Read lugbara Zekaria 4 Bible Online

Zekaria 4 - lugbara bible

Zekaria 4

¹Malaika nde e’yo ’yopi ma beri nga emu dika, nga ma oro, kile ’ba ’bani orule o’duasirile.

²Eri nga ’yo ma tia, Mi ndre a’di afani ya? Ma ’yo, Ma ndre ra, mi ne, eri tala pati ruani dria meleru, kopo erini pie drinia, tala erini aziri ’diyi be; tala nde ’diyi ma baka ale be huru ’diyi aziri indi tala alu alu ovupi drinia ’diyi vusi.

³Azini mizeitu pati iri ageinia, alu kopo ma dri ndiria, aziniri eri ma dri ejiria.

⁴Ma nga e’yo omvi ’yo malaika e’yo ’yopi ma beri ma tia kini, Opi mani la! afa ’diyi a’di afani ya?

⁵Malaika nde e’yo ’yopi ma beri nga di e’yo omvi ’yo ma tia kini, Mi nini afa ’diyi a’di afani yari ku? Ma ’yo ra, Yo, opi mani.

⁶Eci nga di e’yo omvi ’yo ma tia kini, ’Diri e’yo Yehovani ’yole Zerubabeli ma tiari, kini: Asikari ma okposi ku, kani okpo ruanisi ku, te Orindi manisi, Yehova asikari ongulumuruniri ’yoni.

⁷Mi a’di’i ya, oni amboruri la? Mi nga mi oja angu senderu Zerubabeli ma drilia; azini eri nga oni drini ecipi tualuri eji oyuzu kini, Asi anzuru, asi anzuru eri vu!

⁸’Dinile vini indi e’yo Yehovani eca ma vu kini,

⁹Zerubabeli ma dri ’ba jo ’diri ma eti ’bo; eri ma drini nga eri denio Mi nga di ni ani kini Yehova asikari ongulumuruni epe ma ti mi vuni.

¹⁰A’di onzo ani o’du afa were ’diyinini ya? te yi nga ovu ayikosi, yi nga baka jo abi o’bizuri ndre Zerubabeli ma dria ra. Te afa teka aziri ’diyi yi mile Yehovani, onzupi ’dole ’dale wudrikuru dria ma eselia.

¹¹Ma nga di e’yo omvi, ’yo tinia kini, Mizeitu pati iri tala pati ma kala dri ndiria azini dri ejiria ’diyi a’di afani ya?

¹²Te ma omvi e’yo tinia pale iririsi kini, Mizeitu pati arakala iri ovupi tala ma ti meleru ’diyi ma kalaa, odu meleru yi ma aliari osupi ’diyi a’di afani ya?

¹³Eri nga di e’yo omvi ma tia kini, Mi nini afa ’diyi a’di afani yari ku ya? Ma kini, Opimanila,maninikufo!

¹⁴Nga di ’yo ani, ’Diyi ’ba iri odu osuzu yi ma dria pa sopi Opi wudrikuruniri ma ageia ’diyi.