Read lugbara Matayo 22 Bible Online

Matayo 22 - lugbara bible

Matayo 22

¹Yesu nga e’yo omvi, ’yo yi tia dika e’yo o’bezasi, kini,

²Suru ’buari ovu ekile ’ba melekiru; omu oku bizaniri ’hapi mva ini dririle,

³eri pe ati’ba erini ma ti ’ba ndra erini omvele omu oku bizani nyazu ’diyi omvezu; te yi ga emuko si.

⁴Eri pe ati’ba azini ma ti dika, eri ’yo ra, Emi olu ’ba omvele ’bo ’diyi ma tia, Mi ndre, ma a’di nyaka mani ’bo, oli ranya mani piyi anyapa osoru ’diyi be ’bo, afa dria ovu ngonde; emi ma emu omu oku bizaniria.

⁵Te ’ba ’diyi ’bani asi drinia ku, yi mu ra, ’ba alu amvu inia, aziniri afa oziza inia;

⁶’ba acepi ’diyi bi ati ba erini ci, nga drinza fe yi dri, nga yi fu ra,

⁷Te meleki ovu adrasi; eri pe asikari, ini ma ti, ja ’ba ’ba fupi ’dayi ma dri, eve aku yini acisi dria ra.

⁸Eri nga di ’yo ati’ba ini ma tia, Omu oku bizaniri ovu edezaru, te ’ba ndra omvele ’bo ’diyi ovuni onyiru ku.

⁹Emi mu geri gbokoni yi ecizuria, azini ’ba dria emini isule ’diyi, emi ma omve yi emuzu omu oku bizaniria.

¹⁰Ati’ba ’dayi nga di fu mu gbokoa, nga ’ba dria yini isule ’diyi oku, ’ba onzi piyi ’ba onyiru ’diyi be; ’dini omu ga tre ’ba ripi ’diyisi.

¹¹Te melekini firia ’ba ripi ’diyi andrizu, eri nga ’ba alu ndre ’daa afa suza omuni kokoru;

¹²eri nga ’yo eri tia, Ma agyi, mi efi ’doa afa suza omuniri kokoru ngoni ya? Te eri adri ciri.

¹³Meleki nga di ’yo ’ba azi ngapi ’diyi ma tia, Emi ombe eri ma pa pi dri be ci, emi ’be eri angu inicicirua amve; ’daa awu pi sikala nyaza be nga ovuni.

¹⁴Te ’ba kakau ovu omvezaru, te ’ba opele ’diyi were.

¹⁵ Vutinia ’ba Farisaini nga emu, ti ecizu tualu e’yo otuzu eri mbazu e’yo erini ’yoleri ma alia.

¹⁶Yi nga, ’ba yini imbale ’diyi pi ma ti pe eri vu ’ba Herodeni be, kini, ’Ba ’ba Imbapiri, ama ni ra mi ’ba adani, mi geri Munguni imba e’yo adarurisi, mi asini ’ba aluni ma e’yosi ku; mini ’ba opele kurisi.

¹⁷Mi olu di amani, mi ega ngoni ya? Azita a’i amani musoro ’bezu Kaisari dri, kani ’dini yo?

¹⁸Te Yesuni e’yo onzi yini niria, nga ’yo ra, Emi ma ole a’disi ya, emi ’ba lokiri be?

¹⁹Emi ece ma dri aya musoroniri. Yi nga silingi eji eri dri.

²⁰Eri ’yo yi tia, Wura ’dori e’yo siza driniari be yi a’dini ya?

²¹Yi ’yo ra, Kaisarini. Eri nga di ’yo yi tia, Emi fe afa Kaisarini Kaisari dri, azini afa Munguni emi ma fe Mungu dri.

²²Yi ka eri ’dini ’bo, yi osu tu; yi nga eri ku, nga mu ra.

²³ O’du ’darisi ’ba Sadukayoni,, ’yopi kini engata yo ’diyi, nga emu eri vu, nga zi eri tia kini,

²⁴’Ba ’ba Imbapiri, Musa ’yo ndra ’dini, ’Ba azini ka dra anzi kokoru, adripi erini nga oku erini omvi, nga ori ti i adripi dri.

²⁵Adripi aziri ndra ama eselia indi; okori ka oku bi ’bo, dra ra, erini ovule ori kokorurisi ku oku ini adripi dri.

²⁶’Dinile ’ba iriri indi, azini nari, cazu kpere yi aziri dria.

²⁷Yi dria ma vutia oku nde nga dra indi

²⁸Ka’dini engata ma alia, ’ba aziri ’diyi ma eselia, eri nga ovu oku a’dini ya? yi driani eri bile okururisi.

²⁹Te Yesu nga e’yo omvi, ’yo yi tia, Emi aba emini e’yo siza pi nile okpo Munguni be kurisi.

³⁰A’disiku engata ma alia ’ba ngani oku bi ku, azini ’ba feni oku ’ba dri ku indi, te yi nga ovu ekile malaika ’bua ’diyile.

³¹Te engata ’ba draza eseliari ma e’yosi, emi lani nga e’yo Munguni ’yole emi tia kini,

³²Ma Mungu Iburahimu, ma Mungu Isakani, ma Mungu Yakoboni-ri ku ya? Mungu ovuni Mungu ’ba drazani ku, te ’ba idriruni.

³³’Ba ongulumuru ka eri ’dini, yi osu tu imbata erinisi.

³⁴Te ’ba Farisaini ka eri kini eri ombe ’ba Sadukayoni ma ti ci, yi nga yi oku tualu.

³⁵’Ba alu yi eselia, ’ba azita nipiri, nga e’yo zi eri tia eri o’bizu.

³⁶’Ba ’ba Imbapiri, e’yo aziza ma eselia, azita ngori amborunini ya?

³⁷Eri nga ’yo eri tia,Mi ma le Opi Mungu mini mi asi driasi, mi orindi driasi, ondua mini driasi.

³⁸’Dori azita amboru okori’i.

³⁹Iriri ovupi erileri ’di’i, Mi ma le mi agyi ekile mini mi ngulupi lelerile.

⁴⁰E’yo aziza dria pi nabi be oti yi azita iri ’diyi ma ruaa.

⁴¹’Ba Farisaini yini ti okuria tualu, Yesu nga zi yi tia,

⁴²kini, Emi ega e’yo Kristoni ngoni ya? Eri a’di mvi’i ya? Yi ’yo eri tia, Daudi mvi’i.

⁴³Eri ’yo yi tia, Ka adri ’dini, Daudi nga di eri omve Orindisi, Opi’i, ngoni ya, erini ’yoria kini,

⁴⁴Opi ’yo Opi mani ma tia, Mi ri ma dri ndiria, de nga ma ’bani ari’ba mini mi pa age lea ku?

⁴⁵Ka’dini Daudi ka eri omve Opi’i, eri ovu di mva eriniru ngoni ya?

⁴⁶’Ba aluni econi e’yo omvizaru eri tia aluni ku, azini engazu o’du ’dasi ’ba aluni asi teza be e’yo zizu eri tia dikani yo.