Read lugbara Matayo 23 Bible Online

Matayo 23 - lugbara bible

Matayo 23

¹Vutinia Yesu nga di ’yo ’ba ongulumuru piyi ma tia ’ba erini imbale ’diyi be,

²eri kini, ’Ba waraga sipi ’diyi pi ri oguna Musaniri ma dria ’ba Farisaini be;

³e’yo ’disi e’yo dria yini ’yoleri emi ’ye, emi bi, te emi ’ye ’yeta yini ’yelerile ku; a’disiku ’yozaruni yi ’yo ra, te yi ’yeni ku.

⁴Te yi ombe teri nzizaru ’bani ecole ’dule ku ’diyi, yi ’ba yi ’ba ma ombetia; te yi ma ngulupi leni yi mizu drimva yinisi, ku.

⁵Te ’ye,ta,yini ’yeleri dria yi ’ye ba ma mila, ba ma ndre beni; te yi ombe e’yo siza ma verisi azini walaru, o’i yi drilebaru yi ma ruaa, yi ere yi ma bongo ti amboru,

⁶omu ma alia yi le kiti okori, azini pari ’bani yi okuzuria yi le kiti drile ’diyi,

⁷yi le ’ba ma zi yi ci cuua, ’ba ma omve yi Imbapi’i indi.

⁸Te emi ma ovu omvezaru Imbapi’i ku, te ’ba emi imbapirierialu,emidria adripini.

⁹Nyakua ’doa emi omve ’ba aluni ati eminiru ku, a’disiku ’ba alu eri Ati eminiruni, eri ’bua.

¹⁰’Ba ma omve vini emi ’ba ’ba dri cepiri’i ku, a’disiku ’ba emi dri cepiri eri alu, Kristo’i.

¹¹Te ’ba emi eselia agapi ambosiri eri ’ba emi aza kopi azisiri’i;

¹²te ’ba dria i ngulupi enyapi ’bapi ururi yi nga eri omvi ele, te ’ba dria i ngulupi omvipi eleri yi nga eri ’ba uru.

¹³Candi emi dri, ’ba waraga sipi ’diyi pi ’ba Farisaini be, emi ’ba lokiri be! emini suru ’buari ma ti opile ’ba ma milia cirisi; te emi’i, emi fini ku, emi a’ini vini ’ba ’yepi fipi ’diyini fizu ku.

¹⁴Candi emi dri, ’ba waraga sipi ’diyi pi ’ba Farisaini be, emi ’ba lokiri be! emi jo awuzini nya, emini de Mungu ziria izuru inzosi; e’yo ’disi emi nga ovu e’yo liza be aga ra.

¹⁵Candi emi dri, ’ba waraga sipi ’diyi pi ’ba Farisaini be, emi ’ba lokiri be! emi aci gorigori miria azini nyaku a’wiru ma dria, ’ba alu ojazu emi vu; eri ka ofu ’dini ’bo, emi eri oja mva Jehanumaniru aga emi ra pale iri.

¹⁶Candi emi dri, emi ’ba ’ba dri cepi mile kokoru, ’yopi kini, ’Ba ka oyo so hekalu rusi, ’di e’yoni yo; te ’ba ka oyo so dahabu hekalu aliari ma rusi, eri mari be, ’diyi.

¹⁷Emi ’ba ondua kokoru azini mile odraza be ’diyi Te ngori agani ya, dahabuni, kani hekalu dahabu nde ’bapi alatararuri’i ya?

¹⁸Azini emi kini, ’Ba ka oyo so pari edeta edezuri ma rusi, ’di e’yoni yo; te ’ba ka oyo so feta ovupi driniarisi, eri mari be.

¹⁹Emi ’ba mile draza be ’diyi Te ngori agani ya, fetani, kani pari edeta edezu feta nde ’bapi alatararuri’i ya?

²⁰’Dini ’ba ka oyo so pari edeta edezuri ma rusi, eri so oyo erisi afa dria ovupi drinia ’diyisi indi;

²¹’ba oyo sopi hekalu rusiri eri so oyo erisi, azini Eri’i ovupi aleniarisi indi.

