Read lugbara Marako 5 Bible Online

Marako 5 - lugbara bible

Marako 5

¹Yi nga ca miri tia ’aa’dasi, ’ba! Gerasini ’diyi ma angua.

²Eri ka fu oguru alia, perepere ’ba efupi angu nyadrinia orindi onzi beri nga dri fu eri be;

³agu nde adri la nyadri eselia, econi ’bani eri ombezaru ku, kani anziriku ayarusi ti;

⁴a’disiku yi ombe ndra eri pale kakau emve pisi anziriku be, te eri oce anziriku ra, eri onyo emve mgbiri mgbiri; ka’dini ’ba ecopi eri etalipini aluni yo.

⁵Etu be ini be rra, eri ovu nyadri eselia azini oni eselia, eri oyu uru ’dani, eri i ma rua oli onisi.

⁶Eri ka Yesuni ndre angu reria, eri nga nzu mu eri inzi;

⁷eri otre o’duko urusi kini, E’yo amani mi be ng-oni ya, mi Yesu, Mungu Uru Turi ma Mvi’i? Ma oyo so mi be Mungu rusi, mi ecandi ma ku.

⁸De Yesu ’yo te tinia ’bo, Mi efu agu ’di ma aliasi amve, mi orindi onziri’i!

⁹Yesu nga zi tinia kini, Mi ru a’di ya? Eri nga ’yo ra kini, Ma ru Kakau’i, amani ovule o’birurisi.

¹⁰Eri nga zi tinia matusi, kini ma pe yi ti fuzu angu ndeasi ku.

¹¹Isu ezo karakarau ovu ndra iribi nyaria va oni tia ogogo;

¹²yi nga zi tinia ’yozu kini, Mi pe ama ti ezo ’diyi ma alia, ama ma fi yi ruaa ani.

¹³Eri nga a’i ra. Orindi onzi ’diyi nga fu amve, fi ezo ma alia ani; ezo ongulumuru nga nzu ri e’buti gulukurua miri alia, kalafeni ovu ekile alifu irile, yi nga aba avuzu yi alia.

¹⁴’Ba ezo ocepi ’diyi apa ra, ng’a e’yo olu aku nde ma alia, angu ndea indi. ’Ba nga efu ani e’yo i ’yepiri ndrezu.

¹⁵Yi nga emu Yesu vu, yindre’ba te ovupi orindi onzi beri erini riria bongo be ruaa, asi be alaru, ’di agu ndra orindi kakau beri’i; yi nga ovu ani urisi.

¹⁶’Ba te e’yo ndrepi ’diyi nga e’yo i ’yepi ’ba orindi onzi beri ma ruaari pi olu e’yo ezoniri be.

¹⁷Yi ’ba zi tinia matusi, kini, eri ma fu angu yiniasi ra.

¹⁸Erini firia oguru ma alia, ’ba te ovupi orindi onzi beri nga zi tinia ovuzu eri be.

¹⁹Te Yesu a’ini ku, te ’yo tinia kini, Mi mvi mi vile joa, ’ba mini vu, mi olu yi tia e’yo amboru Opini ’yele mi be, erini asi ndriza fezu mi driri.

²⁰Eri nga mvi ra, nga ’ba e’yo olu Dekapoli ma alesi, e’yo amboru Yesuni ’yele eri beri dria; ’ba dria nga osu ambo.

²¹Yesu ka zo ogurusi ’aa’dasi dika, ’ba ongulumuru nga yi tra vunia tu; eri ovu miri tia ogogo.

²²’Ba ’wara alu, ’ba ’ba dri cepi pari ’bani yi okuzuriari nga emu ra, runi Yairo’i; erini eri ndreria eri nga i eco va eri ma palaa,

²³eri nga matu ’ba tu, kini, Zamva mani eri ’ye dra dra. Mi emu mi dri ti drinia, ruani ma ati ra, eri ma oyu idriru beni.

²⁴Yesu nga mu eri be. ’Ba ongulumuru mu vutinia tre, nga eri omi geria omi omi.

²⁵Oku azini, arini adri ra ruania ’dani eli mudri drini iri,

²⁶eri ecandi i ambo ojou o’biru dri, eri eza ndra afa erini dria ra, te eri isuni aza koza aluni ku, eri rua eca onzi aga ra,

²⁷erini e’yo Yesuni eriria ’bo, eri nga fi ’ba ongulumuru ma eselia vutinia, nga eri vile bongo rua elo.

²⁸Erini ’yole kini, ka bongo erini ma rua elo ra, i nga i pa ra-risi.

²⁹Coti ari raza erini nga nzu ra, eri nga ni i rua ati dra ’disi ’bo.

³⁰Yesu nga perepere ni i ma ngulupi ma alia kini okpo taliru efu i ruaasi ’bo, eri nga ti oja vile ’ba ongulumuru ma eselia, eri nga ’yo kini, A’di elo ma bongo ruani ya?

³¹’Ba erini imbale ’diyi nga ’yo tinia kini, Mi ndre, ’ba ongulumuru yi mi omi, mi di ’yo, A’di elo ma ruani ya?

³²Eri nga ’ba olu, ’ba e’yo ’diri ’yepiri ndrezu.

³³Oku ’dirini ovuria urisi, ruanirini yaria, erini e’yo i ’yepi eri ruaari niria, nga emu co va palania, eri nga e’yo adaruri olu eri tia dria.

³⁴Eri ’yo tinia kini, Ma zi, a’ita mini pa mi ’bo; wi mvi asi anzuru be, mi ma ovu atizaru dra ’disi.

³⁵De erini nga e’yo ’yoria, ’ba azini efu ’ba dri cepi pari ’bani yi okuzuriari ma joa, yi nga ’yo ra, Mi zi dra ’bo. Mi di ’Ba ’ba Imbapiri ecandi ’dani a’disi ya?

³⁶Yesuni e’yo yini ’yoleri eriria, nga ’yo ’ba ’ba dri cepi pari ’bani yi okuzuriari ma tia kini, Mi ma ovu urisi ku, mi a’i kiri’i.

³⁷Eri a’ini ’ba azini ma mu eri be ku, pe alu Petero pi, Yakobo pie, Yohana Yakobo ma adri pie.

³⁸Yi nga eca ’ba ’ba dri cepi pari ’bani yi okuzuriari ma joa; eri nga yikiyi neire, azini ’bani wuria kakau, azini lulu garia uru.

³⁹Eri ka fi ’bo, eri ’yo yi tia kini, Emi yikiyi zo, emi awu wu a’disi ya? Zamva ’diri drani ku, eri o’du ko.

⁴⁰Yi nga eri ogu ogu tu. Erini ’ba dria ofuria amve ’boria, eri nga zamva ma ati pi eji andri be, ’ba ovupi eri be ’diyi pie, yi nga fi pari zamvani lazuria.

⁴¹Eri nga zamva ma dri bi, nga ’yo tinia kini, Talita kumi; ka ti oja ra efini kini, Zamva wereari, ma ’yo mi tia, mi enga uru.

⁴²Coti zamva nga perepere enga uru, eri aci aci; eli erini ovu de mudri drini iri. Yi nga osu tu.

⁴³Eri azi yi tia okposi, kini ’ba azini ma ni e’yo ’diri aluni ku, azi vini kini ma fe eri dri nyaka nya.