Read lugbara Hagai 2 Bible Online

Hagai 2 - lugbara bible

Hagai 2

¹Mba aziri ma o’du kali iri drini alusi, e’yo Yehovani nga eca geri nabi Hagai ma tiarisi kini,

²Mi olu curu’do Zerubabeli Sealitieli mvi, ambo ’ba dri cepi Yudaari pi ma tia, Yosua Yehozadaki mvi kuhani amboruri pie, ’ba acepi jolokoru ’diyi pie, kini,

³A’di ace: emi eselia jo ’diri ndrepi diza erini andra okori beni ya? Emi ndre eri curu’do ngoniru ya? Eri ovuni emi milia afa tokole ku ya?

⁴Te ti, mi ovu okporu, Zerubabeli la, Yehova ’yo ra; te mi ovu okporu, Yosua Yehozadaki mvi, kuhani amboruri la; te emi ovu okporu, emi ’ba, angu ndea ’diyi la, Yehova ’yo ra; emi nga azi, mani ovule emi berisi, Yehova asikari ongulumuruniri ’yo ra,

⁵ekile e’yo mani azile emi be emini ndra efuria Misiriarisirile; ma orindini adrizu emi eseliarisi; emi ru ku.

⁶A’disiku Yehova asikari ongulumuruniri ’yo ’dini: Ace o’du were ma nga ’bu pi oya pale alu dika nyaku pie, miri pie, angu a’wiru pie meli

⁷azini ma nga suru dria oya ra, afa suru driani lele tu ’diyi nga eca ra, te ma nga fe jo ’dorini gazu dizasi tre, Yehova asikari ongulumuruniri ’yo ra.

⁸Dahabu eri mani, mele eri mani indi, Yehova asikari ongulumuruniri ’yo ra.

⁹Jo ’dori ma diza ecapi vileri, eri nga diza okuri aga onyisi ra, Yehova asikari ongulumuruniri ’yo ra; te pari ’dori ma alia ma nga asi anzuru fe, Yehova asikari ongulumuruniri ’yo ra.

¹⁰Eli iri ewu Darioni opi nyazuri mi mba oromi ma o’du kali iri drini susi, e’yo Yehovani nga eca geri nabi Hagai tiarisi kini,

¹¹Yehova asikari ongulumuruniri ’yo ’dini: Mi zi ’ba edeta edepi ’diyi ma tia e’yo azitani kini,

¹²’Ba alu ka za alatararu ombe jizu bongo ini ma tia, te bongo nde ka enya elo, kani i’di, kani patiefi ma su, kani odu, kani nyaka azini, afa nde nga ovu alatararu ya? ’Ba edeta edepi ’diyi nga di omvi tinia, nga ’yo, Yo.

¹³Hagai nga di ’yo, ’Ba ovepi, alata kokoru ’ba drapi ’bori ma avusiri ka afa ’diyi ma azini elo ra, i afa nde nga ovu alata kokoru ya? ’Ba edeta edepi ’diyi nga e’yo omvi, nga ’yo ra, Eri nga ovu alata kokoru ra.

¹⁴Hagai nga di e’yo omvi, nga ’yo ra, ’Ba nde yi ’dinile, suru ’diri eri ’dinile indi ma milia, Yehova ’yo ra; azi dria yini ngale yi ma drisiri eri ’ dinile; azini afa yini fele edetaru ’daleri eri alata kokoru.

¹⁵Te curu’do, ma ’yo emi tia, emi ega e’yoni, engazu o’du ’diria azini drile. De nga ’ba ’bani oni alu oni azini ma dria hekalu Yehovani ma alia ku,

¹⁶o’du ’dayi ma alia dria, ’ba ka ecea nyaka okule go dria ecepi afa o’biza kali irisiri vu, isu de o’bizani yi mudri a’dule; te ’ba ka ecea obi patiefi ma su ma ta mbapiri vu lezu patiefi ma su ebezu gbere kali towi, isu gbere yi kali iri a’dule.

¹⁷Ma co emi oli aciru afani ’wizuri pisi, ozoo afani mazuri pie, si pie, azi emini ’yele emi ma drisiri ma alia dria; te ti, emi ojani emi ma vu ku, Yehova ’yo ra.

¹⁸Emi ega e’yoni, ma zi emi tia, engazu o’du ’diria azini drile, engazu mba oromi ma o’du kali iri drini susi, engazu i o’du ’bani hekalu Yehovani ma eti ’bazurisi, emi ega e’yoni:

¹⁹Ori ovu nga eroa ’dani ya? Adaru zabibu pi, elio pati pie, pati pomegraneteni pie, yi kani nga pari mizeituni be ku; te engazu o’du ’disi ma nga asi ndriza fe emi dri.

²⁰E’yo Yehovani nga eca Hagai vu pale irisi, mbao’du kali iri drini susi, kini,

²¹Mi olu Zerubabeli ambo ’ba dri cepi Yudaari ma tia kini, Ma nga ’bu pi oya nyaku be; i

²²te ma nga suru ma oguna ogu va, ma nga suru ’ba juruni ma okpo dri ja ra; ma nga gari ombani ogu ra ’ba nzupi alenia ’diyi be; te akanya piyi ’ba nzupi drinia ’diyi be, yi dria alu alu nga e’de va adripi yini ma sei ma sia.

²³Yehova asikari ongulumuruniri ’yo ra kini, O’du ’dasi ma nga mi ’du, Zerubabeli Sealitieli mvi, ati’bo mani la, ma nga mi ’ba ekile driadriamva eceta be ruaarile; mani mi pele ’borisi, Yehova asikari ongulumuruniri ’yo ra.