Read lugbara Matayo 26 Bible Online

Matayo 26 - lugbara bible

Matayo 26

¹Eri nga eca ’dini, Yesu ka e’yo ’diyi de dria ’bo,eri ’yo ’ba erini imbale ’diyi ma tia,

²Emi ni o’du iri ka aga ra, omu agaza ’ba drilesiri, nga eca, Mvi ’banini nga ovu fezaru dizu pati ruaa.

³Etu ’dasi kuhani amboru piyi ’ba ’wara ’ba drilia ’diyi be, nga yi oku tualu kuhani amboru omvele Kaifa’iri vile iriia,

⁴yi nga e’yo otu tualu Yesuni bizu lokirisi, eri fuzu.

⁵Te yi ’yo ra, Ma bi eri o’du omu nyazurisi ku, omba kazu fuzu ’ba ma eselia ku.

⁶Yesuni ovuria Betania, Simoni ’ba ofu beri vile joa,

⁷oku azini nga eca eri vu, eri ovu lu’bu odu aje nyapi turini be, eri nga eri osu eri ma dria erini riria nyaria.

⁸Te ’ba erini imbale ’diyi ka ndre ra, yi ovu aokosi, kini, Eza odu ’dini a’di ’yezu ya?

⁹Eco te odu ’diri ozi silingi kakausi, fezu ’ba alioru dri.

¹⁰Te Yesuni e’yo niria, nga ’yo yi tia, Emi oku ’diri ecandi ’dini a’disi ya? Te eri ’ye ’yeta onyiru ma dri.

¹¹Te ’ba alioru yi ovu emi be etuzu, te ma ’i, ma ovuni emi be etuzu ku.

¹²Te erini odu osuzu ma ruaari, eri ’ye eri ma ’bazu ngonde tezu ma sazu.

¹³Ma ’yo emi tia ada, pari dria ’bani e’yo baru ’diri oluzuria angu wudrikuru dria ma alia, e’yo oku ’dirini ’yeleri nga ovu oluzaru indi eri ma e’yo egazu.

¹⁴Etu ’dasi ’ba alu ’ba mudri drini iri eselia, runi Yudasi Isikariote’i, nga di mu kuhani amboru vu,

¹⁵kini, Ma ka eri fe emi dri ra emi nga le ma dri a’di fe ya? Yi ede e’yo eri be silingi fezu kali na.

¹⁶E’dozu o’du ’darisi eri nga etu onyiru nda eri fezu.

¹⁷ O’du oko mikate akufi koko runisi, ’ba erini imbale ’diyi nga emu ngoa ya?

¹⁸Eri ’yo ra, Emi mu aku amborua afa vu, emi ’yo eri tia, ’Ba ’ba Imbapiri ’yo ra, O’du mani eca ogogo; ma nga omu agaza ’ba drilesiri nya ’ba mani imbale ’diyi be mi vile joa.

¹⁹’Ba erini imbale ’diyi nga di ’ye Yesuni azile yi tiarile; yi ede omu agaza ’ba drilesiri ra.

²⁰Etu ka ’de ra, eri nga ri nyazu ’ba erini imbale mudri drini iri ’diyi be;

²¹yini nyaria, eri ’yo ra, Ma ’yo emi tia ndi, ’ba alu emi eseliari nga ma fe ari ’ba dri.

²²Yi nga ovu candisi tu aga ra, nga ’ba ’yo eri tia alu, kini, Opi, eri ma’i ya?

²³Eri nga e’yo omvi kini, ’Ba dri osupi ma be oteku ma alia ’diri nga ma fe ari’ba drini.

²⁴Te Mvi ’bani mu ra, yini sile eri ma e’yosi ’borile, te candi agu nde ’diri dri erini Mvi ’bani fele ari’ba dririsi Agu ’dari ka ndra osi ku, eri ndra eri dri ’yeke.

²⁵Yudasi ’ba eri fepi ari’ba driri nga e’yo omvi kini, Rabi, eri ma’i ya? Eri nga ’yo eri tia, Mi ’yo ’yeke.

²⁶Yini nyaria, Yesu nga mikate ’du, nga asi ndriza a’i drinia, nga aleni anyo, nga di fe ’ba erini imbale ’diyi dri, kini, Emi ’du, emi nya; ’dori rua mani.

²⁷Eri nga erejea ’du, ka awa’difo fe drinia ’bo, nga eri fe yi dri, kini, Emi dria ma mvu ’di ma alia;

²⁸te ’dori eri ari mani azizani, ovupi osuzaru ’ba kakausi e’yo onzi wuzuri.

