Read lugbara Matayo 2 Bible Online

Matayo 2 - lugbara bible

Matayo 2

¹Yesuni osiria Betelehemu Yudia- aria ewu Herodeni ovuzu opirurisi, mi ndre, ’ba onduaru engapi kala etuni efurialeruria ’diyi nga eca Yerusalemua, kini,

²Mva osile opi ’ba Yahudiniruri ngoa ya? A’disiku ama ndre ’bi’bio erini etuni efuria, ama eca eri ma ru inzizu ani.

³Opi Herode ka eri ’dini, asini oti, ’ba Yerusalemua ’diyi be dria;

⁴eri nga kuhani amboru oku dria, karani ’ba nde ’diyini be, nga pari Kristoni osizuri zi yi tia.

⁵Yi nga e’yo omvi eri tia, Betelehemu Yudiaari ma alia a’disiku nabi si ndra e’yoni ’dini:

⁶Mi Betelehemu angu Yudaniari, mi ovuni werearu tu opi Yudaa ’diyi ma eselia, ’dini ku; ’ba ’ba dri cepirini ngale efule mi ma aliarisi, ngapi suru mani Israeliniri ocepiri’i.

⁷Herode nga di ’ba onduaru ’diyi omve oyokolosi, nga zi yi tia o’du ’bi’bioni e’dazuri oluzu i tia kilili;

⁸nga’yi ti pe Betelehemua, nga ’yo, Emi mu e’yo mvani ozi kililiru, emi ka eri isu ra emi pe e’yoni ma ti ma vu, ma’i indi ma emu eri inzizu beni.

⁹Yi ka e’yo opi ma tiari eri ’bo, yi mu ra; te mi ndre, ’bi’bio ndra yini ndrele etuni, efuriari nga dri ce yi drilia, de nga emuni pa sozu ’bua pari mvani ovuzuri ma drilia ku,

¹⁰Yi ka ’bi’bioni ndre ra, yi asi ovu ayikoru tu;

¹¹yi ka fi joa ’bo yi nga odekua ndre andri Mariamu be, yi nga kumuti osi va runi inzizu; nga afa yini lonyi ta mbazu ’diyi ma ti ozi ra, afa feza fezu eri dri, mele pi, obiese pie, odu arikariruri be.

¹²Munguni yi imbaria orobisi kini ma mvi ’dale Herode vu ku, yi nga mvi angu yinia geri azinisi.

¹³Yi ka mvi ’bo, mi ndre, malaika Opini nga i e’da Yusufu vu o’du koria orobisi, kini, Mi nga, mi ’du mva andri be, mi apa Misiria, mi ovu ’dale ’dani kpere mani ’yoria mi tiaria; Herodeni ’yele lele mva ndrule drini jazurisi.

¹⁴Eri nga di nga, mva jizu andri be inisi, apazu Misiria ra;

¹⁵eri ovu ’dale kpere Herodeni draria; e’yo Opini ’yole geri nabi vurisiri ma ’ye i ani, kini, Ma omve mva mani engazu Misiriarisi ’bo.

¹⁶Etu ’dasi Herode ka ndre ’ba onduaru ede i ma e’yo ’bo, eri ovu di aokosi tu, eri nga ’ba ti pe agupianzi Betelehemu pia angu ageinia ’diyi be dria ’diyi ma dri jazu dria, e’dozu anzi eli be iri ’diyisi, azini anzi capi ’dipi ku ’diyi dria, ekile o’du erini nile kililiru ’ba onduaru ma tiarile.

¹⁷E’yo nabi Yeremiani ’yoleri nga di i ’ye ani ’yeke, kini:

¹⁸O’duko eri i Ramaa, awu pi lulu gaza ambori be, Rakelini anzi ini owu; leni ma omi i asi ku, yini ovule yorisi.

¹⁹Te Herode ka dra ’bo, mi ndre, malaika Opini e’da i Yusufu vu orobisi Misiria, kini,

²⁰Mi nga, mi ji mva andri be, mi mu angu Israelinia; ’ba ndra mva ma dra ndapi ’diyi odra ’bo.

²¹Eri nga enga ra, nga di mva ji andri be fizu angu Israelinia.

²²Te eri ka eri kini Arikelao nya di opi Yudiaa ati Herode ma pariani, eri ru mvizu vile; Munguni eri imbaria orobisi, eri nga i oja vile, nga fi kala Galilinia.

²³Eri nga mu ri ovu aku omvele Nazaretiria; e’yo nabini ’yoleri ma ’ye i ’yeke ani, kini, Yi nga eri omve ’ba Nazaretini.