Read lugbara Matayo 5 Bible Online

Matayo 5 - lugbara bible

Matayo 5

¹Erini ’ba ongulumuru ndreria, eri nga tu oni dria; ka ri va ’bo, ’ba erini imbale ’diyi nga eca eri vu.

²Eri nga i ti’e zi, nga yi imba kini:

³Ba alioru orindi ma alia ’diyi yi drilebaru, te suru ’buari yini.

⁴’Ba candi ’bapi ’diyi yi drilebaru, te yi nga yi asi omi.

⁵’Ba e’yere ’diyi yi drilebaru, te yi nga angu bi awurusoru.

⁶’Ba e’yo kililiruri ma abiri pini fule yi avijo be ’diyi yi drilebaru, te yi nga tia ra.

⁷’Ba yiki be ’diyi yi drilebaru, te yi nga yiki isu ra.

⁸’Ba asi alaru be ’diyi yi drile ’baru, te yi nga Mungu ndre.

⁹’Ba asi anzuru fepi ’diyi yi drilebaru, te ’ba nga yi omve anzi Munguni

¹⁰’Ba inzale e’yo kililirusi ’diyi yi drilebaru, te suru ’buari yini.

¹¹Emi drilebaru, ’ba ka emi o’da, ’ba ka emi inza, ’ba ka e’yo onzikanyaru dria ’yo emi ruaa, inzo lizu emi dria e’yo manisi.

¹²Emi ovu di ayikosi nyona be tu, te oya emini amboru ’bua; a’disiku inza ndra nabi emi drilia oko ’diyi ’dini.

¹³Emi a’i nyakuni; a’i nde ma aji ka i de ra, emi nga fe eri ma ovu aji be a’di afasi ya? Fu dri dika afa aluni ’yezu ku, te lu dazu amve ’bani otuzu pasi,

¹⁴Emi diza wudrikuruni. Aku sile oni driari econi i zizaru ku.

¹⁵Yi ’ini tala eri ’bazu afazu etia ku, te eri ’bazu afa tala ’bazuri ma dria uru, eri nga di ’ba dria ovupi joa ’diyi vu ani.

¹⁶Diza emini ma di ’ba ma milia ’dini, yi ma ndre ’yeta emini onyiru ’diyi, ma inzi Ati emini ovupi ’buari ani beni.

¹⁷Emi osu ma eca azita pi ’bazu toko nabi be, ’dini ku; ma eca e’yo ’bazu toko ku, te e’yoni yi ’yezu yi paria ’yeke’i.

¹⁸Ma ’yo emi tia ndi, ’bu nyaku be ka yi de ra ti, azita ma nukuta alu kani afa gakandiaru dule nyuri aluni ngani i de itu, de nga afa dria ’yeni yi ’paria leu.

¹⁹’Ba ka ngoni ti, ka azita werearu tu ’diyi ma azi alu eza ra, ka ’ba imba ’yezu ku indi, yi nga eri omve ’ba werearu tu suru ’buaria; te ’ba ka ’ye ra, ka yi imba ’ba tia indi, yi nga eri omve ’ba amboru suru ’buaria.

²⁰Te ma ’yo emi tia, e’yo kililiru emini ka ’ba waraga sipi ’diyiniri aga ’ba Farisaini be ku, econi emini fizaru suru ’buaria ku.

²¹Emi eri kini yi ’yo ’ba drio ’diyi ma tia ’bo, Mi ’di ’ba ku; ’ba Ita ’ba ’di ra, e’yo lizani nga eri nde ra.

²²Te ma’i, ma ’yo emi tia kini ’ba dria alu, ka ovu aokosi adripi erini be, e’yo lizani nga eri ode ra; ’ba auni ka adripi erini ede, e’yo amazani nga eri nde ra; te ’ba ka ’yo, Mi aza, e’yoni nga eri nde cazu Jehanuma aciniria.

²³’Dini mi ka afa mini awa’diforuri eji pari edeta edezuria, te ’daa mi ka osu mi adripi ovu e’yo be mi vu,

²⁴mi ku afa mini awa’diforuri pari edeta edezuri ma drilia, mi mu ti ecizu e’yo edezu mi adripi be oko raka, mi nga di emu afa mini awa’diforuri fe ndo.

