Read lugbara Matayo 10 Bible Online

Matayo 10 - lugbara bible

Matayo 10

¹Eri nga ’ba erini imbale mudri drini iri ’diyi omve i vu, eri nga okpo fe yi dri orindi onzi odrozu, azini azo dria atizu dra be dria.

²’Ba ti opele mudri drini iri ’diyi ma ru yi ’di’i: okori Simoni omvele Petero’i ri pi adripi erini Andarea be; Yakobo Zebedayo mvi pi adripi erini Yohana be;

³Filipo pi Baritolomayo be; Tomasi pi Matayo ’ba musoro sopi be; Yakobo Alifayo mvi pi. Tadayo be;

⁴Simoni Kananiari pi Yudasi Isikarioteni, ’ba eri o’di nyapiri be.

⁵Yesu nga ’ba mudri drini iri ’diyi ma ti pe, nga e’yo azi yi tia kini, Emi fi geri ’ba jurunia ku, emi ma fi vini ’ba Samariaa ’diyi ma akua ku indi,

⁶te agapiri emi mu suru Israelini ma kabilo avipi ’diyi vu,

⁷Te emini muria emi olu e’yo, ’yozu kini, Suru buari eri eca emi vu ogogo ’bo

⁸Emi ati ’ba rua onzi be ’diyi, emi enga ’ba draza, emi ’ba ’ba ofu be ’diyi alaru, emi odro orindi onzi, ’Ba fe emi dri toko, emi fe ’ba dri toko indi.

⁹Emi ma ji mele pi, dahabu pie, mola be enyi emi opileari ma alia ku;

¹⁰emi ’du jurua acitaniri pi, koti iri pie, enyiriko paari pie, kali pie dria ku; te onyiru ’ba azi ngapiri ma isu nyaka erini.

¹¹Aku amboru kani were emini fizu aleniaria dria, emi ndru ’ba onyiru aku nderi ma alia, emi la ’daa de nga emi funi ku.

¹²Emi ka fi joa, emi zi yi ci.

¹³Te jo ka ovu onyiru, asi anzuru emini ma ovu eri ma dria; te eri ka ovu onyiru ku, asi anzuru emini ma emvi emi vu.

¹⁴Te ’ba azini ka emi a’i ku, ka e’yo emini ’yoleri eri ku, emini furia jo ’daria, kani aku ’daria, emi oya irifura emi paari,

¹⁵Ma ’yo emi tia ndi, o’du e’yo lizurisi candi aku ’darini nga candi angu Sodomu pini Gomora beri aga ra.

¹⁶Emi lu, ma emi ti ope ekile kabilo ’balau eselia; emi ma ovu di ondua be ekile urile, azini e’yo onzi kokoru a’balaule.

¹⁷Emi te emi agei ’ba ma e’yosi; te yi nga emi fe ’ba e’yo amapi ’diyi dri, yi nga emi co pari yini yi okuzuria,

¹⁸yi nga emi ji ’ba ’ba dri cepi ’diyi pi ma milia opi amboru be ma rusi, emini e’yo eti nzezu yi dri, ’ba jururu ’diyi dri indi.

¹⁹Te yi ka emi fe ra, emi asi ma oti geri ngoni, kani e’yo ngoni, emini ngale ’yolerisi ku; e’yo emini ngale ’yoleri nga ovu fezaru emi dri etu ’dasi;

²⁰te ovuni emi’i e’yo ’yozu ku, te Ati eminima Orindinie’yo ’yo emi aliani.

²¹Adripini nga adripi fe drazu, atini nga mvani fe indi, anzi yi nga enga ’ba yi tipi ’diyi ma ruaa yi fezu drazu;

²²’ba dria yi nga emi ngu onzi ma rusi. Te ’ba ka ovu asi teza be kpere ewu asizaniria, eri nga i pa ra.

²³Te ’ba ka emi inza aku ’dari ma alia, emi apa aku azini vu, te ma ’yo emi tia ndi, econi emini aku dria Israelini dezaru ku, de nga Mvi ’bani ecani ku.

²⁴’Ba yini imbaleri agani ’ba eri imbapiri ku, ati bo agani opi erini ku;

²⁵fu dri ’ba yini imbaleri dri ovuzu ’ba eri imbapirile, ati’boni ovuzu opi erinile. ’Ba ka ndra jo e’ini omve Beelizebuli’i, yi ngani ’ba eri ma joa ’diyi omve ’dini aga ra ku ya?

²⁶ Te emi ru yi ku; afa opizaruri aluni ngani ovu e’dakokoru ku, azini afa zizaru dria nga ovu nizaru.

²⁷E’yo mani ’yole emi tia ini aliari, emi ma olu diza alia; e’yo emini erile emi bileari, emi oyu uru jo dria.

²⁸Emi ru ’ba rua fupi ra, te ecopi orindi fupi ku ’diyi ku; te agapiri emi ru ’ba ecopi orindi pi dri japi rua be Jehanumaari’i.

²⁹Burua iri ’ba jeni sente alusi ku ya? Te alu yi ma eselia e’deni nyakua emi atini nikokoru ku.

³⁰Te ka dribi efi emi dria ’diyi ti, yi ovu dria lazaru.

³¹E’yo ’disi emi asi ma oti ku; emi aga burua kakau onyisi ra.

³²’Ba dria ma e’dapi ’ba ma miliari, ma nga vini eri e’da ma Ati ovupi ’buari ma milia ra;

³³te ’ba dria alu ma gapi ’ba ma milia siri, ma nga vini eri ga ma Ati ovupi ’buari ma milia si.

³⁴Emi osu ma eca asi anzuru ejizu nyakua ’dini ku; ma eca asi anzuru ejizu ku, te seini.

³⁵Te ma eca esele coza ejizu ’ba pi ma eselea ati be, zamva pi andri be, idria pi edra be;

³⁶azini ’ba ma ari’ba yi ’ba eri vile joa ’diyi.

³⁷’Ba azini ka ati kani andri le aga ma ra, eri funi dri masi ku; ’ba azini ka i mvi kani i zi le aga ma ra, eri funi dri masi ku;

³⁸’ba ka pati eri dizuri ’du ma vuti bizu ku, eri funi dri masi ku.

³⁹’Ba ka idri erini isu ra, eri nga eri avi ra; te ’ba ka indri erini avi masi, eri nga eri isu ra.

⁴⁰’Ba emi a’ipiri a’i ’ba ma ti pepiri’i.

⁴¹ba na’bi a’ipi ru nabinisiri nga nabi ma oya isu ra.

⁴²’Ba ka yi mvuza ambizaru fe ’ba nyiri ’diyi ma azi dri, ’ba imbaleri ma, rusi a’dule, ma ’yo emi,tia ndi; ndi, oya erini ngani avi aluni ku.