Read lugbara Habakuki 1 Bible Online

Habakuki 1 - lugbara bible

Habakuki 1

¹E’yo eceza nabi Habakukini ndreleri.

²Yehova la ma nga wu o’du izuru ngopi ya, mini ma erizu ku ya? Ma wu mi vu e’yo egaqanisi te mi pani ani ma ku.

³Mi ece e’yo onzi ma dri a’di e’yosi, azini mi fe ma mileni ambo ndrezu a’disi ya? A’disiku afa opaza pi ma milia indi, e’yo ’bani ’ba ’yezu eganasiri be; omba ’baza pi awata be indi.

⁴E’yo ’disiazita ovu di okpokokoru ani, e’yo liza efuni ku; ’ba e’yo onzi ’yepi ’diyini ’ba kililiru acele kururisi; e’yo liza efu inzoru ani.

⁵Emi ndre suru ’diyi ma eselia, emi ega; emi ma ovu osuta be tu. A’disiku ma nga azi nga ewu eminisi emini ngale e’yoni a’ile kuri ’ba ka tro e’yoni ece emini ra ti.

⁶Te emi lu, ma nga suru Kalideyaniri fe enga, yi suru asi okaru, e’yo ’yepi mbele mbele, ngapi acipi wudrikuru ma eselesi pari ovuzu ovupi yiniru ku ’diyi opazu yiniruri’i.

⁷Yi uriuriru, ru yi tu; e’yo liza yini pi enga yi ngulupi vu inzita yini be.

⁸Akanya yini nde o’du ongusi ra, yi ombaru tu aga ’balau acipi ondresi ’diyi ra; ’ba yini nzupi akanyasi ’diyi ere yi, Ada, yi enga angu ziria; yi sa ekile aji elupi mbele za sozu benirile,

⁹Yi emu dria egana ma e’yosi; ’ba yi ma mile okporu oli engapi etuni efuriarile. Yi ati’ba oku kakau kile cinyale.

¹⁰Ada, eri opi ’ba aparakaru, eri ’ba dri cepi ’diyi onzo. Eri pari okporu dria ’ba afa tokole, te eri irifura oku ra eri ’duzu.

¹¹Te eri nga aga hwii kile olile, eri nga aga e’yo ezazu e’yoni eri ndezu ani, eri ’ba okpo ini ’bapi Mungu iniruri,

¹²Mi ovuni engazu driowu ku ya, Yehova Mungu mani, ’Ba mani Alatararuri’i la? Ama ngani dra ku. Yehova la! mi pe eri e’yo lizariru; Mi Kata la mi ’ba eri pa sozu okporu imbataru.

¹³Mi’i ovupi mile alatararu tu sipi te yi ma lu e’yo onzi ku ’diyi beri, mi’i ecopi e’yo onzi ’yele akari ndrepi kuri, mi ’ba ’yepi lokirisi ’diyi one milesi a’disi ya? ’Ba onzi ’yepiri ka ’ba alatararu eri agapiri ki pi, mi adri ciri a’disi ya?

¹⁴Mi ’ba ’ba ovuzu ekile e’bi miria ’diyile, ekile afa acipi valesi ’ba yi dri cepiri kokoru ’diyile.

¹⁵Eri ope yi dria ewisi, obi yi emba erini ma alia, yi okuzu emba erini seleri ma alia; e’yo ’disi eri ovu ayikosi nyona be ani.

¹⁶E’yo ’disi eri ede edeta emba erini dri, eri ve obiese emba erini seleri dri indi; a’disiku emba ndesi awuruso erini ofu osoru, azini nyaka erini ovu fudri ci ndakokoru.

¹⁷E’yo ’dirisi eri nga afa onze emba erini ma aliasi ’dani ya? Eri ngani suru ku ofukokoru ja ’dani ku ya?