Read lugbara Marako 10 Bible Online

Marako 10 - lugbara bible

Marako 10

¹ Eri nga enga ’dasi, eri nga di emu angu Yudiaari ma tia azini Yoridania ’aa’dasi; ’ba ongulumuru nga yi oku yunia dika, eri nga yi imba dika erini adrile ’yelerile.

²’Ba Farisaini nga emu yunia, nga zi tinia, eri o’bizu, kini, Azita a’i aguni i ma oku drozu ra ya?

³Eri nga e’yo omvi, nga ’yo yi tia kini, Musa azi ndra emi dri ngoni ya? 4

⁴Yi nga ’yo kini, Musa a’i ndra ’bani waraga oku drozuri sizu eri ti pezu ra,

⁵Te Yesu nga ’yo yi tia kini, Eri si ndra azita ’diri asi mbaza eminirisi

⁶Te ewu okokele e’dozu ’ba ’bazurisi, eri ’ba ndra agupi pi oku be.

⁷E’yo ’dirisi ’ba ma ku ati pi andri be, ma ebi i oku ini be,

⁸yi iri tro ma ovu rua alu. ’Dini yi ovuni iri dika ku, te ma alu.

⁹’Bai Munguni a’dileniri, ’ba ndi ma co eselenini ku.

¹⁰Ka ovu joa, ’ba erini imbale ’diyi nga zi tinia dika e’yo ’dirisi.

¹¹Eri nga di ’yo yi tia kini, ’Ba azini ka oku erini dro ra, ka oku andini je, eri di ali ’ba eri be;

¹²oku nde agupi ini kupi rari ka, okuru ’ba azini dri, eri di ali ’ba indi.

¹³Yi eji anzi nyiri nyiri vunia, eri ma elo yi rua; ’ba erini imbale ’diyi nga di ega yi dria,

¹⁴Yesu ka ndre ra, eri nga ovu ombasi yi be, nga ’yo yi tia kini, Emi ku anzi nyiri nyiri ma emu ma vu, emi ma oga yi si ku; te suru Munguniri ovu ’ba ’dini’diyini,

¹⁵Ma ’yo emi tia ndi ndi, ’ba azini ka suru Munguni a’i mva werearile ku, eri ngani fi alenia aluni ’de ku.

¹⁶Eri nga yi oku i ma wua, nga asi ndriza fe yi dri, erini dri otiria yi dria.

¹⁷Erini furia geria, ’ba azini nga enzu vunia, nga kumuti osi, nga zi tinia kini, ’Ba ’ba Imbapi bari, ma nga a’di ’ye, mani idri ’dani ’daniri isuzu beni ya?

¹⁸Yesu nga ’yo tinia kini, Mi omve ma baru a’disi ya? ’Ba baruni yo, kiri alu Mungu’i,

¹⁹Mi ni azita ra, kini Mi ’di ’ba ku, Mi ogu ku, Mi li inzo ’ba azini ma dria ku, Mi ’du ’ba azini ma afa lokirisi ku, Mi inzi mi ati pi mi andri be.

²⁰Eri nga ’yo tinia kini, ’Ba ’ba Imbapiri, ma mba e’yo ’diyi ma ta dria gbu mvasi,

²¹Yesuni eri luria, eri ma ava nga eri va, eri nga ’yo tima kini, Afa ace nga mi dri alu indi; mi mu, afa mini fe je dria, mil awa ’ba alioru ’diyi dri, te mi nga lonyi isu ’bua; mi ma emu di ma vuti bi ndo.

²²Te e’yo ’yoza ’dirisi eri nga i ma mile su va, eri nga mvi candi be, erini ovule afa be turisi.

²³Yesu nga angu olu i ageia, nga ’yo ’ba erini imbale ’diyi ma tia kini, Ba afa e’iru ’diyini fizu suru Mungu niria ewani ’doni!

²⁴’Ba erini imbale ’diyi nga osu tu e’yo erini ’yolerisi. Te Yesu nga e’yo omvi dika, nga ’yo yi tia kini, Anzi la, ’ba a’ita ’bapi lonyi dria ’diyini fizu suru Munguniria ewani ’doni!

²⁵Ngamiani fizu sindani ma ’bile talaasiri bani ewa kokoruni aga ’ba afa e’ini fizu suru Munguniriari ra.

²⁶Yi nga osu osu tu, nga ’yo tinia kini, Ka’dini a’dini nga te i pani ya?

²⁷Yesuni mile suria yi ruaa, nga ’yo kini, Econi ’ba ndini ku, te Munguni ’dinini yo; afa dria eco Mungu dri ra.

²⁸Petero ’ba ’yo tinia kini, Mi ndre, ama ku ndra afa dria, ama bi mi vuti.

