Read lugbara Matayo 17 Bible Online

Matayo 17 - lugbara bible

Matayo 17

¹O’du azia ma vutia, Yesu nga Petero pi ’du i be, Yakobo pie, Yohana adripi erini be, nga yi ji uru oni izuru ma dria a’dule.

²Rua erini nga ovu ojazaru yi milia, mile erini nga eli ekile etule, afa suza erini nga ovu emvendrindriru diza etunile.

³Mi ndre, Musa pi Eliya be nga yi e’da yi vu, e’yo ’yozu eri be.

⁴Petero nga e’yo omvi ’yo Yesu ria, Opi, e’yo amani ovuzu ’doari onyiru; mi ka le ra, ma nga boroko si ’doa na, alu dri, alu Musa dri, alu Eliya dri.

⁵Erini nga e’yo ’yoria, mi ndre, iriti dizaru ma endri ’de yi ma dria ci, te mi ndre, o’duko enga iriti ma alia kini, ’Di Mvi mani lele turi’i, ma ovu ayikosi tu erisi; emi eri.

⁶’Ba erini imbale ’diyi ka eri ra, yi nga o’de a’bukuru va, yi ovu urisi tu.

⁷Te Yesu nga eca, nga yi rua elo, nga ’yo kini, Emi enga, emi ru ku.

⁸Yi ka yi mile enga ’bo, yi ndreni ’ba azini ku, pe lu Yesu’i a’dule.

⁹Yini siria oni driarisi va, Yesu nga e’yo azi yi tia kini, Emi olu afa ndreza ’dori ma e’yo ’ba aluni ma ria ku, de nga Mvi ’bani engani ’ba draza ma eselia ku.

¹⁰’Ba erini umbale ’diyi nga eri tia, yi ’yo ra, ’Ba waraga sipi ’diyi ’yo kini Eliya ma eca raka, ’dini a’disi ya?

¹¹Eri nga e’yo omvi, nga ’yo ’ra, Eliyani nga eca ada, afa dria edezu;

¹²te ma ’yo emi tia, Eliya eca di ’bo, azini yi nini eri ku, te yi ’ye eri yini lelerile. Te Mvi ’banini nga candi, isu yi dri ’dinile indi.

¹³’Ba erini imbale ’diyi nga di va eri ’yo yi tia Yohana baputizi fepiri e’yo.

¹⁴Yi ka eca ’ba ongulumuru vu ’bo, ’ba azini nga emu eri vu, kumuti osizu tinia, kini,

¹⁵Opi, mi ovu yiki be ma mva ma e’yosi, azo ediani fi eri ruaani, ’ye eri onzi tu; a’disiku pale kakau eri ode acia, azini pale kakau eri o’de yia.

¹⁶Ma eji te eri ’ba mini imbale ’diyi vu ’bo, te econi yini eri atizaru u.

¹⁷Yesu nga e’yo omvi, ’yo ra, Emi a’bianzi a’ita kokoru yi ojapi onzi ’diyi, ma nga ovu emi be ewu ngopi ya? Ma nga ovu emi vu asi tezasi ewu ngopi ya? Emi eji eri ma vu ’doa.

¹⁸Yesu nga ega eri ma dria; orindi onzi nga efu eri ma aliasi ra, mva ovu di atizaru etu ’darisi.

¹⁹’Ba erini imbale ’diyi nga di eca Yesu vu oyokolosi, yi ’yo ra, Econi amani eri drozaru ku a’disi ya?

²⁰Eri riga ’yo yi tia, A’ita eminini ovule wererisi. Te ndi ma ’yo emi tia emi ka ovu a’ita be haradali efile dipi, emi nga ’yo oni ’diri ma tia Mi nga ’doa, mi mu ’dale, eri nga mu ra; azini afa aluni ngani ovu ewaru emi ndezu ku.

²¹Te esele,doyi econi fuzaru ku pe Mungu ziza pisi nyaka ’daza be.

²² Yini ovuria Galilia, Yesu nga’yo yi tia, Yi nga Mvi ’bani fe ’ba dria,

²³yi nga eri fu ra, o’du nasi eri nga enga ra. Yi ovu candisi tu.

²⁴Yini ecaria Kaperinaumua, ’ba sekeli nusu a’ipi ’diyi nga eca Petero vu, nga ’yo ra, ’Ba emi imbapiri beni sekeli nusuni ku ya?

²⁵Eri ’yo ra, Eri ’be ra. Eri ka efi joa ’bo, Yesu nga ’yo eri tia oko, kini, Simoni, mi osu ngoni ya? Meleki nyakua ’diyi adri musoro pi oku, silingi lile ’ba driari be, a’di vu ya? Ami yini vu, kani anzi juruni vu?

²⁶Erini ’yoria kini, Anzi juruni vu, Yesu nga di ’yo eri tia, Ka’dini anzi melekini ovu di truzaru.

²⁷Te ama kazu kumu ’bazu yi dri ku, mi mu miria mi ’be ewu, mi e’du e’bi mini epele okori, mi zi tileni, mi ji nga isu;mi ji sekeli nderi, mi fe yi dri, mani mini.