²⁹Te ma ’yo emi tia, engazu curu’do ma ngani efi zabibu ma oriru ’diri ma su mvu aluni ku, de nga o’du mani ngazu eri mvuzu o’diru emi be suru ma Atiniria ’dari ecani ku.

³⁰Yi ka ongo ngo ’bo yi fu mu oni Mizeituni ma dria.

³¹Etu ’dasi Yesu nga di ’yo yi tia, Emi dria nga aba e’yo manisi ini ’dorisi; te e’yo ovu sizaru ’dini, Ma nga ’ba kabilo ocepiri co, kabilo o’biru nga ovu erezaru.

³²Te engata mani ma vutia, ma nga mu emi drilia Galilia.

³³Te Petero nga e’yo omvi, ’yo eri tia, ’Ba dria ka aba e’yo minisi aba ti, ma’ini, ma ngani aba aluni ku.

³⁴Yesu nga ’yo eri tia, Ma ’yo emi tia ndi, ini ’dorisi de nga a’nata ’beni cere ku, ’mi nga ma ga si pale na.

³⁵Petero Inga ’yo eri tia, Ka ovu kini ma ma dra mi be ra ti, ma econi mi gazaru laluni ku. ’Ba erini imbale ’diyi nga I’yo dria ’dinile indi.

³⁶Yesu nga di eca yi be pari omvele Getesemani’iria, nga ’yo ’ba erini imbale ’diyi ma tia, Emi ri ’doa, mani muria Mungu ziria ’dale.

³⁷Eri nga Petero pi ’du anzi Zebedayoni iri ’diyi be, nga ’ba ovu candisi azini asi otiza be tu.

³⁸Eri nga di ’yo yi tia, Ma asi ovu candisi aga ra, kpere drata mani vu; emi te I’doa, emi ko o’du ku, emi te ma be.

³⁹Eri nga mu drile were, nga avu va Mungu ziria, kini, Ata mani, ka eco ra erejea ’diri ma ovu ’duzaru ma vurisi; te mani lelerile ku, lu mini lelerile.

⁴⁰Eri nga emu ’ba lerini imbale ’diyi vu, nga yi isu o’du ikoria, nga ’yo Petero tia, ’Dini okpo emini funi dri emini tezu mile be etu alu Ina be ku ya?

⁴¹Emi ko odu ku, emi ovu mile be, emi zi Mungu indi, emi kazu fizu obeta ma alia ku; orindi ovu avaru ra ’bo, te rua ovu okpo kokoru.

⁴²Eri nga mu Mungu zizu dika pale iririsi, kini, Ma Ati, ka di econi ’duzaru ku pe Ina ma mvu eri, e’yo mini leleri ma ’ye ira.

⁴³Eri nga emu dika, nga yi isu o’du koria, yi ma mileni i ovule nzizaru o’dusirisi.

⁴⁴Eri nga yi ku dika, nga mu Mungu zi pale narisi, nga e’yo takari ’yo dika.

⁴⁵Eri nga di emu ’ba erini imbale ’diyi vu, nga ’yo yi tia, Curu’do emi ko di o’du, emi li ava; mi ndre, etu eca ogogo ’bo, Mvi ’bani ovu fezaro i ’ba ezata be ’diyi ma dria.

⁴⁶Emi enga, ama mu; mi ndre, ’ba ma fepi ari’ba driri eca ogogo.

⁴⁷Erini nga e’yo ’yoria, mi ndre, Yudasi, ’ba mudri drini iri ’diyi ma azi alu, nga eca ’ba ongulumuru kakau be, yi ma dria sei piyi kali pie, yi enga kuhani amboru piyi vu ’ba ’wara ’ba drilia ’diyi be.

⁴⁸’Ba eri fepiri fe yi dri eceta, kini, ’Ba mani ’o’boloni ndruleri eri bani eri’i; emi bi eri ci.

⁴⁹Eri nga eca Yesu vu coti, nga ’yo ra, Mi zi mi ci, Rabi! Eri nga eri ma o’bolo ndru avasi.

⁵⁰Yesu nga ’yo eri tia, Ma agyi, mi ’ye e’yo mini emuzuri. Yi nga di emu ani dri o’ba Yesu ruaa, nga eri bi ra.

⁵¹Mi ndre, ’ba ovupi Yesu be ’diyi ma azi alu nga i dri eju, nga sei ini nze, nga ati’bo kuhani amboruni ga, nga bini li va.

