Read lugbara Matayo 14 Bible Online

Matayo 14 - lugbara bible

Matayo 14

¹ Ewu ’dasi opi Herode nga e’yo kuza Yesuni eri ra

²eri nga ’yo ati’ba ini ma tia, ’Ba dari Yohana baputizi fepiri’i, enga ’ba draza eselia ’bo; tali ’diyi yi ’ye erisi ani.

³A’disiku Herode bi ndra Yohanani, ombe eri, ’ba arujoa Herodiasi i adripi Filipo ma oku ma e’yosi;

⁴te Yohana ’yo ndra eri tia, Azita a’ini mini ovuzu eri be ku.

⁵Eri le eri fu ra, te ovu urisi ’ba ongulumuru ma e’yosi, yini a’ile eri ovu nabinirisi.

⁶Te omu Herodeni osizuri ka eca ra, Herodiasi zi nga ongo tu yi eselia, nga ayiko fe Herode dri,

⁷’dini eri nga e’yo azi eri tia oyo sozasi kini i nga afa dria erini a’ileri fe eri dri.

⁸Eri’i, andrini eri bile imbaria, nga ’yo ra, Mi fe ma dri ’doa koyia alia Yohana baputizi fepiri ma dri’i.

⁹Opi nga ovu candisi; te oyo erini soleri ma e’yosi, azini ’ba ripi eri be nyaka ria ’diyi ma e’yosi, eri azi yi ma fe eri dri;

¹⁰eri nga ’ba ti pe Yohana ma dri lizu jo arunia,

¹¹yi nga drini eji koyia alia fezu zamva dri, eri nga eji andru.

¹²’Ba Yohanani imbale ’diyi nga emu avuni ’du sazu; yi nga mu e’yoni olu Yesu tia.

¹³Yesu ka eri ra, eri nga enga ’daarisi ogurusi, muzu angu ’ba kokorua ndindiru. ’Ba ongulumuru ka eri ra, yi nga eri ma vuti bi pasi engazu aku ambo ’diyia.

¹⁴Erini furia, eri nga ’ba ongulumuru kakau ndre, eri nga ovu asi ’ndrizasi yi vu, eri nga ’ba yini azoru ’diyi ati ra.

¹⁵Ka eca ondresi, ’ba erini imbale ’diyi nga emu eri vu, kini, Pari ’dori rokoru, etu ’de vini ’bo; mi pe ’ba ongulumuru ma ti mvizu, yi ma mu aku were ’diyi vusi nyaka jezu yi dri.

¹⁶Te Yesu nga ’yo yi tia, Leni yi ma mvi ku; emi fe nyaka yi dri emi’i.

¹⁷Yi nga ’yo eri tia, Ama afa ’do yo, pe lu mikate towi e’bi iri be a’dule.

¹⁸Eri nga ’yo ra, Emi eji yi ma vu ’doa.

¹⁹Eri nga azi ’ba ongulumuruni rizu va ase dria, eri nga mikate towi piyi ’du e’bi iri be, eri nga lu ’bua uru, nga asi ndriza a’i eri nga mikate nyo fa, fe ’ba erini imbale ’diyi dri, ’ba erini imbale ’diyi nga fe ’ba ongulumuru dri.

²⁰Yi dria nga nya ra, nga tra ra. Yi nga onyole ’diyi ma joloko oku evu mudri drini iri tre.

²¹’Ba nyapi ’diyi alifu towi ’diyi agupini oku piyi anzi be lani ku.

²²Coti eri nga ’ba erini imbale ’diyi omi okposi fizu oguru ma alia zozu eri ma drilea ’aa’dasi, de erini ’ba ongulumuru ti peria mvizu.

²³Ka pe ’ba ongulumuru ma ti ’bo eri nga tu oni dria a’dulesi Mung zizu. Ka eca ondresi eri de ’dale a’dule,

²⁴te oguru ovu curu’do miri ma alia adikadi, yi mbuzani eri ecandiria; olini engale yi ma drilia lerurisi.

²⁵Angu trani ecaria ogogo eri nga eca yi vu, aciria miri dria.

²⁶’Ea erini imbale ’diyi ka ndre erini aciria miri dria, yi asi nga oti tu, kini, Adroni! Yi nga otre urisi

²⁷Coti Yesu nga e’yo ’yo yi be kini, Emi asi ma te ci, ’do ma’i; emi ru ku.

²⁸Petero nga e’yo omvi, tia kini, Opi, ka adri mi’i, mi azi ma emuzu mi vu yi dria.

²⁹Eri nga ’yo ra, Mi emu. Petero nga fu oguru aliarisi, nga aci yi dria muzu Yesu vu;

³⁰te eri ka oli lu ra, eri nga ovu urisi; eri nga ’ba ’de yi etia, nga tre kini, Opi, mi pa ma!

³¹Coti Yesu nga i dri eju, nga eri ebi, nga ’yo tinia kini, Mi a’ita be wereri la, mi asi oja a’disi ya?

³²Yi ka tu ogurua ’bo, oli nga ku liko ja.

³³’Ea ovupi oguru alia ’diyi nga eri inzi kini, Adaru mi Mvi Munguni.

³⁴Yi ka zo ’aa’dasi’bo,yi eca angu Genesaretinia

³⁵’Ba pari ’daa ’diyi ka eri ni ra, yi nga ’ba ti pe angu ’dari ma ageiasi dria, yi nga ’ba dria rua onzi be ’diyi eji eri vu,

³⁶yi nga matu ’ba eri vu yi ma elo kiri bongo erini ma ti’i; ’ba dria elopi ’diyi ma rua nga ati ada.