Read lugbara Marako 7 Bible Online

Marako 7 - lugbara bible

Marako 7

¹’Ba Farisaini yi nga yi oku tualu vunia, ’ba karanini ma azini pie, ibipi emupi Yerusalemua ’diyi.

²Yi ndre ’ba erini imbale ’diyi ma azi yi nyaka nya dri alatara kokolu be, efini ojikokoru ’dani.

³(’Ba Farisaini piyi ’ba Yahudini be dria, yi ka yi dri oji treitrei ku, yi nyani nyaka ku, yini aziza ’ba ’warani inzilerisi;

⁴yi ka enga cuua, yi ka yi rua oji dria ku, yi nyani nyaka ku; e’yo yini azini karakarau indi, yini a’ile yi inzizu ’diyi, okelea pi ma ojita imvu pie, sufuria pie dria.)

⁵’Ba Farisaini ’ba karanini be nga zi tinia kini, ’Ba mini imbale ’diyi acini aziza ’ba ’warani vusi ku, te yi nyaka nya dri alatara kokoru be a’disi ya?

⁶Eri nga ’yo yi tia kini, Isaya olu ndra e’yo emini ’yeke, emi ’ba inzoru ’diyi, erini silerile kini, Suru ’diri, yi ma inzi tilesi, te asi yini ovu ma be re;

⁷yi ma inzi toko, yini ’ba imbaria imbata ’ba vilerisi.

⁸Emi adri azita Munguni ku, emi adri aziza ’bani bi kirikiri.

⁹Eri nga ’yo yi tia kini, Emi azita Munguni ’ba toko ’yeke, emi ma inzi aziza emini beni!

¹⁰Musa ’yo ndra kini, Mi inzi mi ati pi mi andri be; azini kini, ’Ba i ati pi o’dapi andri beri, eri ma dra ada;

¹¹te emi’i emi ’yo, ’Ba azini ka ’yo i ati tia, kani i andri tia, kini, Aza koza mini ecole isule ma vuri eri Koribani (efini afa fele Mungu driri’i)-

¹²emi a’ini eri azi ngazu eri ati pi dri andri be dika ku,

¹³’dini emi e’yo Munguni ’ba toko, aziza emini idrilerisi. Emi adri afa azini ’dinile ’diyi ’ye o’biru,

¹⁴Eri nga ’ba ongulumuru omve i vu dika, nga ’yo yi tia kini, Emi dria ma eri e’yo mani, emi ma va e’yo indi:

¹⁵afa aluni ovupi ’ba vu amveleru fipi eri ma alia ecopi eri ’bapi alatara kokoruni yo; te afa efupi ’ba alia ’diyi yi ’ba ’ba alatara kokoruni.

¹⁶’Ba azini ka ovu bile be e’yo erizu, eri ma eri.

¹⁷Te eri ka fi joa ’ba ongulumuru kuzu amve ’bo, ’ba erini imbale ’diyi nga zi tinia e’yo o’beza ’diri ma e’yosi.

¹⁸Eri nga ’yo yi tia kini, Emi ovu e’yo vaza kokoru ’dini indi ya? Emi nini ku ya, kini afa azini amveleru fipi ’ba aliari econi ’ba ’bazaru alatara kokoru aluni ku,

¹⁹afa nderini file asia ku, te anyajoa, erini fule daka berisi? (Eri ’yo ’dini nyaka dria ’bazu alaru.)

²⁰Eri nga, i ’yo kini, Afa efupi ’ba aliari eri ’ba ’ba alatara kokoruni.

²¹Te geri ’ba aliarisi, engazu asi ’bani ma alia, asisile onzini efuni, awu pie, ogu pie, ’ba ’dizuri pi, ali o’baza pie,

²²ngiri pie, e’yo onzi pie, lokiri pie, e’yo drinzal’u lezuri pie, mile onzi pie, o’data pie, asi afuru pie, e’yo aparakaruri pie.

²³E’yo onzi ’diyi dria yi efu ’ba alia, yi ’ba ’ba alatara kokoruni.

²⁴Eri nga enga ’dasi, eri nga mu angu Turo pi ma ageia Sidoni beria, Eri nga fi joa, eri leni ’ba aluni ma ni ku; te econi erini i zizaru ku.

²⁵Te coti oku alu, zamva erini ovu orindi onzi be, erini e’yo erini eriria ’boria, eri nga emu i eco va eri palaa.

²⁶Oku nde eri Giriki zani, suru yini Suro-Foenikeni. Eri nga zi tinia eri ma dro orineli onzi eri ma zamva ma ruaasi amve.

²⁷Eri nga ’yo tinia kini, Mi ku anzi ma tra raka, econi nyaka anzini ’duzaru ’bezaru ocea dri ku.

²⁸Eri nga e’yo omvi, nga ’yo eri tia kini, Ada Opi; te ocea nyiri mesa etia ’diyi yi di adri nyaka anzini o’depi vari nya’i.

²⁹Eri nga ’yo tinia kini, E’yo mini ’yole ’elirisi mi mvi; orindi onzi fu eli zamva mini ma ruaasi ’boo

³⁰Eri nga mu i vile joa, eri nga isu zamva la pari dria, de orindi onzi fu ruaniasi ’bo.

³¹Dika eri nga fu Turo ma tia, eri mu geri Sidoniarisi cazu miri Galilinia, angu Dekapoli ma ageiari agazu agaduasi.

³²Yi nga ’ba bile dirinyaru beri eji eri vu indi, eri adri e’yo ombe ombe erini e’yo ’yoria; yi nga zi tinia eri ma ti dri drinia.

³³Eri nga ’ba nde ji a’dule ’ba tre ma eseliasi amve, eri nga drianzi osu bilenia, eri nga cucu wu, nga andreni elo;

³⁴erini angu luria ’bua uru eri nga ava se, nga yo tinia kini, Efata, efini kini, Ma zi i mgbo.

³⁵Bileni nga i zi mgbo, leri ndre ma isu nga ovu ayuzaru, eri nga ani e’yo ’yo ti alasi.

³⁶Eri azi ’ba nde ma tia yi ma olu e’yoni ’ba aluni ma tia ku, te erini yi aziria okporu ti, yi mu e’yo olu okposi aga ra.

³⁷’Ba asi nga osu tu aga ra, ’yozu kini, Eri ’ye afa dria ’yeke ’bo; eri fe ’ba bile dirinyaru berini e’yo erizu, eri fe ’ba ndindiruni e’yo ’yozu indi.