Read lugbara Matayo 13 Bible Online

Matayo 13 - lugbara bible

Matayo 13

¹O’du ’darisi Yesu nga fu joa, rizu miri tia.

²’Ba ongulumuru kakau nga yi oku eri vu, e’yo ’disi eri nga fi oguru ma alia, nga ri va; ’ba ongulumuru de oso pa cinya dria miri tia.

³Eri nga e’yo olu yi tia kakau e’yo o’bezasi, kini: Mi ndre, ’ba ori ripiri fu ori rio

⁴Te erini riria, ori azini o’de geri tia, aria nga emu o’de geri tia,aria nga emu o’du,nya ra.

⁵Azini o’de kata dria, pari nyakuni ovuzu wereria, yi enga mbele, nyakuni ovule aliru kurisi,

⁶etuni efuria, ve yi ra; te yini ovule ola kokorurisi, ’wi ra.

⁷Azini nga o’de oci alia, oci nga zo uru yi ondrizu.

⁸Azini nga o’de nyaku onyiru ma alia, yi nga ’ya ra, azini turu alu, azini kali azia, azini kali na.

⁹’Ba bile beri ma eri.

¹⁰’Ba erini imbale ’diyi nga eca eri vu nga ’yo eri tia, Mi e’yo olu yi tia e’yo o’bezasi a’disi ya?

¹¹Eri nga e’yo omvi, ’yo yi tia, Eri ovu fezaru emi dri e’yo ziza suru ’buarini nizu, te ovuni fezaru ’ba nde ’diyi dri ku.

¹²Te ’ba ka ovu afa be, yi nga fe eri dri, eri nga aga afa be kakau; te ’ba ka ovu afa kokoru, yi nga afa ovupi eri beri pa ra.

¹³E’yo ’disi ma e’yo olu yi tia e’yo o’bezasi, a’disiku yini ndreria ra ti, yi ndreni ku, yini eriria ra ti, yi erini ku, yi va vini ku.

¹⁴Te e’yo ndra Isayani ondrileri eca yi vu ’yeke, kini: Erizaruni, emi nga eri ra, te emi ngani va aluni ku; luzaruni, emi nga lu ra, te emi ngani ndre ku.

¹⁵A’disiku suru ’dori ma asi ovu osoru, yi bilesi yi erini e’yo piri ku, yi bi mile yini ci, yi kazu angu ndrezu yi milesi ku, yi kazu erizu yi ma bilesi ku, yi kazu e’yo vazu yi asisi azini yi asi ojazu ku, mani yi atizu ani beni.

¹⁶Te emi mile yi drilebaru, yini ndrelerisi: emi bile, yini erilerisi,

¹⁷Ma ’yo emi tia ndi, nabi kakau ’ba kililiru ’diyi be le afa emini ndreleri ndre avasi, te yi ndreni ku; le e’yo emini erileri eri, te yi erini ku.

¹⁸Emi eri e’yo o’beza ’ba ori ripirini ani.

¹⁹’Ba azini ka e’yo suruni eri ra, ka va ku, ’ba onzi nga eca, nga ori rile eri asiari pa ra; ’diri bani ’ba rile geri tiari’i.

²⁰Rile kata driari eri ’ba e’yo eripi, eri a’ipi mbele ayikosiri’i;

²¹te eri ovuni ola be i alia ku, eri ovu o’du were, te candi pini ecaria inzata be e’yo nde ma e’yosi, eri nga aba coti.

²²Rile oci aliari eri ’ba e’yo eripiri, te asisile drozu e’yo nyakuni ma driari pi lokiri lonyini be nga e’yo nderi, ondri ra, eri nga ovu efi ’yakokoru ani.

²³Rile nyaku onyiru ma aliari eri ’ba e’yo eripi, vapi indiri; eri nga efi ’ya ada, ’yazu aziniri turu alu, aziniri kali azia, aziniri kali na.

²⁴Eri nga e’yo o’beza azini o’be yi dri, kini, Suru ’buari ovu ekile ’ba ori onyiru ripi amvu ini aliarile;

²⁵te ’bani o’du koria, ari’bo erini nga emu regi rizu anya alia, nga mu ra.

²⁶Te anya ka enga ra, ka ra, regi nga di yi e’da ra.

²⁷Ati’ba jo e’ini nga eca, ’yo eri tia, Opi, mi irini ndra ori onyiru amvu mini alia ku ya? Isu di regi ngoa ya?

²⁸Eri nga ’yo yi tia, Ari’bo ’ye e’yo ’dirini. Yi nga ’yo eri tia, Mi le ama mu yi oku ya?

²⁹Te eri ’yo, Ku; emini regi okuria emi kazu ’du okuzu indi ku.

³⁰Emi ku yi ma,zo dria tualu cazu etu lozuria; ewu lozurisi ma nga ’yo ’ba anya lopi ’diyi ma tia, Emi oku oko regi, emi ombe ngulu vezu acisi, te ’duruni emi oku ero mania.

