Read lugbara Matayo 24 Bible Online

Matayo 24 - lugbara bible

Matayo 24

¹Yesu nga fu hekalua, mu geria; ’ba erini imbale ’diyi nga eca eri vu jo siza hekaluni ’diyi ecezu eri dri.

²Eri nga e’yo omvi, ’yo yi ria, Emi ndreni afa ’diyi dria ku ya? Ma ’yo emi tia ndi, oni aluni ngani ace ’doa adrozaru agyi dria asukokoru ku.

³Erini riria oni Mizeituni ma dria, ’ba erini imbale ’diyi nga eca eri vu de eri a’dule, kini, Mi olu ama tia, afa ’diyi nga ovu a’dungare ya? Azini emuta mini ma eceta, asiza angu wudrikuruniri be, nga ovu ngoni ya?

⁴Yesu nga e’yo omvi, ’yo yi ria, Emi te emi agei, ’ba aluni kazu emi icizu ku.

⁵Te ’ba kakau yi nga emu ma rusi, ’yozu, Ma Kristo’i; yi nga ’ba kakau ici ra.

⁶Emi ka e’yo ombani pi eri e’yo kuza ombani be, emi ovu mile be emi asi ma oti ku, te e’yo ’diyi ngani ece emuzu ku; te asizani nga yo.

⁷Te suruni nga enga omba ’dizu suru azini be, opi nyazani nga omba ’di opi nyaza azini be, liki pi nga ovu oyakia be angu ndu ma alia:

⁸te e’yo ’diyi dria nga candi ma eti e’dozuri.

⁹Yi nga di emi fe,nzata vu, ’ba nga emi fu ra; suru ria yi nga emi ngu onzi ma rusi.

¹⁰Ewu ’dasi ’ba kakau nga aba, yi nga yi fe ceni, yi nga yi nga yi ngu onzi eselia ceni.

¹¹Te nabi inzoru kakau yi nga enga ra, nga kakau icie ra.

¹²E’yo onzini gale trerisi, ba kakau ma letani nga ambi ra.

¹³Te ’ba ovupiasi teza be cazu asizaniriari nga i pa ra.

¹⁴Te e’yo bari suruni ’diri nga ovu oluzaru angu wudri kuru drisi dria, e’yo eti nzezu suru i dria dri indi; o’du asizaniri nga di eca ndo.

¹⁵Emi ka afa onzikanyaru ’ba dri jazu, nabi Danielini e’yoni ’yoleri ndre, erini pa soria pari alatararia (’ba waraga lapiri ma va e’yo ’diri),

¹⁶o’du ’dasi ba ovupi Yudia ’diyi ma apa di oni dria;

¹⁷’ba ovupi dria ururi ma si va afa jo inia ’diyi o’duzu ku;

¹⁸’ba ovupi amvuari ma emvi vile afa suza ini ’duzu ku.

¹⁹Te candi oku ovupi okporovuru ’diyi pi dri, ba fepi ’diyi be, o’du ’dayisi!

²⁰Emi zi Mungu kini o’du emini apazuri ma ovu ewu egbenisi ku, kani sabatosi ku indi.

²¹Te ewu ’darisi inzata nga ovu amboru tu, drio engazu nyaku eti ’bazurisi ecazu kpere andru, ovuni ndra ’dini ku, vutinia ngani ovu vinil ’dinile dika ku indi.

²²O’du ’dayi ka ovu lizaru ku, ’ba aluni econi te i pazaru ku; te ’ba opele ’diyi ma e’yosi, o’du ’dayi nga ovu lizaru ra.

²³O’du ’dasi ’ba azini ka ’yo emi tia, Mi ndre, Kristoni ’doa, kani, ’Dia; emi ma a’i ku.

²⁴A’disiku Kristo inzoru piyi nabi inzoru ’diyi be nga enga ra, yi nga eceta amboru ’ye tali be, ’dini, ka eco ra, yi ma ici ’ba opele ’diyi indi beni.

²⁵Mi ndre, ma olu emi tia oka.

