Read lugbara Zefania 3 Bible Online

Zefania 3 - lugbara bible

Zefania 3

¹Candi aku mbupi amve, ovupi onzikanyaruri vu, aku ’ba ’yepi okporuri dri!

²Eri inzini o’duko ku, a’ini vini imbata ku. Eri a’ini Yehovani ku, esini Mungu iniri vu ogogo ku indi.

³Opianzi erini eri ma eselia ’diyi ovu kami owupi owu ’diyi; ’ba erini e’yo lipi ’diyi ovu obalako gbueru acipi ondresi ’diyi, yi kuni afa ma joloko o’bitini aluni ku.

⁴Nabi erini ’diyi ovu ’ba tokoru azini asuru indi; kuhani yini eza pari alatararu, yi eza azita ra.

⁵Yehova ovupi eri ma aliari ovu alatararu, eri ngani e’yo onzi ’ye ku; o’biti vusi eri e’yo liza ini kililiruri ece’i, angu emvea eceni ’yekokoru ku; te ’ba ovupi kililiru kuri nini drinza ku.

⁶Ma ja suru dri ’bo; abi kaliru yini izuru ’diyi ovu andruru; ma fe gboko yini du ’bo ’dini ’ba aluni agani ’dasi ku; ja aku yini dri ’bo, ’ba aluni ani ’dale yo, ’ba ripi vini aleniari yo.

⁷Ma ’yo kini, Adaru eri nga ma ru ra, eri nga imbata a’i ra; ka’dini pari eriniri ngani dri ja ku, e’yo dria mani azile e’yo erinisi ’diyi ngani avi ku. Te yi enga o’biti drio drio, yi eza ’yeta yini ’diyi dria teketeke ra.

⁸E’yo ’disi emi te ma, Yehova ’yo ra, kpere o’du mani ngazu engazu afa opazuria. Te e’yo mani otule asi mani ma alia ’yezuri eri suru okuzu, ’dini opi nyaza okuzu, aoko mani osuzu yi ma dria, adaru adra mani aciruri dria; wudrikuru driani ngale dri jale a’ya maniri ma acisirisi.

⁹Te o’du nderisi ma nga ti alaru omvi ’ba dria dri, ’dini yi dria ma omve ani ru Yehovani, azi ngazu eri dri asi alusi.

¹⁰Engazu yi raza Etiopiaa ’dayi ma tia ’aa’dasiria, ’ba matu o’bapi ma vu ’diyi, adaru ’ba mani yi erepi ’diyi ma zamvani nga afa feza eji ma dri.

¹¹O’du ’dasi mi ngani ovu drinzasi ’yeta mini ’yele azita mani ezapi ’diyi ma e’yosi ku; a’disiku o’du nderisi ma nga ’ba mi alia yi ’bapi afusi amboru ’diyi onze ra, mi ngani ovu afusi oni mani alatararuri dria dika ku.

¹²Te ma nga ’ba inzale, ovupi alioru’diyi ku mi eselia. Yi nga asi yini ’ba ru Yehovani

¹³’Ba joloko Israelini acepi ’diyi ngani e’yo ondiru ’ye aluni ku, ngani vini inzo li aluni ku indi; azini ngani andre lokiriruri isu yi ma tilia ku indi. Te yi nga nyaka nya, yi nga ola va, ’ba aluni ngani uri fe yi dri ku.

¹⁴Mi ngo ongo, Zioni zi la; mi otre, Israeli la! Mi ovu avikosi, mi ’ba nyona asi driasi, mi Yerusalemu zi la!

¹⁵Yehova nze e’yo lile mi ruaa ’diyi ’bo, eri o’be ari’ba mini ’diyi amve ’bo. Opi Israeliniri, adaru Yehova’i, eri ovu mi eselia; mi ngani ovu urisi e’yo onzisi dika aluni ku.

¹⁶O’du ’dasi yi nga ’yo Yerusalemu ma tia: Mi ru ku, Zioni la; mi fe mi dri ma aka okpo kokoru ku.

¹⁷Yehova Mungu miniri ovu mi eselia, eri’i ovupi okporu ’ba pazuri; eri nga ovu misi ayikosi asi ayikoru be, eri nga ovu ciri ale ini ma alia; eri nga ovu ayikosi misi ongo ngozasi.

¹⁸Ma nga ’ba ovupi candisi ’diyi oku okuza alatararu ma alia, yi ’ba ndra ovupi miniru ’diyi; teri ovupi eri driari ovu ndra a’dataru yi dri.

¹⁹Mi ne, etu ’dasi ma nga e’yo ’ba ’ba dria candi fepi mi dri ’diyi ma dria. Ma nga ’ba acozaru ’diyi opa ra, nga vini eri’i drole amve ’diyi oku ra, ma nga yi dri inzita pi fe ru be, yi’i yi ma drinzani kule wudrikuru dria ma dria ’diyi.

²⁰Etu ’dasi ma nga emi ofi, azini etu ’dasi ma nga emi oku tualu; te ma nga ru kuza pi fe emi dri inzita be suru nyakuni ’diyi ma eselia dria, etu nde mani ngazu ’ba emmi obile ati’baru ’diyi omvile dika emi ma miliarisi, Yehova ’yoni.