Read lugbara Zekaria 14 Bible Online

Zekaria 14 - lugbara bible

Zekaria 14

¹Mi lu, odu Yehovani eri emu emu, eri o’du yini ngazu nu lafa pale ombasiri awazu mi aliari’i.

²Mani ngale suru dria okule Yerusalemu ma dria a’di ’dizurisi; yi nga aku bi ra, nga afa jo alia ’diyi pie opa, nga oku uru okposi indi; aku amboru nde ma alini nga mu ati’baro, te yi ngani ’ba joloko acepi ’diyi ofu aku nderiasi ku.

³Yehovani di nga efu a’di ’dizu suru nde ’dayi be kile erini ndra ja’di ’dile o’du ombenisirile,

⁴Eri nga di pa so o’du nde ’dasi oni Mizeituni ovupi Yerusalemu ma drilia etuni efurialeruri ma dria; oni Mizeituni nga ani i asi agadua etuni efurialeru azini etuni ’derialeru, eri nga ofu e’bu ambo turiru; oni nde ma egalapi aluri nga i esi angu andralerurialeru, aziniri angu urulerurialeru.

⁵Te emi nga apa oni i ma vile ’diyi ma e’buarisi, e’bu oni nderini ngale cale kpere Azele vurisi; ada emi nga apa kile ndra emini apale oyakiasi o’du Uzia opi Yudaarini ma aliarile. Te Yehova Mungu mani nga emu, azini ’ba dria alatararu ’diyi mi be.

⁶Eri nga eca o’du nde ’dasi ’dini, diza ngani di angu ’izu ku, angu ngani bi iniru ku indi.

⁷Te eri nga ovu o’du alu (ovupi nizaru Yehova driri’i), etunia yo, ininia yo; te eri nga eca ’dini, ondresi dizani nga ovu indi.

⁸Azini eri nga eca o’du ’dasi ’dini, yi idriruri nga fu Yerusalemuarisi ra, egalapi yini nga ovu miri etuni efurialeruri vuleru, aziniri miri etuni ’derialeruri vuleru, eri nga ovu ’dani elisi ayisi dria.

⁹Yehovani nga di ovu opiru nyaku dria ma drilia; o’du nde ’dasi Yehovani nga ovu alu, ru erini nga ovu alu indi.

¹⁰Angu dria nga i oja kile Arabale, engazu Gebaarisi cazu Rimoni Yerusalemu ma kala uruleruriaria. Te eri nga ovu engazaru uru, eri nga ovu i ma paria engazu kalitile Benyamini vileria kpere pari kalitile okoriniria, kpere kalitile ojiniria, engazu jo izuru Hananelinia kpere pari opi vile patiefi su nzizuria.

¹¹’Ba nga ovu alenia ra, tritani nga ovu dika yo; te Yerusalemuni nga adri e’yo ’yasi ’dani.

¹²Azo muaru Yehovani ngazu ani ’ba a’di ’dipi Yerusalemu be ’diyi ma dri jazuri ’di: za yi ma ruaari nga nzu ra de yini pa soria, yi ma mileefi nga ma mile jorovu ma alia, yi ma andreni nga ma yi ma tilia ra.

¹³Eri nga eca o’du ’dasi ’dini, candi amboru engapi Yehova vuri nga ovu yi ma eselia ’ba dria alu alu nga i agyi ma dri bi, nga i dri enga agyi ma dri be ombaru indi;

¹⁴te Yudani indi nga a’di ’di Yerusalemu be ra. Yi nga afa dria suru nde ageinia ’diyini ovuzu yi beri oku tualu, mele pi, dahabu pie, bongo pie karakarau.

¹⁵’Dinile indi azo muaru akanya pi ma ruaa, akanya farasiruri pie, ngamia pie, akanya gaari pie, anyapa dria ngapi ovupi pari hema asozu ’dayi ma alia ’diyi pie dria nga ovu alu mua azo ’dirile,

¹⁶Te eri nga ecea ’dini, ’ba dria alu alu acepi suru dria ndra emupi a’di ’dipi Yerusalemu be ’diyi ma eseliari nga tu eli vusi eli vusi Opi Ambo, Yehova asikari ongulumuruni inzizu, azini omu nyale borokoari ’bazu indi.

¹⁷Te eri nga ovu ’dini, ’ba dria alu alu ori’ba suru angu wudrikuruarini ma aliari ka tu uru Yerusalemua Opi Ambo, Yehova asikari ongulumuruniri inzizu ku, ozoo ngani ’di yi vile angua ku.

¹⁸Ori’ba Misiria ’diyi ka tu ku, ka emu ku, eri ngani ’di yi vile ku; te azo muaru Yehovani ngazu suru tupi uru omu nyale borokoari ’bapi ku ’diyi ofuzuri nga ovuni.

¹⁹Panga onzi Misirini azini panga onzi suru dria tupi uru omu nyale borokoari ’bapi ku ’diyini nga ovu ’dini.

²⁰O’du ’dasi a’di akanya ombelea ’diyi nga yi si ’dini, ALATARARU YEHOVA DRI. Azini imvu Yehova vile joa ’diyi nga ovu kile awaja pari edeta edezuri ma driliarile;

²¹ada, imvu dria Yerusalemu pia Yuda be ’diyi nga ovu alatararu Yehova asikari ongulumuruniri dri; azini ’ba ’dria edeta edepi ’diyi nga emu yi o’du ra, afa a’dizu yi ma alia. O’du ’dasi ’ba Kananini ngani ovu ’dale jo Yehova asikari ongulumurunirini ma alia aluni ku.