Read lugbara Marako 8 Bible Online

Marako 8 - lugbara bible

Marako 8

¹O’du ’dayisi ’ba ongulumuru kakau ka ovu ’dale dika, isu de afa nyaza yi dri yo, eri nga ’ba erini imbale ’diyi omve i vu kini,

²Ma asi ovu yikisi ’ba ongulumuru ’diyi vu, yini tele ma be curu’do o’du na nyaka kokorurisi;

³ma ka yi ti pe mvizu yi vile akua abirisi, yi nga ande kai geria; a’disiku yi ma azi enga angu ziria.

⁴’Ba erini imbale ’diyi nga e’yo omvi tinia kini, ’Ba azini eco fezu ’ba ’diyini trazu nyakasi angu didi ’doa ngoni ngoni ya?

⁵Eri zi yi tia kini, Mikate emi dri si ya? Yi ’yo ra, Aziri.

⁶Eri azi ’ba ongulumuru yi ma ri va nyakua; eri nga mikate aziri nde ’du, ka awa’difo ’yo ’bo, eri ati yi ale ra, fe ’ba erini imbale ’diyi dri, ’yi asa ’ba ongulumuru ma palaa ra.

⁷E’bi nyiri nyiri ovu yi dri were indi; erini asi ndriza a’iria drinia ’bo, eri azi ’ba ma asa afa ’diyi ’ba nde ma palaa indi.

⁸Yi i nga nya ra, nga tra indi; nga nyaka erini aleni atileri ma joloko o’du abaka tre tre aziri.

⁹’Ba ovu alifu sule. Eri nga yi ti pe mvizu.

¹⁰Coti eri fi oguru alia ’ba erini imbale ’diyi be, yi nga mu kala Dalamanutaaria.

¹¹ ’Ba Farisaini nga efu ra, yi ’ba zi tinia, eceta ’buari ndruzu eri dri eri obezu.

¹²Eri nga ava se ambo eri asia, kini, Anzi ’diyi yi eceta ndru a’disi ya? Ma ’yo emi tia ndi ndi, yi ngani eceta fe anzi curu’do ’diyi dri aluni ku.

¹³Eci nga yi ku ra, nga fi oguru alia dika, nga zo ’aa’dasi.

¹⁴Te yi dri nga avi nyaka ejizu; yi ovuni nyaka be oguru alia ku, kiri mikate alu ko’diko’di,

¹⁵Eri ’ba e’yo azi yi tia okposi, ’yozu kini, Emi ndre, emi ma ovu mile be emi agei tezu akufi ’ba Farisaini ’diyinisi, akufi ’ba Herodenirisi indi.

¹⁶Yi nga e’yo ’yo yi agyi bilia, kini, Amani ovule nyaka kokorurisi.

¹⁷Yesuni e’yo nde niria, nga ’yo yi tia kini, Emi e’yo ega emi eselia emini ovule nyaka kokorurisi a’disi ya? Emi ndreni nga ku ya? Emi vani ku indi ya? Emi asi ovu mbazaru ya?

¹⁸Emini ovuria mile be, emi ndreni afa ku ya? Emini ovuria bile be emi erini e’yo ku ya? Emi egani e’yo emi asia de ku ya?

¹⁹Mani ndra mikate towi ’diyi awaria ’ba alifu towi dri, emi o’du ndra nyaka ma joloko evu tre tre si ya? Yi ’yo ra, Mudri drini iri.

²⁰Te mikate aziri ’ba alifu su dri, emi o’du ndra nyaka ma joloko abaka tre tre si ya? Yi nga ’yo tinia, Aziri.

²¹Eri nga ’yo yi tia kini, Emi vani di nga e’yo ku ya?

²²Yi nga mu Betesaidaa. Yi nga ’ba mile draza beri eji vunia, yi nga zi tinia eri ma elo ruani ani.

²³Eri nga ’ba mile draza beri ma dri bi, nga eri ji akuasi amve; eri ka cucu wu eri mile efia ’bo, eri nga i dri ti drinia, eri zi tinia kini, Mi ndre afa ra ya?

²⁴’Ba nde nga i mile enga uru, kini, Ma ndre ’ba ra, te yini aciria yi e’da ma dri patile.

²⁵Te eri nga dri ti milenia dika; eri nga angu lu ’dani, eri ovu atizaru, eri nga afa dria ndre ’yeke.

²⁶Eri nga eri ti pe mvizu eri vile joa, kini, Ka tro aku ’diria ti, mi fi ku.

²⁷Yesu nga fu ’ba erini imbale ’diyi be, fizu aku Kaisari Filipinia ’diyi ma alia; eri nga ’ba erini imbale ’diyi zi geria, kini, ’Ba ’yo kini ma a’di ya?

²⁸Yi omvi e’yo eri tia ’yozu kini, Yohana ’ba baputizi fepiri’i; ’ba azini kini Eliya’i; ’ba azini kini ’ba nabiru ’diyi ma azi aluri’i.

²⁹Te eri zi yi tia kini, Te emi ’yo emini ma a’di’i ya? Petero nga e’yo omvi, ’yo eri tia kini, Mi Kristo’i.

³⁰Eri nga e’yo azi yi tia okposi yi ma olu e’yo erini ’ba azini ma tia ku.

³¹Eri ’ba yi imba kini Mvi ’bani ma ecandi i e’yo karakarausi, ’ba ’wara ’diyi pi, kuhani pie, karani pie ma ga eri si, yi ma ’di eri ra, te o’du na ma vutia eri ma enga dika.

³²Eri ’yo e’yo ’diri mgboru. Te; Petero nga eri bi ra, nga ’ba ega drinia.

³³Erini ti coria ’ba erini imbale ’diyi ndreria, eri ega Petero ma dria kini, Mi da mi ma ngukua, mi Satani’i Mi droni asisile mini e’yo Munguni ma dria ku, te e’yo ’bani ma dria,

³⁴Eri ka ’ba ongulumuru omve i vu ’ba erini imbale ’diyi be ’bo, eri nga ’yo yi tia kini, ’Ba azini ka le mu ma vutia, eri ma ga i ma ngulupi si, ma ’du pati i dizuri, ma emu ma vutia.

³⁵’Ba azini ka le idri ini pa ra, idri nde nga dri ja ra; te ’ba azini, idri erini ka dri ja e’yo manisi, e’yo barisi indi, eri nga idri ini pa ra.

³⁶’Ba ka angu wudrikuruni nya dria i ma afaru, te idri ini ka avi ra, eri nga a’di ma orodri isu ya?

³⁷’Ba nga idri ini ole a’di afasi ya?

³⁸’Ba azini ka ovu drinzasi masi, e’yo mani ’yole ’diyisi indi, anzi ali o’bapi azini onzikanyaru ’diyi ma eselia, drinzani nga Mvi ’bani bi indi erisi, erini emuria diza i Atini be, malaika alatararu be tualu.