Read lugbara Matayo 8 Bible Online

Matayo 8 - lugbara bible

Matayo 8

¹Erini esiria oni driarisi ’bo, ’ba ongulumuru kakau nga eri ma vuti bi.

²Te mi ndre, ’ba ofu beri nga eca eri vu eri inzizu, nga ’yo kini, Opi, mi ka le ra, mi eco ma rua ’bazaru alaru.

³Eri nga i dri eju, nga ruani elo, kini, Ma le ra; mi rua ma ovu di alaru. Coti ofu erini ati ra.

⁴Yesu nga ’yo eri tia, Mi ndre mi ’yo ’ba azini ma tia ku; te mi mvi, mi ece mi kuhani vu, mi ji afa feza Musani ndra azileri, ecetaru yi dri.

⁵ Erini firia kaperinaumua, ’ba asikari turu alu ma driliari nga eca eri vu, matu ’bazu eri vu

⁶kini, Opi, ati’bo mani la joa, aco azoni eri inza tu.

⁷Yesu nga ’yo eri tia, Ma nga mu eri rua ati.

⁸’Ba asikari turu alu ma driliari nga ’yo kini, Opi, ma sini ’ba mini fizu eri vile Joariru ku; nu mi’yo e’yo’i ati’bo mani ma ruani nga ati ra.

⁹Ma ’ba ovupi azita okpo beri ma palaari, asikari ma palaa indi; ma ka ’yo ’ba ’diri ma tia, Mi mu, eri mu ra aziniri ma tia, Mi emu, eri emu ra; azini ati’bo mani ma tia, Mi ’ye ’dini, eri ’ye ra.

¹⁰Yesu ka eri ra, eri nga osu tu, nga ’yo ’ba i vuti bipi ’diyi ma tia, Ma ’yo emi tia ndi, drio ma isuni a’ita amboru ’dopi ’donile ’ba aluni Israeli ma eseliari vu ku.

¹¹Ma ’yo emi tia kini ’ba kakau nga enga etuni efuria, azini etuni ’deria, yi nga ri va pari alua Iburahimu pi, Isaka pie, Yakobo pie, suru ’buaria,

¹²te anzi suruni nga ovu ’bezaru angu inicici amveria; ’dale awu pi nga ovu indi sikala nyaza be.

¹³Yesu nga ’yo ’ba asikari turu alu ma driliari tia, Mi mvi; ekile mini a’ilerile, ma ’ye i mi vu ’dini. Ati’bo erini ma rua ati coti sawa ’dasi ra.

¹⁴ Yesuni firia Petero vile joa, eri nga eri ma idrini ndre lazaru azoru rua driza be;

¹⁵eri nga eri ma dri elo, rua drizani nga eri ku ra, eri nga enga ra, azi ngazu eri dri.

¹⁶Ka eca ondresi yi nga ’ba kakau orindi onzi be ’diyi eji eri vu; eri nga orindi onzi odro e’yo ’yozasi, nga ’ba dria azo be ’diyi ati ra.

¹⁷’Dini e’yo ndra nabi Isayani ’yoleri ma eca ’yeke, kini, Eri ’du okpoako amani, eri azo amani i ruaa indi.

¹⁸Yesu ka ndre ’bo ongulumuru ace eri kuru, eri azi zozu muzu ’aa’dasi.

¹⁹’Ba waraga sipiri alu nga eca eri vu, nga ’yo eri tia, ’Ba ’ba imbapiri, ma nga mi vuti bi pari mini muzuria dria.

²⁰Yesu nga ’yo eri tia, Obalako gule yini ci azini aria ’bua ’diyi jorovu rini ci; te Mvi ’bani dri pari erini dri ’bazuri yo.

²¹Ba eri ma vuti bipi ’diyi ma azi ’yo eri tia,Opi, mi ku ma mu ma atini sa oko raka.

²²Te Yesu nga ’yo eri tia, Mi bi ma vuti,mi ku ’ba draza ma sa ’ba draza yiniri.

²³ Erini firia ogurua, ’ba erini imbale ’diyi nga vutini bi.

²⁴Mi ndre, oliriko amboru nga eca mirini engazu ngolingoli, ’dini yi ombupi omburi nga i ada oguru alia; te eri’i, de eri o’du ko.

²⁵Yi nga emu eri vu, nga eri enga ra, kini, Opi, mi pa ama, ama dri ja ’do!

²⁶Eri riga; ’yo yi tia, Emi ovu urisi a’disi ya, emi ’ba a’ita be were ’diyi? Eri nga di enga, nga ove oliriko pi ma dria miri be; angu nga ndri tili.

²⁷’Ba nde ovu titi e’yo osuzu, kini, ’Ba ’diri ’ba ngonini ya, oli pini miri be eri ma e’yo erizu?

²⁸Eri ka ca ’aa’dasi, ’ba Gadaraa ’diyi ma angua ’bo, ’ba orindi onzi be iri nga dri fu eri be; yi ibi efu nyadria, yi ombaru tu, ’dini ’ba aluni econi alizaru geri ’dasi ku.

²⁹Mi ndre, yi oyu uru kini, Ama e’yo mi be ngoni ya, mi Mvi Munguni? Mi emu ’doa ama inzazu ewuni ecakokoru ya?

³⁰Ezo o’biru ovu yi be re ’daa, iribi nyaria.

³¹Orindi onzi nga matu ’ba vunia kini, Mi ka ama dro ra, mi pe ma ti ezo o’biru ma alia fo!

³²Eri nga ’yo yi tia, Emi mu. Yi nga fu, ezo ma alia; te mi ndre, ezo o’biru dria nga ali rri, nzu oni gulukuru ma driarisi o’dezu miri ma alia, nga odra isi ra.

³³’Ba yi ocepi ’diyi nga apa a, nga mu aku amborua, nga e’yo olu dria, olu e’yo ’ba orindi onzi be ’diyini indi.

³⁴Te mi ndre, ’ba aku amborua ’diyi dria nga fu dri fuzu Yesu be; ka eri ndre ’bo, yi nga matu ’ba eri vu kini ma ku angu yini ma kalati ra.