Read lugbara Matayo 9 Bible Online

Matayo 9 - lugbara bible

Matayo 9

¹ Eri nga fi ogurua zozu aa’dasi cazu aku ’amboru erinia.

²Mi ndre, yi nga ’ba acozaru eji vunia eri la gbolo dria;Yesuni a’ita yini ndreria,nga’yo’ba acozaruri ma tia,Mva mani,mi bi mi asi;e’yo onzi mini ovu wuzaru.

³Mi ndre, ’ba waraga sipi’diyi ma azi nga ’yo yi asia Ba ’diri eri Mungu o’da.

⁴Te yesu e’yo osuza yini niria, nga yo ra, Emi osu e’yo onzi emi asia a’disi ya?

⁵Ewa kokoruri ngori, ’yozu, E’yo onzi mini ovu wuzaru, kani ’yozu, Mi nga, mi aci-ri’i ya?

⁶Te emini nizu ani Mvi ’bani ovu okpo be nyakua e’yo onzi wuzu--eri nga di ’yo ’ba acozaruri ma tia-Mi nga, mi ’du gbolo mini, mi mvi mi vile akua.

⁷Eri nga enga mvizu aku erinia.

⁸Te ’ba ongulumuru ka ndre ra yi ovu urisi, yi nga diza fe Mungu okpo fepi ’ba dri ’dopi ’doniri dri.

⁹Yesuni agaria ’dasi, eri nga ’ba ndre erini riria pari ’bani musoro ’bezuria, runi Matayo’i; nga ’yo tinia, Mi bi ma vuti. Eri nga enga ra, nga eri ma vuti bi.

¹⁰Eri nga eca ’dini, erini riria joa nyaka nyaria, mi ndre, ’ba musoro sopi ’diyi ’ba e’yo ezapi ’diyi be kakau nga emu ri pari alua Yesu pi vu ’ba erini imbale ’diyi be.

¹¹’Ba Farisaini ka ndre ra, yi nga ’yo ’ba erini imbale ’diyi ma tia kini, ’Ba emi imbapiri eri nyaka nya ’ba musoro sopi ’diyi be, ’ba e’yo ezapi ’diyi pie, a’disi ya?

¹²Te eri ka eri ra, eri nga ’yo, ’Ba rua be alaru leni ojou ku, te ’ba rua onzi be ’diyi leni

¹³Te emi mu e’yo ’diri ma e onizu, Ma le yikini, ma leni afa feza edetaruri ku. Te ma emuni ndra ’ba kililiru ’diyi omvezu ku, te ’ba ezata be’diyi.

¹⁴ ’Ba Yohanani imbale ’diyi nga di emu eri vu, ’yozu kini, Ama’i ’ba Farisaini be, ama adri nyaka ’da, te ’ba mini imbale ’diyi ’dani nyaka ku a’disi ya?

¹⁵Yesu nga ’yo yi tia, Anzi omu oku jezuria ’diyi, eco yini awu wuzaru de izioni yi be indi ya? O’du izioni i esele cozu yi beri nga eca ra; yi nga di nyaka ’da etu ’dasi ndo.

¹⁶’Ba aluni ecini bongo o’diru ojile kuri afa suza okuri ma ruaa ku, a’disiku rogani nga afa suza nde ma mile oku, ceta nderi nga eca onzikanyaru aga ra.

¹⁷’Ba econi patiefi ma su o’diru tozaru enyi okuri ma alia ku; ’ba ka ’ye ’dini, enyini nga asi ra, patiefi ma suni nga i da va, enyini nga i eza teketeke indi; te ’ba yi patiefi ma su o’diru to enyi o’diru ma alia, yi nga yi ta mba iritro.

¹⁸Erini e’yo ’diyi ’yoria yi tia, mi ndre, ’ba amboru nga eca ra, nga eri inzi,kini Ma zi de cucuru’do; te mi emu, mi ti mi dri eri ruaa, eri nga ovu idriru.

¹⁹Yesu nga enga eri vuti bizu, ’ba erini imbale ’diyi be.

²⁰Te mi ndre, oku arini razu ruania eli mudri drini iriri nga eca eri ma ngukualeru, nga afa suza erini ma ti elo;

²¹te eri ’yo i asia kini, Ma ka bongo erini elo a’dule, ma ruani nga ati ra.

²²Te Yesu nga ti co ngukuleru, nga eri ndre ra, nga ’yo kini, Zaa, mi bi mi asi; a’ita mini ati mi rua ’bo. Oku ma rua ati etu ’dasi ra.

²³Yesu ka eca ’ba amboru ma joa, eri nga ’ba guka vupi ’diyi ndre, ’ba ongulumuru otrepi ’diyi be,

²⁴eri nga ’yo ra, Emi da emi ’dale; te zamva drani ku, eri o’du ko. ’Ba nga eri Ogu tu.

²⁵Te ’ba ongulumuru ka ovu drozaru amve ’bo, eri nga fi ra, nga eri ma dri bi; zamva nga enga ra.

²⁶E’yo ’diri ku angu ’dari ma alia dria.

²⁷Yesuni agaria ’dasi, ’ba mile draza be iri nga eri vuti bi, yi nga oyu uru, nga ’yo ra, Mi ovu yikisi ama vu, mi Mvi Daudini.

²⁸Eri ka fi joa ’bo, ’ba mile draza be ’diyi nga emu eri vu; Yesu nga ’yo yi tia, Emi a’i ma eco e’yo ’diri ’yezaru ya? Yi nga ’yo eri tia, E, Opi.

²⁹Eri nga di yi mile elo, kini, Ma ovu ’yezaru emi dri a’ita emini vusi.

³⁰Yi mile nga yi zi ra. Yesu nga yi imba okposi kini, Emi ndre ’ba azini ma ni e’yo ’diri ku.

³¹Te yi nga fu, e’yo erini ekuzu wakaka angu ’dari ma alia dria.

³²Yini efuria, mi ndre, yi nga ’ba e’yo ’yopi ku, orindi onzi beri eji eri vu.

³³Eri ka orindi onzi dro ’bo, ’ba e’yo ’yopi kuri nga e’yo ’yo; te ’ba ongulumuru nga osu tu, ’yozu kini, Drio e’dani ’dini ’ba Israelini ma eselia ku.

³⁴Te ’ba Farisaini nga ’yo ra, Eri orindi onzi odro opi orindi onzi ma driliarisi.

³⁵Yesu nga aci aku ambo ’diyi ma eselia aku nyiri ’diyi be dria, ’ba imbaria pari yini yi okuzuria, e’yo bari suruniri oluzu, azo dria atizu, dra be dria.

³⁶Te erini ’ba ongulumuru ndreria, eri nga ovu asi ndrizasi yi vu, yini ovule andezaru azini yini yi erele ekile kabilo ovupi ’ba yi ocepiri kokoru ’diyilerisi.

³⁷Eri nga ’yo ’ba erini imbale ’diyi ma tia, Afa kaza kakau ada, te ’ba azi ngapi ’diyi yi were;

³⁸emi zi ani Opi afa kazaniri ma tia, ma pe ’ba azi ngapi ’diyi ma ti afa kaza erini ma alia.