Read lugbara Matayo 15 Bible Online

Matayo 15 - lugbara bible

Matayo 15

¹Vilerisi ’ba Farisaini piyi ’ba waraga sipi ’diyi be nga enga Yerusalemua, emuzu Yesu vu, yi ’yo ra,

²’Ba mini imbale ’diyi yi e’yo a’bini idrileri eza a’disi ya? Te yi ojini yi dri nyaka nyaria ku.

³Yesu nga e’yo omvi, ’yo yi tia, Emi azita Munguni eza e’yo a’bi eminini idrilerisi a’disi ya?

⁴Te Mungu ’yo ndra, Mi inzi mi ati pi mi andri be; azini, ’Ba ka i ati pi o’da andri be, drazaruni ma dra ra.

⁵Te emi ’yo kini, ’Ba ka ’yo i ati pi ma tia i andri be, Afa mani ngazu mi aza kozuri, ma fe Mungu dri awa’diforu;

⁶eri ngani di i atini inzi ’de ku. Emi ’ba de e’yo Munguni toko, e’yo idriza eminisi.

⁷Emi ’ba lokiri be ’diyi! Isaya ondri ndra e’yo emisi ’yeke, kini:

⁸Suru ’dori yi ma inzi tisi, te yi ma asi ovu ma be re;

⁹te yi ma inzi toko, azita ’bani imbazu imbataru’i.

¹⁰Eri nga ’ba ongulumuru omve i vu, nga ’yo yi tia, Emi eri, emi va e’yo:

¹¹afa fipi ’ba tiliari ezani ’bani ku, te afa efupi ’ba ma tiliari eri ’ba ezani.

¹²’Ba erini imbale ’diyi nga di emu eri vu, ’yozu eri tia, Mi ni ra kini ’ba Farisaini yini e’yo ’diri eriria, e’yoni ’de yi asia onzi ya?

¹³Te eri nga e’yo omvi, ’yo ra, Afa saza dria ma Ati ’buarini saleni kuri, yi nga oku ra.

¹⁴Emi ku nga ’ba ’diyi; yi ’ba dri cepi mile kokoru ’diyi. ’Ba mile kokoru ka i agyi mile kokoru ma dri ceni, yi iritro nga o’de ’bilia.

¹⁵Petero nga e’yo omvi, ’yo eri tia, Mi nze ama dri e’yo o’beza ma eti.

¹⁶Eri nga ’yo ra, Emi’i indi, emi nga kiri e’yo vaza kokoru ya?

¹⁷Emi nini ku kini afa fi pi ’ba ma tileari, eri aga fi anyajoa, eri nga ovu ’bezaru jo werea ya?

¹⁸Te afa efupi ’ba ma tilia ’diyi, yi enga ’ba ma asia; afa ’diyi ’ba ezani.

¹⁹A’disiku engazu asia e’yo osuza onzi ’diyi efuni, ’ba fuza pi, ali ’baza pi, awu pi, ogu pi, e’yo eti nzeza inzoruri pi, a’data pie.

²⁰E’yo ’diyi yi ’ba ezani; te nyazu dri ojikokoru ezani ’bani ku.

²¹Yesu nga enga ’daarisi, fu mu kala Turo pini Sidoni beria.

²²Te mi ndre, oku Kanani ezoruri nga efu kalati ’dasi, nga Oyu uru kini Mi ovu yiki be Ma vu, Opi, mvi Daudini; Ma zini azoru tu orindi onzi be.

²³Te eri omvini e’yo eri tia ku. ’Ba erini imbale ’diyi nga eca nga matu ’ba eri vu kini, Mi pe eri tia mvizu, erini otrele ama vutiarisi.

²⁴Eri nga e’yo omvi ’yo ra, Epe ndra ma ti ’ba azini vu ku, te kabilo avipi suru Israelinia ’diyi vu a’du1e.

²⁵Te eri nga eca eri vu, nga eri inzi, kini, Opi, mi ko ma aza fo!

²⁶Te eri nga e’yo omvi kini. Ovuni onyiru nyaka anzini ’duzu ’bezu oce dri ku.

²⁷Te eri nga ’yo ra, Ada, Opi, te oce yi adri anyaka nyiri o’depi va mesa yi ma opini etia ’diyi nya ra.

²⁸Yesu nga di e’yo omvi, ’yo eri tia kini. Oku la, a’ita mini eri amboru! Ma ’ye i mi dri mini lelerile. Te zamva erini nga ati etu ’dasi ra.

²⁹Yesu nga di enga ’dale, nga eca miri Galilini ma tia ogogo.Eri nga tu oni dria uru, nga ri ’dale.

³⁰’Ba ongulumuru kakau nga emu eri vu, yi be ’ba acozaru piyi, ’ba dri ondrizaru pie, ’ba mile drazaru pie ’ba e’yo ’yopi kuri pie, ’ba azini be kakau; yi nga yi o’ba eri ma palaa eri nga yi ati ra.

³¹’Dini ’be ongulumuru nga osu tu, yini ndreri: ’ba e’yo ’yopi ku ’diyi yi e’yo ’yo ’ba dri ondrizaru ’diyi yi ma rua ati ra, ’ba acozaru ’diyi yi aci, ’ba mile drazaru ’diyi yi angu ndre; yi nga di Mungu Israelini inzi ra.

³² Yesu nga ’ba erini imbale ’diyi omve i vu, nga ’yo ra, Ma asi ndri ’ba ongulumuru ’diyi vu, yini tele ma be o’du na nyaka kokorurisi; ma leni yi ti pe mvizu abirisi ku, icima koro kazu yi o’bezu geria ku.

³³’Ba erini imbale ’diyi nga ’yo eri tia, Ama nga mikate isu kakau ’dipi, angu rokoa ’doa ngoa, ’ba ongulumuru ’dopi ’doyini trazu ani ya?

³⁴Yesu nga ’yo yi tia kini, Emi ovu ikate be si ya? Yi nga ’yo ra, Aziri, azini e’bi were indi.

³⁵Eri ga azi ’ba ongulumuruni rizu va yakua,

³⁶eri nga mikate aziri ’diyi ’du e’bi be, nga awa’difo fe, ga yi onyo ra fezu ’ba erini imbale ’diyi dri, ’ba erini imbale ’diyi nga fe ’ba ongulumuru dri.

³⁷Yi dria nga nya ra, nga tra ra; yi nga onyole ’diyi ma joloko oku abaka aziri alia tre.

³⁸’Ba nyapi ’diyi me kalafe alifu su, ’di agupini; oku pi anzi be lani ku.

³⁹Eri ka ’be ongulumuru ma ti pe mvizu ’bo, eri nga tu ogurua, nga zo ’aa’dasi, cazu ngu Magadania.