Read lugbara Malaki 3 Bible Online

Malaki 3 - lugbara bible

Malaki 3

¹Mi lu, ma pe ojio mani ma ti, eri nga geri ede ma drilia, te Opi emini ndaleri nga emu mbelekocici hekalu iniria; ojio azizani emini ovuzu ani ayikosiri, emi ne, eri emu emu, Yehova asikari ongulumuruniri ’yoni.

²Te a’dini nga eco adrizu ’dani, o’du erini emuzuriani ya? A’dini nga pa so erini i e’dariani ya? Te eri ovu ekile aci ’ba aya edepi alarurinirile, azini ekile ’ba bongo ojipi emveruri ma sabunile;

³eri nga ri ekile ’ba dahabu edepi acisi eri ’bapi alarurile, te eri nga Levi anzi ’ba alaru, yi edezu alaru ekile dahabu pile mele berile, yi nga ani edeta alatararu ’diyi fe Yehova dri onyi ma alia.

⁴Ewu ndesi edeta Yuda pini fele Yerusalemu beri eri nga di ovu ayikoru Yehova ma milia, ekile o’du ndra drio ’diyisirile, ekile eli ndra drio ’diyisirile indi.

⁵Te ma nga esi emi vu ogogo e’yo lizu; ma nga e’yo eti nze mbele olcou piyi ma ruaa, ’ba ali o’bapi ’diyi pie, ’ba oyo sopi inzosi ’diyi pie, ’ba ’ba azi ngapi yi dri oyasi ’diyi ’yepi onzi oya ofezasi ’diyi pie, ’ba awuzi pi onzopi imvoanzi be ’diyi, azini ’ba ani’ba gbopi kalaa ’diyi pie, ’ba ma rupi ku ’diyi pie, Yehova asikari ongulumuruniri ’yoni.

⁶Te ma’i, Yehova, ma ojani ma ku; e’yo ’disi, emi Yakobo anzi la, emi jani nga dri ku ’di.

⁷Engazu ewu emi a’bipinisi ecazu kpere curu’do, emi oja emi kalaa azita mani ’diyi kuzu ra, emi mbani yi ma ta ku. Emi emvi ma vu, ma nga ani mvi emi vu indi beni, Yehova asikari ongulumuruniri ’yoni. Te emi kini, Ama nga emvi ngoni ngoni ya?

⁸’Ba yi afa Munguni ogu ra ya? Te kiri emi ogu afa mani ra. Te emi ’yo kini, i Ama ogu afa mini a’dusi ya? Afa emini mudri ma esele aluri piyisi, afa feza be.

⁹Ma tri emi atrinasi, emini afa mani ogulerisi; adaru suru ’diri dria.

¹⁰Emi ma eji afa emini mudri ma esele alu ’diyi pi pi, o’bazu ero ma alia, ’dini nyaka ma ovu ma vile joa ci beni; emi ma o’bi di ma e’yo nderisi, Yehova asikari ongulumuruniri ’yoni, ma ngani ’bu ti ozi emi dri ku, drileba osuzu emi dria, ’dini pari ngani ca drileba ndeni ku ya?

¹¹Ma nga ega ’ba afa ezapiri ma dria e’yo eminisi, eri ngani efi nyaku eminini kale ’diyi eza ko kani pati raza emini amvu alia ngani ece efi kakokoru ku indi, Yehova asikari ongulumuruniri ’yoni.

¹²Suru dria nga emi omve ayiko’baru, emini ngale ovule angu ayikoru turisi, Yehova asikari ongulumuruniri ’yoni.

¹³Emi ti mba ma ruaa tu, Yehova ’yoni. Te emi ’yo nga, Ama ti mba mi ruaa e’yo ngosi ya?

¹⁴Emi ’yo ’bo kini, Mungu dri azi ngazuri eri ovu toko. Ama ani a’di orodri isu ya, amani azita erini ma ta mbazu, amani acizu vini candi be Yehova asikari ongulumuruniri ma milia ya?

¹⁵Azini curu’do ama, omve ’ba afu beri ayikoru; e, ’ba azi onzikanyaru ngapi ’diyi yi ovu ’bazaru uru, e, yi Mungu o’bi ra te yi apa ra.

¹⁶Etu nderisi ’ba Mungu rupi ’diyi yi ’yo e’yo yi ma eselia ceni ceni; Yehova co i bile, eri yi ra, azini buku e’yo egazuri ovu sizaru eri ma drilia, ’ba Yehovani rupi ’diyi sizu, azini ’ba ru erini ma e’yo egapi ’diyi indio

¹⁷Te yi nga ovu mani, Yehova asikari ongulumuruniri ’yoni, adaru yi nga ovu lonyi ma ngulupini O’du mani e’yo ’yezurisi, azini ma nga yi ma ta mba ekile aguni i mva lazi ngapi i driri ma ta mbalerile.

¹⁸Etu ’dasi emi nga emvi, azini emi inga ni ’ba onyiru ’diyi ma esele cozu onzi ’diyi pie, azini ’ba azi ngapi ’Mungu driri pi ma esele cozu ’ba azi ngapi eri dri kuri be.