³¹Eri nga e’yo o’beza azini o’be yi dri, kini, Suru buari eri ovu ekile haradali efi aguni ejile sale amvu ini ma aliarile;

³²ori nde ovu gakandiaru, ori azini dria aga eri ra, te ka zo ’bo, eri aga afa idiza dria, eri ofu patiru, aria ’bua ’diyi nga emu ovu arakalania.

³³Eri nga e’yo o’beza azini o’be yi dri: Suru ’buari eri ovu ekile akufi 0kuni ’dule zile nganufura afazu na ma alia, de nga pini dria kurile.

³⁴E’yo ’diyi dria Yesu ’yo ’ba ongulumuru ma tia e’yo o’bezasi; te ngani e’yo azini olu yi tia e’yo o’beza kokoru ku.

³⁵E’yo nabini ’yoleri ma eca ’yeke ani, kini: Ma nga ma tile zi e’yo o’bezasi, ma nga e’yo andra zile drio engazu ewu nyaku eti ’bazurisi ’diyi olu.

³⁶Eri nga ’ba ongulumuru ku ra, nga di fi joa. ’Ba erini imbale ’diyi nga eca eri vu, nga ’yo ra, Mi nze e’yo o’beza regi amvu aliarini ma eti ama dri.

³⁷Eri nga e’yo omvi kini, ori onyiru ripiri eri Mvi ’bani;

³⁸amvu eri angu wudrikuruni,ori Onyiru yi anzi suruni; azini regi yi anzi ’ba onzini;

³⁹ari’bo yi ripiri eri ’ba asu supiri’i; lozani eri asiza nyakuni; ’ba lopi ’diyi yi malaika piyi.

⁴⁰E’yo ’disi ekile yini regi okule vele acisirile, eri nga ovu ’dinile tro ewu asiza nyakunirisi.

⁴¹Mvi ’bani eri nga malaika erini ma ti epe, yi nga afa dria ’bani abazu ani ’diyi pi oku suru eriniriasi, ’ba azi onzi ’yepi ’diyi be,

⁴²yi nga yi o’be aci droza ma alia; ’daa awu pi sikala nyaza be nga ovuni.

⁴³Etu ’dasi ’ba kililiru nga di ekile etule suru yi Atiniri ma alia. ’Ba bile beri ma eri.

⁴⁴Suru ’buari eri ovu ekile lonyi zile amvu aliarile; aguni eri isuria, nga eri zi ci; lonyi nde ma ayikosi-’eri nga mu afa ovupi i be ’diyi ozi dria, amvu nde jezu.

⁴⁵Dika suru ’buari eri ovu ekile ’ba afa ozipi nyoro ndrizaru ndapirile;

⁴⁶ka nyoro alu aje ambosiri, isu bo,eri nga mu afa uvupi i be ’diyi ozi dria eri jezu.

⁴⁷Dika suru ’buari eri ovu ekile emba ’bele miriarile, eri oku afa esele dria;

⁴⁸ka ga tre ’bo, yi nga eri ese cinya dria miri tia, nga ori va, nga onyiru ’diyi ope tiko dria, te onzi ’diyi yi nga o’be amve.

⁴⁹Eri nga ovu ’dini ewu asiza nyakunirisi. Malaika yi nga emu ’ba onzi ma esele co ’ba kililiru ’diyi be,

⁵⁰yi nga yi o’be aci droza ma alia; ’daa awu pi sikala nyaza be nga ovuni.

⁵¹Emi va e’yo ’diyi droza ra ya. Yi ’yo eri tia, E.

⁵²Eri nga ’yo yi tia, E’yo ’disi ’ba waraga sipi imbale suru ’buari ma e’yosi ’diyi dria alu ovu ekile jo e’i afa o’diru piyi ofupi lonyi ini ma alia afa okuri berile.

⁵³Eri nga eca ’dini, Yesu ka de e’yo o’beza ’diyi o’bezu ’bo, eri nga enga ’daarisi ra.

⁵⁴Eri ka fi angu inia eri nga yi imba pari yini yi okuzuriayi nga osu ani tu,nga’yora, ’Ba ’diri isu ondua ’diri tali ’diyi be ngoa ya?

⁵⁵’Ba ’diri eri ’ba bau edepiri ma mvi’i ku ya? Andri ma ru Mariamu’i ku ya? Adripi erini yi Yakobo pi, Yusufu pi, Simoni pi, Yudasi pie ku ya?

⁵⁶Amvipi erini yi ovuni ama be dria ’doa ku; ya? Ka’dini ’ba ’diri isu e’yo ’diyi dria ngoa ya?

⁵⁷Yi nga aba eri e’yosi. Te Yesu nga ’yo yi tia, Nabi azini eceni inzita isuzu ku, pe lu angu inia azini jo inia ma ovu inzita kokoruni.

⁵⁸’Dale eri ’yeni tali kakau ku, a’itaako yinisi.