Read lugbara Marako 15 Bible Online

Marako 15 - lugbara bible

Marako 15

¹O’bitisi coti, kuhani amboru piyi ’ba ’wara pie, karania pie, ’ba e’yo amapi ’diyi pie dria nga yi ti otu tualu, nga Yesuni ’i ji fe Pilato dri.

²Pilato nga zi tinia kini, Mi Opi ’ba Yahudini ya? Eri omvi e’yo, ’yo tinia kini, Mi ’yo ra.

³Kuhani amboru yi nga asu su ruani: kakau.

⁴Pilato nga zi tinia dika cini, Mi omvini e’yo ku ya? Mi ndre, yi asu su mi ruaa ’dopi ’doni.

⁵Te Yesu omvini e’yo dika ku; Pilato nga osu ani osu osu.

⁶Omu nya ngare vusi eri adri ’ba aruru alu tru yi dri, ’ba yini zileri’i,

⁷Ombe ’ba azini arujoa, runi Baraba’i, eri ’ba omba ’uapi opi be, ’ba ’ba ’dipi omba nde alia ’diyi ma azi.

⁸’Ba ongulumuru tu di vunia, e’do zi tinia eri ma ’ye erini adrile i’yelerile.

⁹Pilato nga e’yo omvi yi tia kini, Emi le ma tru emi dri Opi ’ba Yahudini ya?

¹⁰Erini vale kini kuhani amboru yi fe eri i dri ma’yalasirisi.

¹¹Kuhani amboru nga ’ba ongulumuru ma bile imba, ’kini bani eri ma tru yi dri Barabani’i.

¹²Pilato nga e’yo omvi yi tia dika kini, Ma nga ’ye ngoni ’ba emini omvele Opi ’ba Yahueliniri be ya?

¹³Yi nga otre uru dika kini, Ma di eri pati ruaa!

¹⁴Pilato nga ’yo yi tia kini, A’disi ya? Onzi erini ’yeleri ngoni ya? Te yi nga otre uru aga ra, kini ma di eri pati ruaa.

¹⁵Pilato, erini leria ayiko fezu ’ba ongulumuru dri, nga Barabani tru yi dri ani; te eri ka Yesuni co ’bo, eri fe eri yi dri dizu pati ruaa.

¹⁶Asikari nga eri ji oli riidri ma alia, adani opijo omvele Praitoriori’i; yi nga asikari ongulumuru omve dria tualu.

¹⁷Yi nga bongo ondralakondralaru su ruania, yi oci ekila okuru, nga su drinia.

¹⁸Yi ’ba eri zi, kini, Mi zi mi ci ci, Opi ’ba Yahudini lou!

¹⁹Yi nga eri dri ogba ozusi, yi nga cucu wu ruania, nga kumuti osi tinia, nga eri inzi ra.

²⁰Yi ka eri dri inza ’bo, yi nga bongo ondralakondralaru nderi tiri eri ruaasi, nga eri vile bongori su’i. Yi nga di eri ofu amve, ji dizu pati ruaa.

²¹Yi nga ’ba agapi geria engapi aseari omi okposi pati alaza eriniri ’duzu; eri Simoni ’ba Kureneni, Alegezanda pi ma ata Rufusi beri’i.

²²Yi nga eri eji pari omvele Gologotaria (efini pari dri falaniri’i).

²³Yi nga eri dri patiefi ma su osazaru aro beri fe, te eri mvuni ku.

²⁴Yi nga eri di ra, nga bongo erini awa awa, yini yi ’beria odrisisi, ’ba alu aluni isu ngoni yari nizu.

²⁵Eri etu na, yi nga eri di pati ruaa.

²⁶E’yo eri tozuri ma e’yo siza si i uru ’dini, OPI YAHUDINIRI’I.

²⁷Yi eli oguo iri pati ruaa eri be indi, alu dri ndiria, alu dri ejiria.

²⁸E’yo siza ’ye i i paria ’yeke, kini, La eri ’ba e’yo ezapi ’diyi ma aziru.

²⁹’Ba agapi geria ’diyi ri eri o’da o’da, yini yi dri oyaria, kini, Ha! Mi ’ba hekalu anzupi eri sipi o’du nari mi’i,

³⁰mi pa mi ngulupi, mi si pati ruaarisi va!

³¹’Dinile kuhani amboru, yini eri oguria yi eselia karania be, nga ’yo kini, Eri opa ndra ’ba azini ’diyi ra, te econi erini i ngulupi pazaru ku.

³²Kristo Opi ’ba Israeliniri ma esi pati ruaarisi va cucuru’do, ama ma ndre, ama ma nga eri a’i ani beni! ’Ba yini dile pati ruaa eri be ’diyi ede eri ’dini indi.

³³Etu ka eca azia, angu nga bi inicici oro dri dria kpere etu oromi.

³⁴Etu oromisi Yesu nga oyu: o’duko urusi, kini, Eloi, Eloi, lama sabakitani? efini kini, Mungu mani, Mungu mani, mi ku ma ’bo a’disi ya?

³⁵’Ba azini pa osopi ageinia ’diyi ka eri ra, yi ’yo ra, Mi lu, eri Eliyani omve.

³⁶’Ba alu nga nzu ezekeze su patiefi ma su drazari ma alia, erini i tozu alenia tre, nga eri ’ba ozu sia, nga fe eri mvu ani, kini, Emi ku nga, ama ndre kani Eliyani emu eri ’du va yani.

³⁷Yesu nga oyu o’duko urusi, nga ku i avani fuzu ra.

³⁸Bongo hekalu ale alizuri nga i asi iri, engazu uru kpere ele,

³⁹Mbasa asikari turu alu ma drilia pa sopi i otipi eri beri ka ndre erini kuria i avani furia ’dini, eri nga ’yo kini, Adada de ndra agu ’diri Mungu ma Mvi’i!

⁴⁰De mira oku azini yi indi, ri eri ndre re; yi ma eselia Mariamu Magadaleni pi, Mariamu Yakobo wereri pi ma andriru Yose beri pie, Salome be;

⁴¹oku ’diyi eri vuti bipi azi ngapi eri dri erini ovuria Galilia ’dale ’diyi; oku azini be kakau tupi eri be Yerusalemua ’diyi.

⁴²Ka eca ondresi, erini ovule o’du Edezanirisi, ’di o’du sabato driliari’i,

⁴³Yusufu ’ba Arimateaari eri ’ba e’yo amapi ’bani inzile turi, eri indi suru Munguni ma mile gapiri, eri nga emu ra, nga fi uri ’kokoru Pilato vu, nga Yesu ma avu a’i.

⁴⁴Pilato anga osu osu kani eri ’de ’bo yani; erini mbasa asikari turu alu ma driliari omveria i vu,i nga zi tinia kani eri ’de te drio ’bo yani.

⁴⁵Eri ka e’yo ni mbasa tia ’bo, eri nga a’i avuni fe Yusufu dri.

⁴⁶Eri nga di mu bongo emveru je, nga avuni e’du va, nga eri ombe ’bongo emveru ndesi, nga eri ’ba gule yini gale oni aliari ma alia; eri i nga era amboro gu gule tilia ci,

⁴⁷Mariamu Magadaleni pi Mariamu Yose ma andriruri be yi nga pari yini eri ’bazuri ndre indi.