Read lugbara Zekaria 8 Bible Online

Zekaria 8 - lugbara bible

Zekaria 8

¹E’yo Yehova asikari ongulumurunirini eca ma vu kini,

²Yehova asikari ongulumuruni ’yo ’dini: Ma ovu a’yasi Zioni ma e’yosi, a’ya amborusi, ma ovu a’yasi erisi adra amborusi.

³Yehova ’yo ’dini: Ma emvi Zionia ’bo, ma nga ovu Yerusalemu ma alia agadua, te Yerusalemuni nga ovu omvezaru aku e’yo adaruniri’i; azini yi nga oni Yehova asikari ongulumurunirini omve oni alatararuri’i.

⁴Yehova asikari ongulumuruniri ’yo ’dini ra: Mbaza yi nga adri dika oku dezaru ’diyi be gboko Yerusalemunia ’dale ra, ’ba dria alu alu lote ini be dria, deza ma e’yosi.

⁵Azini gboko aku amboru ndea ’diyi nga ga tre agupianzisi ezoanzi be, yini avita aviria gboko nde ’diyi ma alia.

⁶Yehova asikari ongulumuruniri ’yo ’dini: Eri ka ovu osutaru ’ba joloko acepi’diyi ma milia o’du ’dayisi ti, eri te nga ovu osutaru ma milia indi ya?

⁷Yehova asikari ongulumuruni ’yo ’dini: Mi lu, ma nga ’ba mani opa engazu angu etuni efurialeruri piasi angu etuni ’derialeruri be;

⁸ma nga yi eji ra, yi nga ovu Yerusalemu ma alia; yi nga ovu ’ba mani, te ma nga ovu Mungu yiniru e’yo adal’uri pi ma alia e’yo kililiruri be.

⁹Yehova asikari ongulumurunii ’yo ’dini: Emi dri ma mba okporu emi ’ba e’yo nabini ’yole ’diyi eripi o’du ’diyisi, engazu o’du ’bani jo Yehovani ma eti ’bazu hekalu ’ diri ma ovu sizaru ani benirisi ’diyi.

¹⁰A’disiku de nga o’du ’dayi ecani ku, oya ’ba dri yo, anyapa dri yo indi; te asi anzuru ndra ’ba fupi amveri pi dri ’ba efipiri be yo, ari’ba ma e’yosi: mani ’ba dria alu alu ma asi ’bale yi agyi ma ruaa onzirisi.

¹¹Te curu’do ma ngani ovu suru ’diri ma joloko acepiri vu kile ndra mani ovule o’du oko ’dayisirile ku, Yehova asikari ongulumuruni ’yo ra.

¹²Te ori asi anzuruniri nga ovu indi; zabibu patini nga efi ka ra, nyakuni nga ezuzani fe ra, ’buni nga ini andreli fe ra; ma nga fe suru ’diri ma joloko acepiri ma a’i afa ’diyi dria awurusoru.

¹³Te eri nga di eca ’dini, kile emini ndra ovule tritani suru ’diyi ma eselia, suru Yudani lao azini suru Israelini la! ’dini ma nga emi ’opa, emi nga ovu asi ndrizaru. Emiru ku, te emi dri ma mba okporu.

¹⁴Te Yehova asikari ongulumuruni ’yo ’dini: Kile mani ndra e’yo onzi egale ’yezu emi dririle, o’du ndra emi a’bipini adra mani engazurisi, Yehova asikari ongulumuruni ’yo ra, te ma ojani ndra ma ku;

¹⁵ma ega vini dika o’du ’diyisi e’yo onyiru ’yezu Yerusalemu pi vu suru Yudani be ’dini; emi ru ku.

¹⁶Te afa emini ngale ’yele ’diyi yi ’di: emi ’ba dria alu alu ma ’yo e’yo ada ’ba i ma jo ejeleari be, emi ma li e’yo liza adaruri asi anzuruniri be kalitile emini ma alia’i,

¹⁷azini ’ba aluni emi eselia ma ega e’yo onzi ’ba i ma jo ejeleari ruaa ku, emi ma le oyo sole inzosiri aluni ku, afa ’diyini ovule dria afa mani ngule onzi ’diyirisi, Yehova ’yo ra.

¹⁸Te e’yo Yehova asikari ongulumuruni nga eca ma vu kini,

¹⁹Yehova asikari ongulumuruni ’yo ’dini: Nyaka ’daza mba susiri pi, nyaka ’daza mba towisiri pie, nyaka ’daza mba azirisiri pie, nyaka ’daza mba mudrisiri pie dria nga yi oja suru Yudani dri ayiko pi nyona pie, azini omu ayiko be turiru; e’yo ’disi emi ma le di e’yo ada pi e’yo asi anzururi be.

²⁰Yehova asikari ongulumuruni ’yo ’dini: Eri nga kiri eca ’dini kini, suru azini ’diyi nga emu ra, azini ’ba ovupi aku ambo ambo kakau ma alia ’diyi;

²¹te ’ba aku amboru aluri ma alia ’diyi nga mu aziniri vu ’yozu kini, Ama ma mu mbele matu ’bazu asi ndriza Yehovani a’izu, Yehova asikari ongulumuruni ndruindi; ma nga mu alu indi.

²²Ada ’ba kakau, suru okporu ’diyi pie, yi nga emu Yehova asikari ongulumuruni ndruzu Yerusalemua, matu ’bazu asi ndriza Yehovani a’izu.

²³Yehova asikari ongulumuruni ’yo ’dini: O’du ’dayisi eri nga di emu eca ’dini, ba mudri engapi suru dria ti ndu ndu ’yopiri ma eselia ’diyi nga ’ba Yahudiruri ma bongo ma ti bi ’yozu kini, Ama nga mu emi be, a’disiku ama eri kini Mungu ovu emi be.