Read lugbara Zekaria 6 Bible Online

Zekaria 6 - lugbara bible

Zekaria 6

¹Ma enga ma mile uru dika, te mi lu, ma ndre gari su ombani ’diyi, ibi efu oni iri ma leselia; oni nde oni molaru ’diyi.

²Gari ombani okori ma alia akanya ekaru ’diyi indi; gari iriri ma alia akanya iniru ’diyi;

³gari nari ma alia akanya emveru ’diyi; gari suri ma alia akanya funyi funyi okporu ’diyi.

⁴Ma nga di e’yo omvi ’yo malaika nde te o’yopi ma beri ma tia, Opi mani, afa ’diyi a’dini ya?

⁵Malaika nde nga e’yo omvi ’yo ma ria, ’Diyi ovu oli su ’bua fupi engazu pa soria Opi wudrikuruniri ma drilia ’diyi.

⁶Gari ombani akanya iniru ’diyi beri fu mu angu andraleruria; emve ’diyi mu yi ma vutisi; te funyi funyiru ’diyi fu mu angu uruleruria.

⁷Eka ’diyi fu ra, nga o’hi muzu, ’dini yi ma ad ’dale ’dole nyaku ma eselia beni. Eri ’yo yi tia, Emi nga ’diarisi ra, emi ad ’dale ’dole nyaku ma eselia. Yi nga di aci ’dale ’dole nyaku ma eselia ani.

⁸’Dini eri wu ma vu, ’yo ma tia kini, Mi lu, ’ba mupi angu andraleruria ’diyi fe ma orindini ovuzu ndi angu andraleruria ’bo.

⁹Te e’yo Yehovani eca ma vu kini:

¹⁰Mi a’i afa ’ba obile ati’baru ’diyi vu, yi Helidai pi, Tobiya pie, Yedaya pie, mi emu coti o’du ndesi, mi fi Yosia Zefania mvi vile joa, pari yini ecazu alenia engazu Babuloniasiri’i,

¹¹Ada, mi a’i yi vu dahabu pi mele be, mi ede oku, mi su eri Yosua Yehozadaki mvi, atalau amboru edeta edepiri ma dria;

¹²mi nga e’yo ’yo tinia kini, Yehova asikari ongulumuruni ’yo ’dini kini, Mi lu, agu omvele Pati Arakala’iri: eri nga co uru pari erini ma alia, eri nga hekalu Yehovani si ra.

¹³Ada, eri nga hekalu Yehovani si eri’i; eri nga diza su, eri nga ri oguna ini ma dria opi nyazu. Eri nga ovu atalau edeta edepiriru oguna erini ma dria, te e’yo amaza asi anzuruni nga ovu yi ma eselia iritro.

¹⁴Oku nde ’diyi nga ovu Helemu pi dri Tobiya Pie ’Yedaya pie, Heni Zefania mvi pie, fezu e’yo nde egazu hekalu Yehovani ma alia.

¹⁵Te ’ba ovupi re ’diyi nga emu jo nde sizu hekalu Yehovani ma alia; azini emi nga ni ani kini Yehova asikari ongulumuruni epe ma ti emini vuni. E’yo ’di nga eca ’dini emi kai nga Yehova Mungu emini ma o’duko inzi asi driasi raria,