Read lugbara Marako 2 Bible Online

Marako 2 - lugbara bible

Marako 2

¹Eri ka fi Kaperinaumua dika o’du azini ma vutia, e’yo erini ovuzu joari nga ku ra.

²’Ba nga di yi oku kakau, ’dini pari azini aceni ani ku, kani jotilia ogogo ’de yo; eri nga e’yo olu yi tia,

³Yi nga emu ’ba azoru rua acozari beri eji ra; ’ba su ’du eri ejini.

⁴Ka econi yini emuzaru vunia ogogo ’ba ongulumuru, dri ku, yi nga jo erini ovuzu aleniari ma dri zi ra; ka zi ’bo, yi nga pari ’ba acozarurini lazuri osi va.

⁵Yesuni a’ita yini ndreria, nga ’yo ’ba acozaruri ma tia kini, Mva, e’yo onzi mini ovu wuzaru.

⁶Te ’ba karanini azini ri ’dale indi, yi nga agata ga yi asia kini,

⁷Agu ’di e’yo ’yo ’dini a’disi ya? Eri di Mungu o’da o’da fo! A’di eco e’yo onzi wuzaruni, te alu a’dule Mungu’i ku ya?

⁸Yesuni niria i ma asia coti kini yi agata ga ’dini yi ma alia, nga di ’yo yi ma tia kini, Emi di agata ga ’dini emi asia a’disi ya?

⁹Ngori ovu ewa kokoru aga rani, ’yozu ’ba acozaruri ma tia, Mi e’yo onzi ovu wuzaru, kani ’yozu, Mi enga, mi ’du pari mini, mi aci-ri’i ya?

¹⁰Te emi ma ni ani Mvi ’bani ovu okpo be nyakua e’yo onzi wuzuri nga ’yo ’ba acozaruri ma tia-

¹¹Ma yo mi tia, Mi enga, mi du pari mini, mi mvi mi vile joa.

¹²Eri nga enga ra, ’du i ma pari coti fu amve va yi milia dria; fe ani yi ria nga osu tu, yi nga ani Mungu ru inzi, kini, Ama ndreni oku ’dini ku fo!

¹³Eri nga fu dika miri tia; ’ba ongulumuru dria nga mu eri vu, eri nga yi imba ra.

¹⁴Erini agaria eri nga Levi Alifayo mvini ndre, erini riria pari ’bani musoro ’bezuria, eri, nga ’yo tinia, Mi bi ma vuti. Eri nga enga ra, nga eri ma vuti bi coti.

¹⁵Te eri eca ’dini, erini riria nyaka nyaria Levi vile joa, ’ba musoro okupi ’diyi pi ’ba onzi be karakarau yi nga ri va Yesu be, ’ba erini imbale ’diyi pie, Yi ovu karakarau, yi adri eri ma vuti bi.

¹⁶Karani ’ba Farisaini vile ’diyi ka ndre eri ta nya ’ba onzi piyi be, ’ba musoro okupi ’diyi pie, yi nga ’yo ’ba erini imbale ’diyi ma tia kini, Eri di ta nya ’ba musoro okupi ’diyi pi be ’ba onzini pie a’disi ya?

¹⁷Yesu ka eri ra, eri ’yo yi tia kini, ’Ba rua alaru be ’diyi leni ojou ku, te ’ba rua onzi ’diyi; ma emuni ’ba kililiru omve ku, te ’ba onzi ’diyi’i.

¹⁸’Ba Yohanani imbale ’diyi pi ’ba Farisaini be yi adri nyaka ’da; yi nga emu ’yo tinia kini, ’Ba Yohanani imbale ’diyi pi ba Farisaini imbale ’diyi be, yi adri nyaka ’da, te ’ba mini imbale ’diyi ’dani nyaka ku a’disi ya?

¹⁹Yesu nga ’yo yi tia kini, ’Ba izioni omvele omua ’diyi eco nyaka ’dazaru de nga izioni Yi be indi ya? De izioni yi be indi econi yini nyaka ’dazaru ku.

²⁰O’du yini izioni ’duzu yi eseliasiri nga eca ra, yi nga di nyaka ’da etu ’dasi ndo.

²¹’Ba aluni soni bongo ojile kuri egazaru bongo okuri ma ruaa ku, o’dini yini ’baleri kazu cezu okuri ma ruaa ku, talani kazu anyazu onzikanyaru aga ra ku.

²²’Ba aluni toni patiefi ma su o’diri enyi okuri ma alia ku, patiefi su kazu enyi asizu ku, patiefi su pi nga i eza enyi be iri tro ani; te yi patiefi ma su o’diri to enyi o’diri ma alia.

²³ Eri nga eca ’dini, erini agaria nga anya beri ma aliasi o’du sabatonisi, ’ba erini imbale ’diyini aciria yi ’ba anya dri ondi.

²⁴’Ba Farisaini nga ’yo tinia kini, Mi ndre, ’ba mini yi afa azitani a’ile ’yele etu sabatonisi kuri ’ye a’disi ya?

²⁵Eri nga ’yo yi tia kini, Emi lani nga e’yo naudini ’yeleri ku ya? eri ka ovu afa nyaza kokoru, azini ka ovu abirisi, ’ba ovupi eri be ’diyi pie dria.

²⁶Emi lani e’yo erini fizu Mungu vile joa ewu Abiatarini ovuzu kuhani amborurisi, erini mikate ecetaruri nyazu, mikate nde yini ogale nyakokoru pe lu kuhani dri a’duleri, azini erini fezu ’ba ovupi eri be ’diyi dri indiri ku ya?

²⁷Eri nga ’yo yi tia kini, Yi ’ba ndra sabato ’ba dri, yi ’bani ndra ’ba sabato dri ku;

²⁸Mvi ’bani eri di ovu Opi sabatoni indi.