Read lugbara Matayo 28 Bible Online

Matayo 28 - lugbara bible

Matayo 28

¹O’du sabatonini deria, anguni ’baria atiria o’du alusi, Maria Magadaleni pi emu nyadri ndrezu Maria andiniri be.

²Mi ndre, oyakia amboru oya angu; malaika Opini esi va engazu ’bua, nga eca era gule tiari guzu amve, nga ri drinia.

³Wura erini e’da i ovile, afa suza erini emveru sile

⁴Eri ma urisi ’ba angu agei tepi ’diyi ma rua ya, yi nga ofu ’ba drazale.

⁵Te malaika nga e’yo omvi ’yo oku tia kini, Emi ru ku; te ma ni ra emi Yesu ndra dile pati ruaari nda.

⁶Te eri ’doa yo; eri enga a ’bo, ekile erini ndra ’yolerile. Emi emu ’doa, pari te erini lazuri ndre.

⁷Emi mu mbele e’yo olu ’ba erini imbale ’diyi ma tia, kini, Eri enga a ’ba draza eselia ’bo, te mi ndre, eri mu emi drilia oko Galilia; emi nga eri ndre ’dale. Mi ndre, ma olu emi tia ’bo.

⁸Yi enga gule tiarisi mbele, urisi azini ayiko amborusi, yi nga nzu e’yo olu ’ba erini imbale ’diyi ma tia,

⁹Mi ndre, Yesu fu dri yi be, nga ’yo ra, Ma zi emi ci! Yi emu eri ma pa bi, eri inzizu.

¹⁰Yesu nga di ’yo yi tia, Emi ru ku; emi mu, lemi olu ma adripi tia kini yi ma mu Galilia, yi nga ma ndre ’dale.

¹¹Yini de muria, mi ndre, ’ba angu ma agei tepi ’diyi ma azini mu aku amborua, nga e’yo dria ovupi ’yezaru ’diyi olu kuhani amboru piyi ma tia.

¹²Yi ka yi ti oku tualu ’ba wara be, ka e’yo ede ’bo, yi fe silingi kakau asikari dri,

¹³kini, Emi ’yo kini ’Ba erini imbale ’diyi emu inisi avuni oguzu, de amani o’du koria.

¹⁴E’yo ’di ka nga ca gavena ma bi lia ra, ama nga eri imba eri ojazu, ama nga e’yo emi driari tru ra.

¹⁵Asikari nde nga silingi a’i, nga ’ye ’bani yi imbalerile; e’yo ’diri ku ’ba Yahudini ma eselia wakaka ecazu kpere andru.

¹⁶Te ’ba erini imbale mudri drini alu ’diyi nga mu Galilia, oni dria, pari Yesuni azile yi driria.

¹⁷Yi ka eri ndre ra, yi inzi eri; te ’ba azini a’ini ku.

¹⁸Yesu nga emu ’yo yi tia kini, Okpo dria ’bu pi ma alia nyaku beri ovu fezaru ma dri.

¹⁹Emi mu ani, emi oja suru dria ’ba ma vuti bipiriru, emi fe baputizi yi dri ru Atanisi, Mvinisi, orindi Alatararunisi,

²⁰yi imbazu e’yo dria ndra mani azile emi tia ’diyi ta mbazu; te mi ndre, ma ovu lemi be o’du vusi dria, kpere angu wudrikuruni i deria.