²⁶’Dini yi ka nga ’yo emi tia, Mi ndre, eri roko dria, emi fu ku; Mi ndre, eri o jo aliza ma alia, emi ma a’i ku.

²⁷Te ekile ovini gale etuni efurialeru, erini i e’dale kpere kala etuni ’derialeruriarile, Mvi bani ma emutani.

²⁸Roko nga yi oku pari avuni ovuzuria ’daa.

²⁹Te inzata o’du ’dayini ka i de ra, coti etuni nga ovu bizaru, mba ngani angu mve ku, ’bi’bio nga o’de ’buarisi ra, okpo ’bua ’diyi nga oya;

³⁰o’du ’dasi Mvi ’bani ma ecetani nga i e’da ’bua, suru nyakua ’diyi dria nga di ovu lulu gaza be, yi nga Mvi ’bani ndre erini emuria iriti ’buari ma alia, Okposi azini diza amborube;

³¹eri nga malaika erini ti ope guka ma awu amboru be, yi nga ’ba opele erini ’diyi oku oli kala sua ’diyi vusi, engazu ’bu ma kalati aluria cazu aziniri vu.

³²Emi ma oni di e’yo o’beza elio patini: arakala ma drile ka eca aroru, pati bi odiru ka eri ’bo, emi ni kini eli eca ogogo.

³³’Dinile indi emi’i, emi ka e’yo ’diyi ndre dria ra, emi ni kini eri ovu ogogo, va jotilia.

³⁴Ma ’yo emi tia ndi, a’bianzi ewu ’dorini ngani yi de aluni ku de nga afa ’diyi dria ’yeni yi ku.

³⁵’Bupi nyaku be nga yi de ra, te e’yo mani ngani i de aluni ku.

³⁶Te o’du ’dari pi ma e’yo etu ’dari be ’ba aluni nini ku, kani malaika ’bua ’diyi, kani Mvi’i ti, te Ata a’dule nini.

³⁷Te ekile o’du, Noanisirile, Mvi ’bani ma emutani nga ovu ’dinile.

³⁸Te ekile ’bani ndra ovule o’du yi tizani nga ecazu kuriarisile, yi nya, yi mvu, yi bi oku, yi fe oku, ecazu o’du Noani fizu maburuaria,

³⁹yi nini afa azini ku, de nga yi tiza emuni yi o’duzu dria ku; Mvi ’bani ma emutani nga ovu ’dinile.

⁴⁰O’du ’dasi ’ba iri nga ovu amvua; aluri nga ovu ’duzaru, aziniri nga aceni.

⁴¹Oku iri nga ovu anya ’iria oni dria; aluri nga ovu ’duzaru, aziniri nga aceni.

⁴²Emi ovu mile be, emini o’du Opi eminini emuzuri nile kurisi.

⁴³Te emi ma ni ’di, jo e’i ka ndra etu oguouni emuzu kani ngoriari ni ra, eri ndra te mile be, ngani ndra a’i yini eri ma jo eti luzu ku.

⁴⁴Awa’dini emi ma ovu di edezaru ngonde; te Mvi ’bani nga emu etu emini egale kuria.

⁴⁵Ka’dini ati obi asi ada be, onduaru, opini ani ’bale ati’ba jo inia ’diyi ma drilia, nyaka fezu yi dri etu vusiri a’di’i ya?

⁴⁶Ati’bo opini emule eri isule ’ye ’diniri eri drilebaru.

⁴⁷Ma ’yo emi tia ndi, eri nga eri ’ba afa erini ovuzu yi be ’diyi ma drilia dria.

⁴⁸Te ati’bo onzi ’dari ka ’yo i asia, Opi mani eri i dri ici ’dale,

⁴⁹ka e’do ati’ba eri ma agyiru ’diyi co, ka afa nya, ka afa mvu ’ba ewa mvupi ’diyi be,

⁵⁰opi ati’bo ’darini nga eca o’du erini egale kuria, azini etu erini nile’kuria,

⁵¹eri nga eri ale ali iri, eri nga eri ma e’yo ’ba ’ba lokiri be ’diyi be tualu; ’dale awu pi nga ovu si ciza beni.