Read lugbara Habakuki 3 Bible Online

Habakuki 3 - lugbara bible

Habakuki 3

¹A’iza nabi Habakukini, edele o’duko Sigionotini vusiri.

²Yehova la, ma eri e’yo kuza miniri ’bo, ma ovu ani urisi. Yehova la, mi ma fe idri azi miniti dri eli kakau ma eselia dika; eli kakau ma eselia mi ma eku e’yoni; adra ngare mi ma ega yikini.

³Mungu emu engazu Temaniarisi ra, Eri’i Alatararuri’i emu engazu oni Parania. Diza erini a’bu ’bu mile ci, te nyaku ga tre inzita erinisi indi.

⁴Diza eriniri e’da trotro kile angu ’izale, eri ma driarisi etupa adri ku zirri zirri; pari eri ma okponi i zizuri eri ’daa.

⁵Eri ma drilia ndindia ce drini, aciolu efu paniasini.

⁶Eri nga pa so ra, nga nyaku oya oya; eri ndre ra, api suru ma esele kpele kpele. Te oni oku drio ’dani ’diyi ere yi ndu ndu ra, azini oni ngulu ngulu ’dani ’dani ’diyi avu dria va. Acita eriniri ovu kile oku driorile.

⁷Ma ndre Kusani ma hemani candi isuria; bongo aliza angu Midiania ’diyi ri oya oya.

⁸Yehova ovu ndra adrasi yi raza vu ya? Adra miniri enga yi raza ma dria, kani aoko mini miri ma dria, mini nzuzu ndra akanya mini ’diyisi, gari mini patani ’diyisi indi ya?

⁹Mi nzo osu miniti ’bo, oyo mini sole suru ndu ndu yo’diyi eca e’yo adaru. Adaru mi asi nyaku ma ale yi razasi,

¹⁰Oni mire mi ra, yi ovu ani urisi; yi tiza aga kalasi; yi aliru ofu i ma o’duko mgboru, azini eri eju ani i ma dri uru indi.

¹¹Etu pi mba be oso pa yi ma pari ovuzuria ci ’ye mini ’diyi ma dizasi, yini engaria, aju mini ma diza dipi nyunyurisi.

¹²Mi aci angu ma eselia asi veza be ra, mi oco suru ’diyi adra minirisi anyale ra.

¹³Mi efu pata ’ba mini ’diyini ma e’yosi, pata jizu ’ba mini odu osule driniari dri. Mi fe ebi ’ba e’yo onzi ’yepiri ma ria eri vile joarisi, nduni ’bazu e’dazaru kpere ombelea.

¹⁴Mi ogba ’ba omba ’bapi eri be: ’diyi ma drifa, kali yi ma ngulupini ’diyisi ra; yi emu ekile oli piriliarurile ma erezu ndu ndu; ayiko yiniri kile yi le ’ba! alioru okizu oyokolosirile.

¹⁵Mi otu miri akanya mini ’diyisi ra, yi nde okporu adipi ngula ngulari,

¹⁶Ma eri ra, ma mani ya ya, o’dukoni ekupirisi ma tiriyaya; mazaniri fi kpere ma fala alia, azini ma ya ya pari mani ovuzuri ma alia. Ka’dinile le te di ma ma te e’yere o’du candini ngapi ecapi ’ba o’biru efipi angua a’di ’dizu ’diyi ma driarisi.

¹⁷Te elio pati ka tro nga fu zo aluni ku, kani te tro zabibu pati ovuni efi ’yaza be ku; azi mizeitu patiniri ka tro eca tokoru, ka tro amvu ngani nyaka fe ’ba dri aluni ku; anyapa nyiri o’biru ’diyi ka tro nga ovu dri jazaru joarisi, anyapa ’wara ongulumuru ’diyi ka tro ovu lico yinia yo;

¹⁸te kiri ti, ma nga ovu ani ayikosi Yehova, va ma alia ra, ma nga ovu nyonasi Mungu pata fepi ma driri ma alia.

¹⁹Yehova, Opini, eri okpo maniri’i; eri ede ma pa ekile nyajo ma pale, azini eri nga fe ma ma aci pari mani uru ’diyi ma dria ra. (’Ba ongo dri cepiri dri: o’di cozasi.)