Read lugbara Zekaria 5 Bible Online

Zekaria 5 - lugbara bible

Zekaria 5

¹Te ma enga vini ma mile uru dika, ma ndre, mi ne, enyiriko trale trari sa ’bua!

²Eri nga ’yo ma tia, Mi a’du ndre ya? ’Dini ma omvi kini, Ma enyiriko trale trari ndre saja ’bua; oconi wuale kali iri, walani wuale mudri.

³’Yo ma tia ’dini kini, ’Di trita efupi wudrikuru ma dri ’depi piri’i; ’dini enyiriko ma woko alurini ’yolerile ’ba dria alu alu ogu ogupiri nga dri jani, te woko azinirini ’yolerile ’ba dria alu alu oyo sopi nga dri jani.

⁴Ma nga eri ofu, Yehova asikari ongulumuruni ’yoni, eri nga di fi oguou nde ma joa, azini ’ba oyo sopi inzosi ma rusiri ma joa indi; eri nga te eri vile jo ma alia, nga eri oki, pati pie oni ruania ’diyi pie dria.

⁵Malaika o’yopi ma beri nga di fu mu, ’yo ma tia kini, Mi enga di mi mile uru curu’do, mi ndre afa i efupi ’diri a’duni yani.

⁶Ma ’yo kini, Eri a’dini ya? Azini eri ’yo kini, ’Diri imvu obiruni, eri efuni. Eri nga ’yo vini indi, ’Diri e’data yini angu dria ma alia.

⁷Azini mi lu, yi nga onzi ayaru obi ma ti opizuri ’du uru, de oku indi riria obi nde ma alia!

⁸Eri nga ’yo, ’Di E’yo Onzini. Nga di oku nde ’be obi alia ra, nga onzi ayaru obi ti opizuri ’be tinia ci.

⁹’Dini ma enga di ma mile uru, ma ndre, azini mi ne, oku iri efuni! Oli ovu yi ma opilia ci; curu’do isu de yi ovu opile be kile otonoko ma opilele; ’dini yi nga obi nde ’du uru nyaku pi ma esele ’bu beria.

¹⁰Ma zi di ani malaika e’yo ’yopi ma beri ma tia, ’Ba ’diyi obi ji ngoa ya?

¹¹Eri ’yo ma tia, Jo sizu eri dri angu Sinariniria; ka si ’bo, yi nga eri ’ba ’dale eri ngulupi ma paria.