⁵²Yesu nga ’yo eri tia, Mi omvi sei mini i paria; te ’ba dria sei ’dupiri nga dri ja seisi ra.

⁵³Kani mi egani kini ma econi ma Ati zizaru ma etozu, erini ngazu curu’’do ma dri malaika ma ongulumu legioniru mudri drini iri ’diyi fezu, kani aga ’diyi ra ku ya?

⁵⁴Te ka ’dini ku, e’yo siza ’yopi kini ma oyu ’yezaru ’dini ’diyi nga eca ’yeke ngoni ya?

⁵⁵Etu ’dasi Yesu nga ’yo ’ba ongulumuru ma tia, Emi efu ma bizu ekile emini efule ’ba afa opapiri ma ruaa, sei pisi kali berile ya? Ma adri ndra ri etuzu hekalua ’ba imbazu, te emi bini ma ku.

⁵⁶Te e’yo ’diri ’ye i dria ’bo, e’yo nabini sile ’diyi ma eca ’yeke beni. ’Ba erini imbale ’diyi dria nga eri ku ra, nga apa ra.

⁵⁷’Ba Yesuni bipi ’diyi nga eri eji Kaifa kuhani amboruri vu, pari ’ba waraga sipi ’diyi pini yi okuzu ’ba ’wara be ’boria.

⁵⁸Te Petero nga eri vuti bi ziri, cazu kpere kuhani amboru ma iriia, eri nga fi alenia, nga ri va ’ba azi ’yepi ’diyi be, e’yo asizuri ndrezu.

⁵⁹Kuhani amboru ’diyi pi ’ba e’yo amapi ’diyi be dria nga e’yo eti nzeza inzoru nda Yesu ruaa, yi ma fu eri beni,

⁶⁰te yi isuni ku, ka tro ’ba e’yo eti inzoru nzepi ’diyi emu kakau ti. Te vilerisi ’ba iri nga emu,

⁶¹nga ’yo ra kini, Agu ’diri ’yo ra, Ma eco hekalu Munguni anzuzaru ra, eri sizu dika o’du na.

⁶²Kuhani amboru riga pa so uru, nga ’yo eri tia, Mi omvini, e’ya aluni ku ya? E’yo ’ba ’diyini asu suzu mi ruaari ngoni ya?

⁶³Te Yesu ovu ciri. Kuhani amboru nga di ’yo eri tia, Ma fe mi dri oyo so Mungu idriru ma rusi mi olu ama ria, kani mi Kristo Mungu Mvi’i ada ya?

⁶⁴Yesu nga ’yo eri tia, Mi ’yo ’yeke. Te ma yo mi tia, engazu curu’do emi nga Mvi ’bani ndre rizu Okpo ma dri ndiria, erini emuria iriti ’bua ’diyi ma alia.

⁶⁵Kuhani amboru nga afa suza ini asi, kini, Eri o’da Mungu ’boo Ama ’ba e’yo eti nzepi ’diyi le dika a’disi ya? Mi ndre curu’do, emi eri o’datani ’bo

⁶⁶Emi ega ngoni ya? Yi nga e’yo omvi kini, Fu dri drazu ra.

⁶⁷Yi nga di e’do cucu wu milenia, nga eri osi; ’ba azini nga eri osa yi dri agelesi,

⁶⁸kini, Mi ondri e’yo ama tia, mi Kristo! A’di gba mini ya?

⁶⁹Peteroni riria jo ma ri idria amve, zamva alu nga emu eri vu, kini, Mi ovuni ndra Yesu Galiliari be ku ya?

⁷⁰Te ’ba ’diyi ma milia dria eri ga si, kini, Ma nini e’yo mini ’yoleri ku.

⁷¹Te erini firia ecazu jotilia, zamva azini nga eri ndre ra, nga ’yo ’ba ’daa ’diyi ma tia, kini, Agu ’diri ovu ndra Yesu ’ba Nazaretini be.

⁷²Eri nga ga dika oyo soza be, kini, Ma nini agu ’diri ku.

⁷³Etu were ma vutia, ’ba pa sopi ’daa ’diyi nga emu ’yo Petero ma tia, Mi indi, mi ’ba yini ada, te ti ’yoza minini mi ecelerisi.

⁷⁴Eri nga di ’ba i otrizu oyo soza be, kini, Ma nini agu ’diri aluani ku. Coti a’nata nga cere ’be.

⁷⁵Petero nga di e’yo ndra Yesuni 5 ’yoleri ega, kini, De nga a’nata ’beni cere ku mi nga ma ga si pale na. Eri fu amve, nga wu mindresi tu.