²⁵Mi ede e’yo onyiru ’ba mi topiri be mbele, de mi eri be geria; ’ba mi topiri kazu mi ejizu ’ba e’yo lipiri vu ku, ’ba e’yo lipiri kazu mi fezu asikari dri ku, kazu mi ’bezu arujoa ku;

²⁶ma ’yo mi tia ndi, mi ngani efu aleniarisi ’de ku, kpere mini sente alu acepiri oferia ku.

²⁷Emi eri kini ’yo e’yo ’bo, Mi ’ba ali ku.

²⁸Te ma ’yo emi tia ’ba dria alu oku ndrepi asisile dropi drinia lisiri, ’ba ali eri be i ma asia ’bo.

²⁹Mi mile dri ndiari ka fe mi aba ra, mi nze eri mi ruaarisi, mi ’be eri; eri mini onyiru mi rua ma esele aluni avizu, aga yini mi rua ’bezu pi Jehanumaari ra.

³⁰Mi dri ndiri ka fe mi aba ra, mi ga eri mi ruaarisi, mi ’be eri; eri mini onyiru mi rua ma esele aluni avizu, aga mi rua driarini fizu Jehanumaari ra.

³¹’Yo i ’dini indi, Agu ka oku erini liro ra, eri ma fe waraga eri drozuri eri dri.

³²Te ma ’yo emi tia, ’ba dria alu oku dropi, de oku nde ’bani a kuri, fe eri dri ali ’bazuni; te ’ba oku drole rari bipiri ’ba vini ali indi.

³³Dika, emi eri kini yi ’yo ’ba drio ’diyi ma tia ’bo, Mi so oyo inzosi ku, te mi ma ofe oyo mini Opi dri.

³⁴Te ma’i, ma ’yo emi tia, Mi so oyo aluni ku; kani ’bu rusi, eri oguna Munguni;

³⁵kani nyaku rusi, eri pari erini pa ’bazuri; kani Yerusalemu rusi, eri aku amboru Meleki amborurini.

³⁶Mi so oyo dri mini e’yosi ku, te econi mini dribi efi aluni ojazaru kani emveru kani iniru ku.

³⁷E’yo ’yoza mini ma ovu ’dini, E, e; Yo, yo; te e’yo o’bale drinia ’diyi ibi ’ba onzi vu.

³⁸Emi eri, ’yo e’yo ’dini, Mile, pi ma obi dri mile be, si pi si be.

³⁹Te ma ’yo emi tia, Emi oga ’ba onzi ku. ’Ba ka mi sa o’bolo dri ndiaria, mi oja aziniri eri dri indi;

⁴⁰’ba ka le mi to, bongo mini alialeruri pazu, mi ku eri dri, mi fe vini koti indi;

⁴¹te ’ba ka mi bi okposi muzu i be mailo alu, mi mu eri be iri.

⁴²Mi fe ’ba mi zipiri dri, mi oja mi nguku ’ba lepi mari a’ipi mi driri vu ku.

⁴³Emi eri kini ’yo e’yo ’dini, Mi le mi agyi, mi ngu ari’ba mini’i.

⁴⁴Te ma ’yo emi tia, Emi le ari’ba emini, emi zi Mungu tia ’ba emi inzapi ’diyi dri,

⁴⁵’dini emi ma ovu anzi ati emini ovupi ’buarini ani; te eri fe etuni di ’ba onzi piyi ma dria ’ba onyiru ’diyi be, ozoo fezu ’ba kililiru ’diyi pi ma dria ’ba kililiru ku ’diyi be.

⁴⁶Emi ka ’ba emi lepi ’diyi le’i, oya emini ngoa ya? ’Ba musoro okupi ’diyi ’yeni tro tro ’dini ku ya?

⁴⁷Emi ka emi adripi zi’i a’dule, ’yeta emini agapiri a’dini ya? ’Ba jururu ’diyi ’yeni tro tro ’dini ku ya?

⁴⁸E’yo ’disi emi ma ovu ’yeke, ekile Ati emini ovupi ’buarini ovule ’yekerile.