²²Azini ’ba oyo sopi ’bu rusiri, eri so oyo oguna Mungunirisi, azini Eri’i ripi driniarisi indi.

²³Candi emi dri, ’ba waraga sipi ’diyi pi ’ba Farisaini be, emi ’ba lokiri be! a’disiku emi adri tibi pi ma esele mudri ’diyi ma azi aluri fe ra, afa arikariruri pi, jipa pie, mondrokolo omvele kuminori pie, de emi ku e’yo ’wara azitani ’diyi ja, e’yo lizu kililiruri pi, yiki pie, a’ita be; onyiru ’ba ma ’ye ’diyi ra, te ’ba ma ku azini ’dayi ’yekokoru ku.

²⁴Emi ’ba ’ba dri cepi mile draza be ’diyi! Yiyiaruni emi adri ndra ra, te ngamiaruni emi mvu pi ’dani!

²⁵Candi emi dri, ’ba waraga sipi ’diyi pi ’ba Farisaini be, emi ’ba lokiri be! emini erejea pi ma nguku ojile otekua be alarurisi, te alialeru yi ga tre afa opaza pisi ’yeta saaruri be.

²⁶Mi ’ba Farisaini mile draza beri’i mi oji erejea pi ma ale otekua be raka, ngukuni ma ovu ani a1aru indi beni.

²⁷Candi emi dri, ’ba waraga sipi ’diyi pi ’ba Farisaini be, emi ’ba lokiri be! emi si emi ekile nyadri ’bani trile ivisi ’diyile, amveleru yi e’da ndrizaru, te alialeru yi ga tre ’ba ma avu ma fala piyisi afa maza be dria.

²⁸Emi tro ’dini indi, amveleru emi e’da ’ba vu ekile ’ba kililirule, te alialeru emi ga tre lokiri pisi ezata be.

²⁹Candi emi dri, ’ba waraga sipi ’diyi pi ’ba Farisaini be, emi ’ba lokiri be! emini nyadri nabini silerisi, emini nyadri ’ba kililiru ’diyini edele ndrizarurisi indi,

³⁰emi ’yo ra, Ama ka ovu ndra ewu ama a’bipini ovuzu ’dayisi indi, ama ecini ndra ti yi be nabi ma ari adazu ku.

³¹’Dini emi ece emi ceni, emi ’ba nabi fupi ’diyi ma anzi.

³²Emi ma fe di afa o’biza emi a’bipini ma ga tre!

³³Emi uri, boroa ma oriru ’diyi, emi nga apa e’yo liza ’bani dri jazu jehanumaarisi ngoni ya?

³⁴Te mi ndre, e’yo ’disi ma nabi piyi ma ti ope emi vu, ’ba ondua be ’diyi pie, ’ba waraga sipi ’diyi be; emi nga ’ba ’diyi ma azi ofu ra, azini di pari ruaa, yi ma azi emi nga co kalisi pari emini emi okuzuria, emi nga yi odro aku vusi aku vusi;

³⁵’dini ari dria ’ba kililiruni ovu pi adazaru nyaku driari nga emvi emi dria, e’dozu ari Habili ’ba kililirurinisi ecazu Zakaria Barakia mvi, emini fule hekalu pi ma eselia pari edeta edezuri beri ma ari vu.

³⁶Ma ’yo emi ria ada, e’yo ’diyi dria yi nga eca a’bianzi ’doyi ma dria.

³⁷Yerusalemu la! Yerusalemu la ’ba nabi ofupiri, ’ba ti pele mi vu ’diyi o’bepi onisiri Ma le ndra anzi mini oku ekile ariani anzi ini okule opile etiarile pale si, te emi ga si

³⁸Mi ndre, jo emini ovu kuzaru emi dri andruru.

³⁹Te ma ’yo emi da, Emi ngani ma ndre dika aluni ku, engazu curu’do de nga emi ’yoni kini, Asi ndriza ma ovu ’ba emupi Opi ma rusiri ma dria, ’dini ku.