²⁹Yesu nga ’yo kini, Ma’yo emi tia ndi ndi, ’ba azini ka jo pi ku, adripi pie, amvipi pie, andri pie, ati pie, anzi pie, angu pie, dria ma rusi, e’yo barisi indi,

³⁰eri nga afa isu paleko turu curu’do ewu ’dorisi, piyi, adripi pie, amvipi pie, ndripi pie, anzi pie, angu pie dria, tualu inzata be; azini ewu emupi vileria idri ’dani ’daniri.

³¹’Ba karakarau ndra ovupi oko ’diyi nga eca ’ba vile ’diyiru, ’ba vile ’diyi’ba oko ’diyiru.

³² Yi ovu de geria turia Yerusalemua, Yesu ce de dri yi drilia; yi ’nga osu osu, ’ba vutini bipi ’diyi nga ovu urisi. Eri nga ’ba mudri drini iri ’diyi ’du kalaa dika, nga ’ba e’yo ngapi i ’yepi eri ruaari olu yi tia,

³³kini, Emi lu, ama tu Yerusalemua; yi nga Mvi ’bani ’du fe kuhani amboru piyi dri, karani pie; yi nga eri ma e’yo li ma dra ra, yi nga eri fe ’ba jururu dri;

³⁴yi nga eri ede lede ogutasi, nga cucu wu milenia, nga eri co ninisi, nga eri fu ndo; te,o’du na ma vutia eri nga enga dika.

³⁵Zebedayo anzipi Yakobo pi ’Yohana be, nga emu vunia, nga ’yo tinia kini, ’Ba ’ba Imbapiri, ama le ’Imi ’ye ama dri e’yo dria amani zile mi tiari.

³⁶Eri nga ’yo yi tia kini, Emi le ma ’ye emi dri a’dini ya?

³⁷Yi ’yo tinia kini, Mi fe ama ma ri, alu mi dri ndiria, alu mi dri ejiria, diza mini ma alia.

³⁸Te Yesu nga ’yo yi tia kini, Emi nini e’yo emini izileri ku. Emi ceo okelea mani imvuleri mvuzaru, kani baputizi Imani bileri bizaru ra ya?

³⁹Yi nga ’yo tinia, Ama ceo ra. Yesu nga di ’yo yi tia kini, Emi nga okelea mani mvuleri mvu ra; emi nga baputizi mani bileri bi ra;

⁴⁰te rizu ma dri ndiria, kani ma dri ejiriari ovuni e’yo mani fezu ku, te pari nde ovu ’ba yini eri edezu yi dri ’bo ’diyini.

⁴¹’Ba mudri ’diyi ka e’yo nde eri ra, yi ’ba ovu aokosi Yohana pi vu Yakobo be.

⁴²Yesu nga yi omve i vu, nga ’yo yi tia kini, Emi ni ra, ’ba yini opele ’ba ’ba dri cepi juru drilia ’diyi adri ’ba dri ce okposi; ’ba ’wara yini adri yi ayu ati’baru.

⁴³Te e’yo ngani ovu emi eselia ’dini ku; te ’ba lepi ovupi amboru emi eseliari ma ovu ’ba emi aza kopiri’i,

⁴⁴te ’ba lepi ovupi ’ba drileru emi eseliari, eri ma ovu ati’bo ’ba driani.

⁴⁵Te Mvi ’bani emuni ’bani azi ngazu eri dri ku, te azi ngazu ’ba dri idri erini fezu ’ba karakarau ma arioti ofezu.

⁴⁶Yi nga eca Yerikoa; erini furia Yerikoasi ’ba erini imbale ’diyi pie ’ba ongulumuru ambo ’diyi be, Baritimayo Timayo mvi, ’ba mile efi draza be adripi afa a’ipiri, eri ri de geri tia.

⁴⁷Eri ka eri ’di Yesu ’ba Nazaretiari’i, eri ’ba oyu uru kini, Yesu mi Daudi mvi la! mi ’ba yiki ma vu fo!

⁴⁸’Ba o’biru nga ’ba i ega drinia kini ma adri ciri; te eri nga oyu okposi aga ra kini, Mi Daudi mvi, mi ’ba yiki ma vu fo!

⁴⁹Yesu nga pa so ci, nga ’yo kini, Emi omveli eri. Yi nga ’ba mile efi draza beri! omve, kini, Mi asi ma oti ku; mi nga, eri mi omve.

⁵⁰Eri nga di bongo erini ’be va, nga mbu uru, emu Yesu vu.

⁵¹Yesu nga e’yo omvi tinia kini, Mi le ma ’ye mi dri a’dini ya? ’Ba mile efi draza beri nga di ’yo tinia kini, Imbapi, ma ma ndre angu.

⁵²Yesu nga ’yo tinia kini, Mi mu di; a’ita mini pa mi ’bo. Coti eri nga angu lu ’yeke, eri nga vutini bi geria.