ombile, ’ba e’yo osipi mini ’diyi ovu ekile ese o’birule, ese nde ’diyi ovu pati geri tia ’diyi ma alia anguni ambilerisite etu ka efu ra yi apa ra; pari yini muzuri ’ba nini ku.

¹⁸’Ba kabilo mini ocepi ’diyi o’du ko, opi Asuriaari la! ’Ba amboru onyiru mini ’eliyi yi ava li, ’Ba mini ere yi oni dria, ’ba yi okupini aluni yo.

¹⁹Rua suza mini atini ku, bile mini ovu onzi tu. ’Ba dria mi ma e’yo eripi ’diyi yi sa dri ayikosi mi dria. A’disiku e’yo onzi mini ’yele ’dani ’daniri cani kuni a’di vu ya?